ក្រុមភេរវកម្ម Jihad ដូចជា រដ្ឋឥស្លាម និង អាល់កៃដា អាចយកបញ្ហាចម្រូងចម្រាសទាក់ទងនឹងជម្លោះអំពីបម្រាមលើការធ្វើដំណើរមកស.រ.អា.ពីប្រទេសចំនួន៧ ដែលកាន់សាសនាឥស្លាមភាគច្រើន ធ្វើជាមធ្យោបាយប្រមូលអ្នកគាំទ្រពួកភេរវកម្ម។ នេះបើយោងតាមអ្នកវិភាគខ្លះ។
លោក Donald Trump ប្រធានាធិបតីស.រ.អា.បានប្តេជ្ញាកាលពីថ្ងៃសៅរ៍ថា នឹងដកចេញបទបញ្ជារបស់ចៅក្រមសហព័ន្ធដែលរារាំងជាបណ្តោះអាសន្ននូវបទបញ្ជាអង្គនីតិប្រតិបត្តិរបស់លោក ដែលហាមប្រាមការធ្វើដំណើរមកស.រ.អា.ពីប្រទេសមួយចំនួននៅមជ្ឈឹមបូព៌ា។
លោក Trump ហៅបទបញ្ជារបស់ចៅក្រមសហព័ន្ធនោះថា ជារឿងគួរឲ្យអស់សំណើច។ រដ្ឋបាលរបស់លោក Trump បានទទូចថា បម្រាមលើប្រទេសទាំង៧នោះជាបម្រាមបណ្តោះអាសន្នរហូតដល់មានគោលនយោបាយទូលំទូលាយជាងនេះ។ ប៉ុន្តែនៅពេលការតវ៉ានិងការប្រឆាំងតាមផ្លូវច្បាប់ចំពោះបម្រាមនេះនៅតែបន្តនោះ អ្នកវិភាគខ្លះបារម្ភថា អង្គការភេវកម្មនឹងប្រើរឿងចម្រូងចម្រាសនេះដើម្បីពង្រីកឥទ្ធិពលរបស់ខ្លួន។ ក្រុមស៊ើបការណ៍សម្ងាត់ឈ្មោះ SITE ដែលមានមូលដ្ឋាននៅស.រ.អា. និងតាមដានសកម្មភាពភេរវកម្ម បានសរសេរថា ពួកភេរវកម្ម Jihad និយាយថា បទបញ្ជាអង្គនីតិប្រតិបត្តិបណ្តោះអាសន្នរបស់លោក Donald Trump ប្រធានាធិបតីស.រ.អា.នេះ បង្ហាញថា អាមេរិកស្អប់មូស្លីម។
សេតវិមាននិយាយថា បម្រាមនេះធ្វើឡើងដើម្បីសុវត្ថិភាព និងការពារព្រំដែនអាមេរិក។ ប្រទេសអ៊ីរ៉ាក់ អ៊ីរ៉ង់ លីប៊ី យេម៉ែន ស៊ីរី សូម៉ាលី និងស៊ូដង់ជាប្រទេសនៅក្នុងបម្រាមនេះ៕
