ឃ្លាំងផ្ទុកសន្លឹកឆ្នោតដ៏ធំបំផុតនៅក្នុងប្រទេសអ៊ីរ៉ាក់ត្រូវភ្លើងឆាបឆេះកាលពីថ្ងៃអាទិត្យ នៅមុនពេលធ្វើការរាប់សន្លឹកឆ្នោតឡើងវិញ ដែលបញ្ជាដោយសភា។ នេះបើយោងតាមមន្ត្រីសន្តិសុខ។
ឃ្លាំងដែលស្តុកសន្លឹកឆ្នោតពីសង្កាត់ Al-Russafa ដែលជាសង្កាត់ដែលមានអ្នកបោះឆ្នោតច្រើនបំផុតនៅប៉ែកខាងកើតទីក្រុង បាកដាដ ត្រូវបានរាយការណ៍ថា បានត្រូវភ្លើងឆេះអស់រយៈពេល២ម៉ោង។ ក្រុមការងារពន្លត់អគ្គិភ័យនិងរថយន្តបាញ់ទឹកចំនួន១០គ្រឿងបានព្យាយាមពន្លត់អគ្គិភ័យនោះ។ នេះបើយោងតាមទីភ្នាក់ងារសារព័ត៌មានបារាំង AFP។
អង្គនីតិបញ្ញត្តិអ៊ីរ៉ាក់បានបោះឆ្នោតកាលពីថ្ងៃពុធ ឲ្យរាប់សន្លឹកឆ្នោតឡើងវិញនៅក្នុងការបោះឆ្នោតជ្រើសរើសសមាជិកសភាកាលពីថ្ងៃទី១២ ខែឧសភាកន្លងទៅនេះ ហើយការបោះឆ្នោតនោះក៏បានសម្រេចព្យួរគណៈកម្មាធិការមួយដែលទទួលបន្ទុកលើការរៀបចំការបោះឆ្នោត ខណៈដែលមានការចោទប្រកាន់ថាមានការបន្លំសន្លឹកឆ្នោតផងដែរ។
សភាបានបញ្ជាឲ្យរាប់សន្លឹកឆ្នោតឡើងវិញនៅតាមមណ្ឌលបោះឆ្នោតទាំងអស់ ដែលមានជិត១១លានសន្លឹក។
អ៊ីរ៉ាក់មានភាពច្របូកច្របល់ចាប់តាំងពីលោកអាចារ្យ Moqtada Sadr សាសនាឥស្លាមនិកាយ Shiite ដែលជាអ្នកប្រជានិយម បានទទួលជ័យជម្នះដ៏គួរឲ្យភ្ញាក់ផ្អើល និងមានទំនាក់ទំនងជាមួយនឹងអ្នកកាន់លទ្ធិកុម្មុយនិស្ត៕
