សមាគមអ្នកសារព័ត៌មានកម្ពុជា-ចិន ត្រូវបង្កើតជាលើកដំបូងនៅកម្ពុជា ដែលមន្ត្រីរដ្ឋាភិបាលរំពឹងថា សមាគមថ្មីនេះនឹងជំរុញឲ្យមានការផ្សាយព័ត៌មានល្អៗពីជនជាតិចិន និងជួយពង្រឹងដល់ទំនាក់ទំនងរវាងកម្ពុជាចិនឲ្យកាន់តែប្រសើរឡើងជាបន្ថែមទៀត។
ក្នុងពិធីសម្ពោធ សមាគមអ្នកសារព័ត៌មានកម្ពុជា-ចិន កាលពីល្ងាចថ្ងៃចន្ទ លោក ខៀវ កាញារីទ្ធ រដ្ឋមន្រ្តីក្រសួងព័ត៌មានថ្លែងថា ការបង្កើតសមាគមនេះ គឺបង្ហាញអំពីការបង្កើតទំនាក់ទំនាក់កាន់តែរឹងមាំថែមទៀតរវាងភាគីចិន និងកម្ពុជា។ ហើយលោកសង្ឃឹមថា សមាគមនេះនឹងជួយឲ្យមានការផ្សព្វផ្សាយព័ត៌មានល្អៗអំពីវត្តមានរបស់ជនជាតិចិនដែលកន្លងមកមានការផ្សព្វផ្សាយរិះគន់ច្រើនអំពីភាពអវិជ្ជមានរបស់ពួកគេ។
លោករដ្ឋមន្ត្រីថ្លែងថា៖
«លោកសហប្រធានអម្បាញ់មិញក៏មានប្រសាសន៍ហើយថា មានជនជាតិចិន អ្នកវិនិយោគចិនជាច្រើនដែលបានធ្វើអំពើល្អនៅកម្ពុជា ប៉ុន្តែការផ្សព្វផ្សាយបែរជាការផ្សព្វផ្សាយពីអំពើអាក្រក់របស់មនុស្សមួយចំនួនតូច ដែលធ្វើឲ្យមានកករល្អក់នៅក្នុងទំនាក់ទំនង និងការយល់ដឹងអំពីជនជាតិចិននៅកម្ពុជា។ នេះជាគំនិតមួយដែលយើងត្រូវគិតថា ត្រូវតែនាំគ្នាកម្ចាត់ឲ្យបាន។ មិនមែនយើងលាក់អំពើអាក្រក់ទេ ប៉ុន្តែមានអំពើល្អច្រើនណាស់ដែលយើងអាចនិយាយបាន»។
សមាគមអ្នកសារព័ត៌មានកម្ពុជា-ចិន ត្រូវបានទទួលស្គាល់ជាផ្លូវការពីរដ្ឋមន្រ្តីក្រសួងព័ត៌មាន លោក ខៀវ កាញារីទ្ធ កាលពីថ្ងៃទី៣០ ខែមករា ឆ្នាំ២០១៩។ សមាគមនេះមានលោក សយ សុភាព អគ្គនាយកសារព័ត៌មានដើមអម្ពិល ជាសហប្រធានជាមួយលោក លីវ សៀវគ័ង (Liu Xiao Guang)។
មានអ្នកចូលរួមក្នុងពិធីសម្ពោធសមាគមនេះជាផ្លូវការមានប្រមាណជាង៣០០នាក់ ដែលមកពីស្ថាប័នព្រឹទ្ធសភា រដ្ឋសភា រាជរដ្ឋាភិបាល ប្រធានរាជបណ្ឌិត្យសភា តំណាងសភាពាណិជ្ជកម្មចិនជាដើម។ នេះបើតាមការផ្សាយលើគេហទំព័រព័ត៌មានដើមអម្ពិលរបស់លោក សយ សុភាព។
លោក សយ សុភាព សហប្រធានសមាគមអ្នកសារព័ត៌មានកម្ពុជា-ចិន ប្រាប់ VOA នារសៀលថ្ងៃអង្គារនេះថា សមាគមនេះបង្កើតឡើងក្នុងគោលបំណងទប់ស្កាត់ព័ត៌មានក្លែងក្លាយ និងព័ត៌មានដែលធ្វើឲ្យប៉ះពាល់ដល់មុខមាត់ប្រទេស និងទំនាក់ទំនងកម្ពុជាចិន ដោយលោកបញ្ជាក់ថា៖
