ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក ​ស ខេង​ ​បញ្ជា​ឱ្យ​មន្ត្រី​ចាត់​វិធានការណ៍​យ៉ាង​តឹងរ៉ឹង​លើការ​លាងលុយ​ទុច្ចរិត​នៅ​កម្ពុជា


រូបឯកសារ៖ លោក ស ខេង រដ្ឋមន្រ្តី​ក្រសួង​មហាផ្ទៃ​​ថ្លែង​នៅ​ក្នុង​កិច្ចប្រជុំ​រដ្ឋ​មន្រ្តី​នៃ​គណៈ​កម្មាធិការ​ជាតិ​សម្រាប់​ការអភិវឌ្ឍ​តាម​បែប​ប្រជាធិបតេយ្យ​នៅ​ថ្នាក់​ក្រោម​ជាតិ​ (គ.ជ.អ.ប) នៅ​ថ្ងៃ​ព្រហស្បតិ៍ ទី​១០ ខែ​សីហា ឆ្នាំ​២០១៦ រាជធានី​ភ្នំពេញ។​ (ឡេង ឡែន/VOA)​

អង្គការ​ពិភព​លោក​ឃ្លាំមើល​ការ​លាង​លុយ​ទុច្ចរិត ​(FATF)​ នៅ​ដើម​ឆ្នាំ​២០១៩​នេះ​បាន​ដាក់​កម្ពុជា​ក្នុង​បញ្ជី​ឃ្លាំមើល​របស់​ខ្លួន​​​ ដោយសារ​ប្រព័ន្ធ​យុត្តិធម៌​នៅ​កម្ពុជា​មាន​ «អំពើ​ពុករលួយ​ខ្ពស់»​ និង​ថា​គ្មាន​ករណី​លាង​លុយ​កខ្វក់​ណាមួយ​ធ្លាប់​ត្រូវ​បាន​កាត់​ទោស​នៅ​កម្ពុជា​នោះ​ទេ។

ចរាចរណ៍​លុយ​កខ្វក់​នៅ​តែ​បង្ក​ជា​បញ្ហា​មួយ​ក្នុង​សង្គម​កម្ពុជា​ ​ខណៈ​ពេល​ដែល​អាជ្ញាធរ​កំពុង​ធ្វើ​ការ​បង្រ្កាប​ជា​បន្តបន្ទាប់​ក៏ដូ​ចជា​ពង្រឹង​យន្តការ​បង្រ្កាប​បន្ថែម​ទៀត។​ ​ការណ៍​នេះ​ធ្វើ​ឡើង​ ​ក្រោយ​ពីអង្គការ​ពិភពលោក​ឃ្លាំ​មើល​ការ​លាងលុយ​ទុច្ចរិតបាន​ដាក់​កម្ពុជា​ក្នុង​បញ្ជី​ឃ្លាំ​មើល​របស់​ខ្លួន។

នៅ​សប្តាហ៍​នេះ​ រដ្ឋ​មន្រ្តី​ក្រសួង​មហាផ្ទៃ​លោក ​ស ខេង​ បង្ហាញ​ក្តី​បារម្ភចំពោះ​ការ​កើន​ឡើង​នៃ​សកម្មភាព​លាង​លុយ​កខ្វក់​ក្នុង​ប្រទេស​កម្ពុជា​ និង​បញ្ជា​ឱ្យ​មាន​ចំណាត់​ការ​យ៉ាង​តឹងរ៉ឹង​លើ​បញ្ហា​នេះ​ ក្រោយ​ពេល​កម្ពុជាត្រូវ​បាន​ដាក់​ចូល​ក្នុង​បញ្ជី​ខ្មៅ​នៃ​ការ​លាង​លុយ​ទុច្ចរិត។

ថ្លែង​នៅ​ក្នុងពិធី​ប្រកាស​ចូល​មក​កាន់​តំណែង​ក្រុមប្រឹក្សា​រាជធានី​ភ្នំពេញ​ កាល​ពី​ថ្ងៃ​ពុធ​កន្លង​ទៅ លោក​ ស ខេង​ ​បាន​បញ្ជាក់​ពី​ស្ថានភាព​ដែល​កម្ពុជា​កំពុង​ស្ថិត​នៅ​ក្នុង​បញ្ជីរបស់​អង្គការ​ពិភពលោក​ឃ្លាំ​មើល​ការ​លាង​លុយ​ទុច្ចរិត​ (FATF)​ ស្រប​ពេល​ជំរុញ​ឲ្យ​សមត្ថកិច្ច​ពាក់ព័ន្ធ​ប្រឹងប្រែង​បន្ថែម​ក្នុង​ការ​បង្រ្កាប​ចរាចរណ៍​លុយ​កខ្វក់។

