ពួកជនសកម្មប្រយុទ្ធរដ្ឋឥស្លាមបានអះអាងទាមទារការទទួលខុសត្រូវដល់ការវាយប្រហារដ៏ប្រល័យនៅក្នុងក្រុងប៉ារីសដែលនៅទីនោះក្រុមទាហានបានចេញបំពេញកាតព្វកិច្ចកាលពីថ្ងៃសៅរ៍ដើម្បីយាមល្បាតប្រឆាំងនឹងការវាយប្រហារថែមទៀត។
កាលពីថ្ងៃសៅរ៍ ពួកភេរវជននេះប្រកាសថា ការវាយប្រហារ៦ដែលកើតមានដំណាលគ្នាដែលបានបណ្តាលឱ្យមនុស្សយ៉ាងតិចណាស់១២៧នាក់ស្លាប់នៅក្នុងក្រុងប៉ារីសជាការឆ្លើយតបនឹងការវាយប្រហារតាមអាកាសប្រឆាំងនឹងពួកយុទ្ធជនរដ្ឋឥស្លាមនៅក្នុងប្រទេសអ៊ីរ៉ាក់ និងប្រទេសស៊ីរី។ សារនេះបាននិយាយថាប្រទេសបារាំង និងក្រុមអ្នកគាំទ្របារាំង «នឹងនៅតែឋិតក្នុងលំដាប់លើគេក្នុងបញ្ជីនៃទីដៅរបស់ពួករដ្ឋឥស្លាម»។
ការអះអាងទាមទារការទទួលខុសត្រូវជាភាសាអារ៉ាប់ និងភាសាបារាំងមាននៅក្នុងសេចក្តីថ្លែងការណ៍មួយផ្សព្វផ្សាយតាមបណ្តាញអ៊ិនធឺណិតដោយពួកអ្នកគាំទ្រពួករដ្ឋឥស្លាម។ គេមិនអាចបញ្ជាក់ភ្លាមៗបានទេអំពីភាពពិតប្រាកដនៃសេចក្តីថ្លែងការណ៍នេះដែលមានស្លាកសញ្ញារបស់រដ្ឋឥស្លាម ក៏ប៉ុន្តែក្រុមអ្នកជំនាញការខាងភេរវកម្មបាននិយាយថា គ្មានការសង្ស័យទេអំពីសុពលភាពនៃសេចក្តីថ្លែងការណ៍នេះ។
លោកប្រធានាធិបតី Francois Hollande បានប្រកាសការកាន់ទុក្ខជាតិចំនួនបីថ្ងៃនៅទូទាំងប្រទេសបារាំង។ លោកបានបន្ទោសជាពិសេសលើពួករដ្ឋ
ឥស្លាមចំពោះយប់នៃសេចក្តីរន្ធត់នោះ ហើយលោកបានហៅការវាយប្រហារទាំងនោះថាជា «សកម្មភាពសង្គ្រាមមួយ»៕
