សៀវភៅរឿងកំប្លែងថ្មីៗជាបន្តបន្ទាប់កំពុងត្រូវបានបង្ហាញជូននៅប្រទេសឥណ្ឌូនេស៊ី ដើម្បីលើកកម្ពស់ភាពទីទៃពីគ្នានិងការអធ្យាស្រ័យគ្នា។ ក្រុមមនុស្សដែលស្ថិតនៅពីខាងក្រោយការបង្កើតសៀវភៅកំប្លែង ថ្លែងថា សៀវភៅទាំងនេះជាវិធីសាស្រ្តបង្កើតថ្មីនិងមានប្រសិទ្ធិភាព ដើម្បីប្រយុទ្ធប្រឆាំងនឹងសារដែលគ្មានការអធ្យាស្រ័យពីក្រុមអ៊ីស្លាមជ្រុលនិយម។
សៀវភៅរឿងកំប្លែងដែលទើបចេញផ្សាយកាលពីពេលថ្មីៗនេះ នៅឥណ្ឌូនេស៊ី បង្ហាញរឿងពិតស្តីពីថាតើ លោក ណាសៀរ អាបាស់ (Nasir Abas) ដែលបានកើតនៅប្រទេសម៉ាឡេស៊ី លែងចូលចិត្តចលនាក្រុមអ៊ីស្លាមនិយមមូលវិវត្តយ៉ាងដូចម្តេច។ ផ្ទាំងចម្រុះពណ៌ប្រាប់អំពីថាតើលោក អាបាស់ បានប្រយុទ្ធនៅក្នុងប្រទេសអាហ្វកានីស្ថានប្រឆាំងនឹងសហភាពសូវៀត ហើយបានបន្តក្លាយជាមេដឹកនាំបណ្តាញភេរវកម្ម ជើម៉ា អ៊ីស្លាម៉ីយ៉ា (Jemaah Islamiyah) ប្រចាំនៅតំបន់អាស៊ីអគ្នេយ៍ទៀតផង។ លោក អាបាស់ បាននិយាយថា សេចក្តីសម្រេចចិត្តរបស់ក្រុមនេះក្នុងការកំណត់មុខសញ្ញាលើជនស៊ីវិលស្លូតត្រង់ ដោយចាប់ផ្តើមដោយការបំផ្ទុះគ្រាប់បែកនៅកោះបាលីក្នុងឆ្នាំ២០០២ ដែលបានសម្លាប់មនុស្សជាង២០០នាក់ បាននាំឲ្យលោកមានការផ្លាស់ប្តូរចិត្តគំនិត។
«ដូច្នេះការបំផ្ទុះគ្រាប់បែកនោះធ្វើឲ្យខ្ញុំមានអារម្មណ៍មិនល្អ។ ខ្ញុំមិនយល់ស្របជាមួយប្រតិបត្តិការបែបនោះនៅក្នុងតំបន់មានជនស៊ីវិល ដោយសារតែវាផ្ទុយពីការយល់ដឹងរបស់ខ្ញុំ។ វាផ្ទុយពីពាក្យរបស់ជីហាឌ (Jihad)»។
ឥឡូវនេះ លោក អាបាស់ ជាអ្នកគាំពារមតិសម្រាប់ការអធ្យាស្រ័យខាងផ្នែកសាសនា ហើយសហការជាមួយអាជ្ញាធរដើម្បីកសាងឡើងវិញនូវក្រុមអ៊ីស្លាមនិយមមូលវិវត្ត។
«ខ្ញុំជាអ្នកកាន់សាសនាអ៊ីស្លាម។ ខ្ញុំមានកាតព្វកិច្ចផ្ទាល់ខ្លួនរបស់ខ្ញុំ ហើយកាតព្វកិច្ចមួយនោះគឺត្រូវប្រាប់ពីអំពើល្អ ហើយហាមឃាត់នូវរាល់អំពើអាក្រក់។ ដូច្នេះ ខ្ញុំមានការទទួលខុសត្រូវមួយដើម្បីរារាំងមិត្តភក្តិរបស់ខ្ញុំមិនឲ្យធ្វើអំពើអាក្រក់»។
លោក អាបាស់ មានប្រសាសន៍ថា លោកចូលចិត្តអំពីរបៀបដែលសៀវភៅរឿងកំប្លែងបង្ហាញអំពីជីវិត និងសាររបស់លោកដែលធ្វើឲ្យយុវវ័យមានការចាប់អារម្មណ៍។
រឿងរ៉ាវរបស់លោកស្ថិតក្នុងចំណោមរឿងកំប្លែងជាច្រើន ដែលជំរុញឲ្យមានការអធ្យាស្រ័យ ដែលនឹងត្រូវបានចេញផ្សាយនៅឥណ្ឌូនេស៊ី។ នៅឯសាលារៀនអ៊ីស្លាម អាសស្សីឌីគីយ៉ះ (Ash-Shidiqiyah) ខាងក្រៅទីក្រុងហ្សាកាតា និស្សិតវ័យជំទង់កំពុងត្រូវបានណែនាំឲ្យស្គាល់ពីសៀវភៅកំប្លែងមួយឈុតទៀត ដែលផ្តោតទៅលើដំណើរផ្សងព្រេងរបស់និស្សិត ហើយនិងរបៀបដែលពួកគេត្រូវដោះស្រាយជាមួយមនុស្សដែលគរចាត់ទុកជាតួយ៉ាងនិងព័ត៌មានមិនពិតយ៉ាងដូចម្តេច។