«ជារបៀបព័ត៌មានមួយដែលធ្វើឲ្យប៉ះពាល់ទៅដល់មុខមាត់ កិត្តិយសប្រទេសជាតិយើង ដោយសារតែការចុះដោយលក្ខណៈហួសហេតុ មើលមកគឺចង់វាយពន្លិច សមាគមហ្នឹង គឺយើងត្រូវតែផ្សព្វផ្សាយធ្វើយ៉ាងម៉េចឲ្យគេឃើញហេតុនិងផល។ បទពិសោធន៍គេហៅថា ភាគីមួយអមិត្តនឹងភាគីមួយ គេតែងតែវាយធ្វើម៉េចឲ្យភាគីហ្នឹងអាក្រក់។ តែសម្រាប់យើងអត់ទេ គឺព្យាយាមបង្ហាញហេតុ និងផល ហើយសម្រាប់អ្នកអានអ្នកទស្សនាគេពិចារណា»។
លោក សយ សុភាព បន្ថែមថា សមាគមអ្នកសារព័ត៌មានកម្ពុជាចិននេះមិនទាន់មានសមាជិកគន្លឹះនៅឡើយ។ ហើយសមាគមក៏មិនមានកញ្ចប់ថវិកាណាមួយសម្រាប់ដំណើរការនោះដែរ។
ការបង្កើតសមាគមអ្នកសារព័ត៌មានកម្ពុជា-ចិននេះ ធ្វើឡើងស្របពេលដែលទំនាក់ទំនងរវាងរដ្ឋាភិបាលកម្ពុជា និងចិនកាន់តែមានភាពស្អិតរមួត និងខណៈដែលសារព័ត៌មានឯករាជ្យ និងវិជ្ជាជីវៈជាច្រើនត្រូវបានបិទ និងផ្លាស់ប្តូរម្ចាស់គ្រប់គ្រង។
លោក ណុប វី នាយកផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ថ្លែងថា លោកសាទរចំពោះការបង្កើតសមាគមព័ត៌មានថ្មីៗនៅកម្ពុជា។ លោកបន្តថា ទន្ទឹមនឹងការសាទរ លោករំពឹងថា សមាគមនេះនឹងមិនធ្វើឲ្យអ្នកសារព័ត៌មានឯករាជ្យដែលរាយការណ៍រិះគន់អំពីសកម្មភាពចិន ឬទំនាក់ទំនងកម្ពុជាចិន រងសម្ពាធណាមួយនោះទេ។
សន្ទស្សន៍ស្ដីពីសេរីភាពសារព័ត៌មានលើពិភពលោកឆ្នាំ២០១៩ របស់អ្នកសារព័ត៌មានគ្មានព្រំដែន (Reporters Without Borders) បង្ហាញថា សេរីភាពសារព័ត៌មាននៅកម្ពុជាក្នុងឆ្នាំ២០១៨ អាក្រក់ជាងឆ្នាំ២០១៧មួយកម្រិត ដោយសារគណបក្សកាន់អំណាចព្យាយាមកម្ចាត់ប្រព័ន្ធផ្សព្វផ្សាយដែលរិះគន់ខ្លួន។ របាយការណ៍ដដែលក៏បានបង្ហាញថា ការរឹតត្បិតសេរីភាពសារព័ត៌មានត្រូវបានពង្រីកនៅកម្ពុជា ដោយសាររងឥទ្ធិពលពីប្រទេសចិនផងដែរ។ យ៉ាងណាក្តី មន្រ្តីជាន់ខ្ពស់ក្រសួងព័ត៌មានកម្ពុជាបានច្រានចោលរបាយការណ៍នេះថាមិនបានឆ្លុះបញ្ចាំងពីការពិត៕
