ភ្ជាប់​ទៅ​គេហទំព័រ​ទាក់ទង

រដ្ឋ​មន្រ្តី​ហិរញ្ញវត្ថុ​របស់​រដ្ឋ​ឥស្លាម​ត្រូវ​បាន​សម្លាប់​ដោយ​កងកម្លាំង​អាមេរិក


លោក​រដ្ឋ​មន្រ្តី Ash Carter ថ្លែង​ក្នុង​សន្និសីទ​កាសែត​នៅ​​មន្ទីរ​បញ្ចកោណ​ កាលពី​ថ្ងៃទី២៥ ខែមីនា ឆ្នាំ២០១៦។

កាល​ពី​ថ្ងៃ​សុក្រ លោក Ash Carter រដ្ឋ​មន្ត្រី​ការពារ​ប្រទេស​ស.រ.អា.​បាន​មាន​ប្រសាសន៍​ថា​ កង​កម្លាំង​ស.រ.អា.​បាន​សម្លាប់​ឈ្មោះ Hajji Iman ដែល​ជារដ្ឋ​មន្ត្រី​ហិរញ្ញវត្ថុ​របស់​រដ្ឋ​ឥស្លាម ដែល​ទទួល​ខុស​ត្រូវ​ខាង​កិច្ចការ​ក្រៅ​ប្រទេស​របស់​ពួក​ភេរវជន​នេះ​ដែរ។

លោក Carter បាន​មាន​ប្រសាសន៍​ថា «យើង​បាន​កម្ចាត់​ជា​ប្រព័ន្ធ​គណៈ​រដ្ឋ​មន្ត្រី​របស់​ពួក​ ISIL» ដោយ​លោក​បាន​ប្រើ​អក្សរ​កាត់​នៃ​ឈ្មោះ​ពួក​ភេរវជន​នេះ។

លោក Carter មិន​បាន​មាន​ប្រសាសន៍ថា​តើ​ឈ្មោះ Iman បាន​ត្រូវ​សម្លាប់​នៅ​ក្នុង​ប្រទេស​អ៊ីរ៉ាក់​ ឬ​ប្រទេស​ស៊ីរី​ទេ ហើយ​លោក​ក៏​មិន​បាន​និយាយ​ដែរ​ថា​តើ​មេដឹកនាំ​រដ្ឋ​ឥស្លាម​រូប​នេះ​បាន​ត្រូវ​សម្លាប់​នៅ​ក្នុងការ​ឆ្មក់វាយ​ប្រហារ​មួយ​ឬ​ក្នុង​ការ​វាយប្រហារ​តាម​អាកាស​ទេ។​

បើ​តាម​មន្ត្រី​ម្នាក់​ផ្នែក​ការពារ​ប្រទេស​ស.រ.អា. ​ឈ្មោះ​ Iman «បាន​រៀបចំ​ដោយ​សកម្ម​នូវ​ផែនការ​វាយ​ប្រហារ​ភេរវកម្ម​នៅ​ក្នុង​បស្ចឹមប្រទេស»។ មន្ត្រី​រូប​នេះ​បាន​និយាយ​ថា​ ក្រុម​យោធា​ស.រ.អា.​មាន​ជំនឿ​ថា​ឈ្មោះ​ Iman បាន​ផ្តល់​ប្រាក់​កាស​ដល់​ពួក​យុទ្ធជន​បរទេស​ដែល​ខិតខំ​ព្យាយាម​អភិវឌ្ឍ និង​ធ្វើការ​វាយ​ប្រហារ​ស្រដៀង​គ្នា​នឹង​ការ​វាយប្រហារ​ក្នុង​សប្តាហ៍​នេះ​នៅ​ក្នុង​ក្រុង​ប្រ៊ុចសែល។​

លោក Carter ក៏​បាន​ប្រកាស​ដែរ​ថា​ឈ្មោះ​ Abu Sara ដែល​ជា​មេដឹកនាំ​ម្នាក់​នៃ​ពួក​រដ្ឋ​ឥស្លាម ទទួល​បន្ទុក​ខាង​ការ​បើក​ប្រាក់​ឱ្យ​ពួក​យុទ្ធជន​នៅ​ក្នុង​ប្រទេសអ៊ីរ៉ាក់​ក៏​បាន​ត្រូវ​យក​ធ្វើជា​ទីដៅ​នៃ​ការ​វាយ​ប្រហារ​ដោយ​កងកម្លាំង​ស.រ.អា.​ក្នុង​សប្តាហ៍​នេះ​ដែរ។

មន្ត្រី​ម្នាក់​ផ្នែក​ការពារ​ប្រទេស​អាមេរិកាំង​បាន​និយាយ​ប្រាប់​ VOA ថា​ឈ្មោះ​ Sara បាន​ស្លាប់​នៅ​ក្នុង​ការ​វាយ​ប្រហារ​មួយ​ដោយ​យន្តហោះ​គ្មាន​អ្នក​បើក​នៅ​ក្នុង​ប្រទេស​អ៊ីរ៉ាក់៕

XS
SM
MD
LG