កងទ័ពអ៊ីរ៉ាក់បានបើកការវាយប្រហារដ៏ធំមួយដើម្បី ដណ្តើមយកទីក្រុងទីក្រីតដែលស្ថិតនៅ ភាគខាងជើងហើយកំពុងកាន់កាប់ដោយពួកជ្រុលនិយមនីកាយស៊ុននី។
មន្ត្រីយោធានិយាយថាប្រតិបត្តិការដោយទ័ពថ្មើជើងបានចាប់ផ្តើមកាលពីថ្ងៃសៅរ៍ដោយមានការវាយប្រយុទ្ធគ្នាយ៉ាងធ្ងន់ធ្ងរនៅក្នុងទីក្រុងរវាងពួកឧទ្ទាមស៊ុននីនិងកងកម្លាំងពិសេសអ៊ីរ៉ាក់ ដែលព្យាយាមវាយដណ្តើមគ្រប់គ្រងតំបន់សាកលវិទ្យាល័យមួយ។ ឧទ្ទម្ភាគចក្របំពាក់អាវុធរបស់អ៊ីរ៉ាក់ បានបាញ់លើតំបន់នោះ ដើម្បី បណ្តេញពួកឧទ្ទាមក្នុងខណៈពេលដែលរថក្រោះបើកសម្រុកចូលមកទីទិសខាងត្បូងដើម្បីវាយប្រហារ។
ស្របពេលជាមួយគ្នានោះ ដែរ អ៊ីរ៉ាក់និយាយថាខ្លួនបានទទួលយន្តហោះ ចម្បាំងចាស់របស់រុស្ស៊ីដើម្បីប្រើប្រាស់ក្នុងការប្រយុទ្ធនឹងពួក សកម្មប្រយុទ្ធទាំងនោះ។
ការវាយប្រហារចុងក្រោយនេះបានកើតមានឡើងភ្លាមៗបន្ទាប់ពីមន្ត្រី យោធាអាមេរិកនិយាយថាកងយោធារបស់ខ្លួនកំពុងហោះហើរយន្តហោះឈ្លបយកការណ៍ដ្រូនដោយមានបំពាក់អាវុធក្នុងដែនអាកាសអ៊ីរ៉ាក់ដើម្បីការពារទីប្រឹក្សាយោធាសហរដ្ឋអាមេរិកដែលបានត្រូវបញ្ជូនទៅ ទីនោះដើម្បីវាយបកនឹងក្រុមបះបោរ។
លោកប្រធានាធិបតីសហរដ្ឋអាមេរិកបារ៉ាក់ អូបាម៉ា បានបញ្ជូនបុគ្គលិកយោធាចំនួន៣០០នាក់ទៅប្រទេសអ៊ីរ៉ាក់កាលពីដើមខែនេះដើម្បីជួយពង្រឹងកងកម្លាំងសន្តិសុខរបស់រដ្ឋាភិបាលនិងជួយបង្កើតមណ្ឌលប្រតិបត្តិការរួមដើម្បី ប្រយុទ្ធនឹងក្រុមសកម្មប្រយុទ្ធស៊ុននី។