«អារឿង​លាងលុយ​ក៏​ដូចគ្នា​ដែរ លុយ​កខ្វក់​ហ្អា។​ គេចាត់​ទុក​ថា​ឥឡូវ​កម្ពុជា​យើង​ វា​ស្ថិត​ក្នុង​ចំណាត់​ថ្នាក់​ប្រទេស​ប្រផេះ​ អញ្ចឹង​គេ​ឃ្លាំ​មើល​ហើយ។​ មួយ​ជំហាន​ទៀត​វា​ទៅ​ខ្មៅ​ ​នោះ​បើ​សិន​ណា​ជា​យើង​មិន​បាន​យក​ចិត្ត​ទុក​ដាក់​បង្រ្កាប»។

អង្គការ​ពិភព​លោក​ឃ្លាំមើល​ការ​លាង​លុយ​ទុច្ចរិត ​(FATF)​ នៅ​ដើម​ឆ្នាំ​២០១៩​នេះ​បាន​ដាក់​កម្ពុជា​ក្នុង​បញ្ជី​ឃ្លាំមើល​របស់​ខ្លួន​ ដោយសារ​ប្រព័ន្ធ​យុត្តិធម៌​នៅ​កម្ពុជា​មាន​ «អំពើ​ពុករលួយ​ខ្ពស់»​ និង​ថា​គ្មាន​ករណី​លាង​លុយ​កខ្វក់​ណាមួយ​ធ្លាប់​ត្រូវ​បាន​កាត់​ទោស​នៅ​កម្ពុជា​នោះ​ទេ។

​រដ្ឋមន្រ្តី​ក្រសួង​មហាផ្ទៃ​ លោក​ ស ខេង ​បាន​សង្កត់ធ្ងន់​ពី​ផលវិបាក​ចំពោះ​កម្ពុជា​ ប្រសិន​បើ​ករណី​លួច​នាំ​ចូល​លុយ​កខ្វក់​នៅ​តែ​បន្ត​កើត​មាន។

«ប៉ុន្តែ​វា​ងាប់​ គឺ​ងាប់​ប្រទេស​ជាតិ​តែ​ម្តង។​ ងាប់​ប្រទេស​ជាតិ​ត្រង់​ណា​ ត្រង់​ថា​បើ​ថ្ងៃ​ណា​មួយ​ដល់​កម្រិត​មួយ​គេ​ថា កម្ពុជា​ជា​ប្រទេស​ខ្មៅ​ ជា​ប្រទេស​លាង​លុយ​ ចប់!​ ចប់!។​ ចរាចរណ៍​លុយ​កាក់​ពី​ធនាគារ​ណា​ទាំង​អស់​ ខ្ញុំ​មិន​ហ៊ាន​ថា​ ១០០​ភាគរយ​ចប់​ទេ ប៉ុន្តែ​វា​ពិត​ជា​ប្រឈម​នឹង​ការ​លំបាក​ដ៏​ធំ​ហើយ។​ នោះ​ជា​ហានិភ័យ​ដ៏​ធំ​បំផុត»។

កាល​ពី​ខែ​មេសា​កន្លង​ទៅ​សមត្ថកិច្ច​កម្ពុជា​បញ្ជូន​ខ្លួន​ជនជាតិ​ចិន​៣​នាក់​ទៅ​តុលាការ​ ពាក់ព័ន្ធ​នឹង​បទល្មើស​សម្អាត​ប្រាក់​ចំនួន​ជាង​ ៣លាន ៥​សែន​ដុល្លារ​ អាមេរិក​ ដែល​នាំ​ចូល​ពី​ទីក្រុង​ហុងកុង​មក​កម្ពុជា។​ នេះ​បើ​តាម​ការ​បញ្ជាក់​របស់​អគ្គនាយក​អន្តោ​ប្រវេសន៍។​ ហើយ​នៅ​ចុង​ខែ​ឧសភា​ សមត្ថកិច្ច​ក៏​បានរឹប​អូស​សាច់ប្រាក់ចំនួន​ ៨៥ ម៉ឺន ៥​ពាន់ដុល្លារ​អាមេរិក​ទៀត​ ដែល​ត្រូវ​បាន​លួច​នាំ​ចូល​ពី​ក្រុង​ហុងកុង​ដូច​គ្នា។

ចំពោះ​ករណី​បង្រ្កាប​ការ​លួច​នាំ​ចូល​លុយ​កខ្វក់​ខាង​លើ​នេះ​ អ្នក​នាំ​ពាក្យ​ក្រសួង​មហាផ្ទៃ​លោក​ ខៀវ សុភ័គ​ បាន​លើកឡើង​ពី​ភាព​ជោគជ័យ​នៃ​ចំណាត់ការ​របស់​សមត្ថកិច្ច​កម្ពុជា​ ​ក្នុង​ការ​ទប់ស្កាត់​លំហូរ​ចូល​នៃ​លុយ​កខ្វក់​ក្នុង​ទ្រង់ទ្រាយ​ធំ​នា​ពេល​អនាគត។