ប្រតិកម្មភ្លាមៗពីសំណាក់ក្រុមនិស្សិតមានភាពវិជ្ជមាន។ លោក មហាម៉ាត់ ហ្វូហ្សី (Mohammad Fauzi) ថ្លែងថា លោកពេញចិត្តនិងសារប្រកបដោយសីលធម៌នៅក្នុងចំណុចសំខាន់នៃសាច់រឿងនេះ។
លោកនិយាយថា មេរៀននេះគឺត្រូវលើកសរសើរពីភាពខុសគ្នា ហើយដឹងថាអ្នកមិនអាចប្រយុទ្ធគ្នាទៅវិញទៅមកដោយសារតែអ្នកមានភាពខុសប្លែកគ្នានោះឡើយ។
កញ្ញា ស្សីឡា (Sheila) មានអាយុ១៦ឆ្នាំ បានឲ្យដឹងទៀតថា កញ្ញាចូលចិត្តអំពីរបៀបដែលសៀវភៅរឿងកំប្លែងផ្តោតទៅលើជនអ៊ីស្លាមវ័យក្មេង ដូចជារូបកញ្ញាផ្ទាល់ ដែលប្រឈមមុខនឹងទ្វេរគ្រោះនៃក្រមសីលធម៌។
កញ្ញានិយាយថា ជាធម្មតា រឿងកំប្លែងនិយាយតែពីសាច់រឿងស្នេហា ឬនិយាយអំពីវីរៈជនសកម្ម ដែលភាគច្រើនមកពីប្រទេសជប៉ុន។ កញ្ញាបន្ថែមទៀតថា រឿងកំប្លែងនេះមានចំណុចចំណេះដឹង និងខ្លឹមសារនៃសីលធម៌នៅក្នុងផ្ទៃរឿងនោះ។
មានការកើនឡើងនូវអំពើហិង្សាប្រឆាំងក្រុមជនជាតិភាគតិចសាសនានៅឥណ្ឌានេស៊ី។ ខណៈពេលដែលសម្លេងភាគតិចរបស់ក្រុមជ្រុលនិយមអ៊ីស្លាមត្រូវបានបន្ទោសជារឿយៗពីបទញុះញុងឲ្យមានការមិនអធ្យាស្រ័យ មានការព្រួយបារម្ភថា ជនអ៊ីស្លាមនិយមកណ្តាលភាគច្រើនមិនបានធ្វើកិច្ចការឲ្យបានច្រើនល្មមដើម្បីយកឈ្នះចិត្តគំនិតរបស់យុវវ័យឡើយ។
អង្គការដោះស្រាយជម្លោះអន្តរជាតិឈ្មោះ «ការស្វែងរកមូលដ្ឋានរួមគ្នា» (Search For Common Ground) បានសរសេររឿងកំប្លែងស្តីពីការអធ្យាស្រ័យគ្នា។ លោក អេហ្គើស ណារ៉ូវី (Agus Nahrowi) ដែលជាគ្រូឬអ្នកបណ្តុះបណ្តាលនៅក្នុងក្រុមនោះ និយាយថា សៀវភៅរឿងកំប្លែងជាវិធីសាស្ត្របង្កើតថ្មីដើម្បីធ្វើឲ្យសម្លេងអ៊ីស្លាមនិយមកណ្តាលមានគេស្តាប់ឭ។
«វាជាការសាកសមណាស់ក្នុងការនិយាយថា វាជាការពិបាកចំពោះការផ្លាស់ប្តូរឥរិយាបថ និងផ្លាស់ប្តូរចិត្តគំនិត។ ប៉ុន្តែសម្រាប់ចំណុចចាប់ផ្តើមក្នុងការផ្លាស់ប្តូរការយល់ដឹងរបស់ពួកគេ ការលើកកម្ពស់ការយល់ដឹង យុទ្ធនាការនេះគឺមានសារៈសំខាន់យ៉ាងខ្លាំង»។
គម្រោង «ការស្វែងរកមូលដ្ឋានរួមគ្នា» ត្រូវបានទទួលការគាំទ្រមួយផ្នែកពីសំណាក់ក្រសួងការបរទេសសហរដ្ឋអាមេរិក។ ក្រុមនេះកំពុងគ្រោងនឹងបែងចែកសៀវភៅរឿងកំប្លែងចំនួន៦ម៉ឺនក្បាលទៅឲ្យសាលារៀនអ៊ីស្លាមនៅទូទាំងប្រទេសឥណ្ឌូនេស៊ី៕
ប្រែសម្រួលដោយ លី សុខឃាង
