ការស្ទាបស្ទង់មតិមួយដែលត្រូវបានធ្វើឡើងដោយអង្គការសិទ្ធិមនុស្សមួយ និយាយថា ប្រជាពលរដ្ឋឥណ្ឌូនេស៊ីភាគច្រើន ជំទាស់ទៅនឹងការប្រើប្រាស់អំពើហឹង្សាប្រឆាំងទៅនឹងអ្នកកាន់សាសនាអ៊ីស្លាមភាគតិចនិកាយ អាហ្សម៉ាឌីយ៉ាហ៍ (Ahmadiyah)។ ប៉ុន្តែ បន្ទាប់ពីមានការការកាត់ទោសកម្រិតស្រាលលើក្រុមមូស្លីមគម្ពីជ្រុលនិយម ចំពោះការជាប់ពាក់ព័ន្ធរបស់ពួកគេនៅក្នុងការវាយប្រហារប្រកបដោយគ្រោះថ្នាក់ដល់ជីវិតមួយ ប្រឆាំងនឹងនិកាយនេះហើយ អ្នកគោរពជំនឿសាសនានិកាយ អាហ្សម៉ាឌីយ៉ាហ៍ មានការភ័យខ្លាចថា ការធ្វើទុក្ខបុកម្នេញផ្នែកសាសនាប្រឆាំងនឹងក្រុមអ្នកកាន់សាសនាភាគតិច នឹងកាន់តែមានសភាពអាក្រក់ឡើងៗ។
ការបួងសួងនៅឯព្រះវិហារ អាល់ហ៊ីដាយ៉ាហ៍ អាហ្សម៉ាឌីយ៉ាហ៍ (Al-Hidayah Ahmadiyah) នៅក្នុងរដ្ឋធានី ហ្សាកាតា (Jakarta) នៅតែទាក់ទាញអ្នកគោរពប្រតិបត្តិតាមរាប់រយនាក់។ ប៉ុន្តែ ឥឡូវនេះ មានក្រុមប៉ូលីសជាច្រើនបានបោះទីតាំងនៅខាងមុខព្រះវិហារ ដើម្បីការពារប្រឆាំងទៅនឹងលទ្ធភាពនៃការវាយប្រហារណាមួយ ពីសំណាក់ក្រុមអ៊ីស្លាមដែលនិយមគម្ពីជ្រុលហួសហេតុ។
ខណៈពេលដែលអ្នកកាន់សាសនានិកាយ អាហ្សម៉ាឌីយ៉ាហ៍ (Ahmadiyah) ចាត់ទុកខ្លួនឯងថាជាជនម៉ូស្លីម ពួកគេមិនត្រូវបានទទួលស្គាល់ពីសំណាក់អ្នកកាន់សាសនាអ៊ីស្លាមភាគច្រើននោះទេ ពីព្រោះពួកគេមិនជឿថា ព្យាការី មហាមាត់ (Prophet Muhammad) ជាព្យាការីចុងក្រោយបំផុតទេ។ សមាជិកនិកាយនេះចំនួនពីរសែននាក់នៅក្នុងប្រទេសឥណ្ឌូនេស៊ី បានទទួលសេចក្តីអនុញ្ញាតឱ្យអនុវត្តនូវជំនឿរបស់ពួកគេ ប៉ុន្តែចាប់តាំងពីឆ្នាំ២០០៨មក ពួកគេត្រូវបានហាមឃាត់មិនឱ្យធ្វើការជ្រើសរើសសមាជិកថ្មីបន្ថែមទៀតទេ។
ការវាយប្រហារប្រកបដោយគ្រោះថ្នាក់ដល់ជីវិតមួយ នៅក្នុងខែកុម្ភៈ ដោយក្រុមអ៊ីស្លាម និយមគម្ពីជ្រុល នៅក្នុងទីក្រុង ស៊ីគីស៊ីក (Cikesik) នៅកោះហ្យាវ៉ា (Java)ភាគខាងលិច ដែលបានសម្លាប់សមាជិកនិកាយ អាហ្សម៉ាឌីយ៉ាហ៍ (Ahmadiyah) ចំនួនបីនាក់ ត្រូវបានអ្នកគោរពប្រតិបត្តិនិកាយ អាហ្សម៉ាឌីយ៉ាហ៍ ម្នាក់ ថតជាខ្សែអាត់វីដេអូដោយសម្ងាត់។ ខ្សែអាត់វីដេអូបានបង្ហាញឱ្យឃើញហ្វូងមនុស្សមួយក្រុមប្រហែលជាមួយពាន់នាក់ ដែលមួយចំនួនមានប្រដាប់ដោយដំបងនិងពូថៅ។ ពីដំបូង ពួកគេបានគប់ដុំថ្ម ហើយបន្ទាប់មកបានដេញតាមនិងវាយសមាជិកនិកាយ អាហ្សម៉ាឌីយ៉ាហ៍ (Ahmadiyah) រហូតដល់ស្លាប់។ អំពើឃោរឃៅនៅក្នុងខ្សែអាត់វីដេអូ បាននាំឱ្យមានការផ្កោលទោសនៅទូទាំងសាកលលោក ហើយរដ្ឋាភិបាលបានសន្យាថា នឹងនាំអ្នកដែលទទួលខុសត្រូវចំពោះអំពើហឹង្សានេះមកកាត់ទោស។
សមាជិករបស់និកាយ អាហ្សម៉ាឌីយ៉ាហ៍ (Ahmadiyah) ឈ្មោះ អាហ្សម៉ាត់ ម៉ាស៊ីហ៊ូដឌីន (Ahmad Masihuddin) ស្ថិតនៅក្នុងចំណោមអ្នកដែលត្រូវគេវាយប្រហារ នៅក្នុងភូមិ ស៊ីគីស៊ីក (Cikesik)។ លោកនិយាយថា លោកនិងមិត្តភក្តិពីរនាក់ព្យាយាមរត់គេចនិងលាក់ខ្លួន ប៉ុន្តែត្រូវគេចាប់ខ្លួន។ លោកត្រូវបានគេសម្រាតខោអាវនិងវាយដំ។ លោកនិយាយថា មិត្តភក្តិរបស់លោកពីរនាក់ត្រូវបានសម្លាប់។
លោកនិយាយថា លោកត្រូវបានវាយនឹងដំថ្មដ៏ធំមួយ ហើយក៏សន្លប់បាត់ស្មារតីទៅ។ លោកនិយាយថា ពួកគេបាននាំយកមិត្តភក្តិរបស់លោកទៅ ហើយលោកមិនដឹងថា មិត្តភក្តិរបស់លោកត្រូវបានគេកាប់ឬវាយនោះទេ ប៉ុន្តែអ្នកទាំងពីរត្រូវបានគេអូសទាញទៅទិសដៅផ្សេងគ្នា។
ប្រទេសឥណ្ឌូនេស៊ីមានប្រពៃណីដ៏យូរលង់មួយនៃភាពផ្សេងគ្នាខាងសាសនា សេចក្តីត្រាប្រណី។ ការស្ទាបស្ទង់មតិនាពេលថ្មីៗមួយ ដោយវិទ្យាស្ថាន សេតារ៉ា (Setara Institute) សម្រាប់សេរីភាពនិងលទ្ធិប្រជាធិបតេយ្យ នៅក្នុងរដ្ឋធានី ហ្សាកាតា (Jakarta) បានបង្ហាញថា ប្រជាពលរដ្ឋឥណ្ឌូនេស៊ីចំនួន ៨០ភាគរយ មិនយល់ស្របចំពោះអំពើហឹង្សាប្រឆាំងនឹងនិកាយ អាហ្សម៉ាឌីយ៉ាហ៍ (Ahmadiyah) ទេ។
ប៉ុន្តែ ការវាយប្រហារទៅលើក្រុមអ្នកកាន់សាសនានិកាយភាគតិច បានកើនឡើងនៅក្នុងកំឡុងពេលប៉ុន្មានឆ្នាំថ្មីៗនេះ។ អង្គការឃ្លាំមើលសិទ្ធិមនុស្ស Human Rights Watch និយាយថា កាលពីឆ្នាំទៅ មានសកម្មភាពហឹង្សាយ៉ាងតិចណាស់ចំនួន៥០ករណី ដែលត្រូវបានប្រព្រឹត្តឡើងប្រឆាំងនឹង សមាជិកនៃនិកាយសាសនា អាហ្សម៉ាឌីយ៉ាហ៍ (Ahmadiyah) នៅក្នុងប្រទេសឥណ្ឌូនេស៊ី។
រដ្ឋាភិបាលមិនបានធ្វើការឆ្លើយតបខ្លាំងក្លាណាមួយ ទៅនឹងអំពើហឹង្សានេះទេ។ កាលពីដើមឆ្នាំនេះ តុលាការមួយបានកាត់ទោសក្រុមម៉ូស្លីមនិយមជ្រុលចំនួន១២នាក់ ដែលបានចូលរួមនៅក្នុងការវាយប្រហារដោយហ្វូងមនុស្ស ឱ្យជាប់គុករយៈពេលតែ ៦ខែ ប៉ុណ្ណោះ។ មេដឹកនាំនិកាយ អាហ្សម៉ាឌីយ៉ាហ៍ (Ahmadiyah) មួយរូប ដែលបានបដិសេធមិនព្រមចាកចេញពីទីកន្លែងនៃការវាយប្រហារដោយហ្វូងមនុស្ស និងដែលបានវាយទៅលើមេដឹកនាំក្រុមនេះមួយរូប ក៏ត្រូវបានកាត់ទោសឱ្យជាប់គុករយៈពេល៦ខែផងដែរ។
ម៉ាស៊ីហ៊ូដឌីន (Masihuddin) និយាយថា លោកមានការខឹងសម្បារនិងមានការខកចិត្តចំពោះសាលក្រមនេះ។
លោកនិយាយថា សូម្បីតែមនុស្សដែលមិនចេះច្បាប់ក៏នឹងនិយាយថា សាលក្រមនេះគឺអយុត្តិធម៌។ វាពិតជាទង្វើគ្មានអារ្យធម៌ ហើយនេះមិនមែនជាសាសនាឥស្លាមទេ។
ជនរងគ្រោះម្នាក់ទៀតនៃការវាយប្រហារឈ្មោះ រីហ្សគី (Rizki) បានបន្ទោសក្រុមជ្រុលនិយមតូចមួយចំពោះអំពើហឹង្សានេះ ប៉ុន្តែបានដាក់រដ្ឋាភិបាលឱ្យទទួលខុសត្រូវ ចំពោះបរាជ័យនៅក្នុងការការពារក្រុមអ្នកកាន់សាសនាភាគតិច។
លោកនិយាយថា ប្រទេសរបស់លោកគាំទ្រសិទ្ធិមនុស្ស សេរីភាព និងសិទ្ធិក្នុងការជ្រើសរើសសាសនា ប៉ុន្តែឯណាទៅសិទ្ធិទាំងអស់នោះសម្រាប់ក្រុមនិកាយ អាហ្សម៉ាឌីយ៉ាហ៍ (Ahmadiyah)? លោកនិយាយថា សិទ្ធិទាំងនោះមិនបានអនុវត្តជាមួយពួក អាហ្សម៉ាឌីយ៉ាហ៍ ទេ។
លោក អាហ្សីយូម៉ារឌី អាហ្រា (Azyumardi Azra) សាស្រ្តាចារ្យប្រវត្តិវិទ្យានៃសាកលវិទ្យាល័យអ៊ីស្លាមរបស់រដ្ឋ បាននិយាយថា ប៉ូលីសនិងមន្រ្តីរដ្ឋាភិបាលមួយចំនួន មានការស្ទាក់ស្ទើរនៅក្នុងការប្រតិបត្តិច្បាប់ ដើម្បីការពារក្រុមអ្នកកាន់សាសនាភាគតិច ពីព្រោះពួកគេមានសមានចិត្តចំពោះក្រុមម៉ូស្លីមគម្ពីជ្រុលនិយម ឬពឹងផ្អែកទៅលើពួកគេដើម្បីទទួលបានការគាំទ្រផ្នែកនយោបាយ។
«រាល់ករណីទាំងអស់នេះគឺពាក់ព័ន្ធជាមួយនឹងថ្នាក់ដឹកនាំ។ ខ្ញុំគិតថា ការអនុវត្តច្បាប់នៅមានកម្រិតទាបណាស់ តាមពិតទៅ វាមិនមែនជាបញ្ហាច្បាប់ខ្លួនឯងនោះទេ»។
លោកនិយាយថា ក្រុមមេដឹកនាំសាសនាអ៊ីស្លាមនិងក្រុមមន្រ្តីរដ្ឋាភិបាល ត្រូវតែបញ្ចេញទស្សនៈ ដើម្បីផ្តន្ទាទោសចំពោះអំពើហឹង្សាផ្នែកសាសនា និងចាត់វិធានការប្រឆាំងនឹងក្រុមហឹង្សាជ្រុលនិយម ដើម្បីការពារកុំឱ្យមានការវាយប្រហារផ្សេងៗទៀត ដែលអាចបំផ្លាញដល់ស្ថិរភាពនិងលទ្ធិប្រជាធិបតេយ្យរបស់ឥណ្ឌូនេស៊ី៕
ប្រែសម្រួលដោយ ឌី ខាំបូលី