«ពាក្យ​សាមញ្ញ​បើ​យើង​និយាយ​ គឺ​ថា ដូចជា​ អារក​មាន់​ បន្លាច​ខ្លា​អញ្ចឹង។​ ខ្លា​វា​ចង់​មក​ក៏​មិនហ៊ាន​ដែរ។​ ដូច្នេះ​ ខ្លា​ក៏​មិន​មក​ដែរ បើ​ថា​អ្នក​មាន​ធំៗ​ក៏​មិន​មក​ដែរ​ ក៏​មិន​អាច​មក​បាន​ដែរ ព្រោះ​ប៉ុណ្ណឹង​ហើយ​។ យើង​បាន​ធ្វើ​កិច្ចការងារ​ហ្នឹង​ហើយ»។

អ្នក​នាំ​ពាក្យ​ក្រសួង​មហាផ្ទៃ​លោក ​ខៀវ សុភ័គ ​បាន​និយាយ​ផងដែរ​ថា ​សាច់ប្រាក់​ដែល​រឹបអូស​បាន​ ត្រូវ​បាន​បញ្ជូន​ទៅ​ធនាគារ​ជាតិ​ ដើម្បី​រៀបចំ​ជា​វត្ថុតាង​បញ្ជូន​ទៅ​តុលាការ​ដើម្បី​ធ្វើ​ការ​វិនិច្ឆ័យ​បន្ត​ មុន​ពេល​ដាក់​បញ្ចូល​ជា​ទ្រព្យ​សម្បត្តិ​ជាតិ។

​ឆ្លើយ​តប​នឹង​ករណី​ដាក់​កម្ពុជា​នៅ​ក្នុង​បញ្ជីឃ្លាំ​មើល​របស់​អង្គការពិភពលោក​ឃ្លាំ​មើល​ការ​លាងលុយ​ទុច្ចរិត​ លោក ​ខៀវ សុភ័គ ​បាន​លើក​ឡើង​ថា ​នា​ពេល​បច្ចុប្បន្ន​សមត្ថកិច្ចកម្ពុជា​កំពុង​តែ​រឹតបន្តឹង​ការ​ត្រួត​ពិនិត្យ​តាម​ច្រក​អន្តរជាតិ​នានា ​ខណៈ​ពេលមន្រ្តី​នគរបាល​ទទួល​បន្ទុក​ក៏​កំពុង​ទទួល​បាន​ការ​បំប៉ន​ជំនាញ​បន្ថែម​ក្នុង​ផ្នែក​តាមដាន​ចរាចរណ៍​លុយ​កខ្វក់​ផង​ដែរ។

​លោក​ សន ជ័យ​ នាយក​ប្រតិបត្តិ​ប្រចាំ​ប្រទេស​កម្ពុជា​នៃ​សម្ព័ន្ធ​គណ​នេយ្យ​ភាព​សង្គម​អាស៊ី​បូព៌ា​និង​ប៉ាស៊ីហ្វិក​ គាំទ្រ​ការ​បង្រ្កាប​លើ​ចរាចរណ៍​សាច់ប្រាក់​ខុស​ច្បាប់​ពី​សំណាក់​អាជ្ញាធរ។​ យ៉ាង​ណាក្តី​ លោក​ សន ជ័យ​ នៅ​តែ​មាន​មន្ទិល​លើ​ទំហំ​ និង​ទម្រង់​នៃ​ការ​លាង​លុយ​ ដែល​មាន​ពី​មុន​មក​នៅ​កម្ពុជា។

«បើ​មើល​ទៅ​លើ​អតីត​កាល​វិញ​គឺ​ថា ទំនង​ជា​មាន​ប្រវត្តិ​នៃ​ការ​លាងលុយ​កខ្វក់​នៅ​ក្នុង​រូបភាព​ផ្សេងៗ​ ដូច​ជា​រូបភាព​វិនិយោគ​ខ្មៅ​ រូបភាព​ដែល​គេហៅ​ថា​ ដូចជា ចំណាយ​ផ្សេងៗ​ ​ឬ​ក៏​ទម្រង់​នៃ​ការ​ប្រើប្រាស់​ល្បែង​ ល្បែង​នៅ​កាស៊ីណូ​ហ្នឹង​ ជា​មធ្យោបាយ​នៃ​ការ​លាងលុយ​កខ្វក់​ដែរ»។

​នៅ​ប៉ុន្មាន​ឆ្នាំ​ចុង​ក្រោយ​ ​លំហូរ​ចូល​នៃ​ជនជាតិ​ចិនជាបន្តបន្ទាប់​ ​ជា​ពិសេសក្នុង​ខេត្ត​ព្រះ​សីហនុ​សម្រាប់​វិស័យ​កម្សាន្ត​តាម​ភ្លើងពណ៌​ និង​កាស៊ីណូ​បាន​បង្ក​ឱ្យ​មាន​ការ​បារម្ភ​យ៉ាង​ខ្លាំង​ពីចរាចរណ៍​លុយខុស​ច្បាប់​ ដែល​ការណ៍​នេះ​តម្រូវ​ឲ្យ​មាន​ចំណាត់ការ​ និង​ការ​ប្រើប្រាស់​ធនធាន​ប្រកប​ដោយ​ប្រសិទ្ធ​ភាព​ពី​សំ​ណាក់​អាជ្ញាធរ​កម្ពុជា៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG