ក្រុមបេក្ខជនប្រធានាធិបតីឥណ្ឌូណេស៊ីបានជជែកដេញដោលគ្នាលើកទី ២ កាលពីថ្ងៃអាទិត្យ ទី ៧ ខែមករា ដើម្បីពិភាក្សាគ្នាអំពីបញ្ហាការការពារជាតិ ភូមិសាស្ត្រនយោបាយនិងការទូត។
រដ្ឋមន្ត្រីការពារជាតិលោក Prabowo Subianto អតីតអភិបាលខេត្តជ្វាកណ្តាល (Central Java) លោក Ganjar Pranowo និងលោក Anies Baswedan អតីតអភិបាលក្រុងហ្សាការតានឹងប្រកួតប្រជែងគ្នានៅក្នុងការបោះឆ្នោតនៅថ្ងៃទី ១៤ ខែកុម្ភៈ ដើម្បីដឹកនាំប្រទេសឥណ្ឌូណេស៊ីដែលជាប្រទេសជាតិប្រជុំកោះធំបំផុតក្នុងពិភពលោក។
មនុស្សជិត ២០៥ លាននាក់ មានសិទ្ធិបោះឆ្នោតក្នុងគោលដៅជ្រើសរើសអ្នកបន្តតំណែងពីលោកប្រធានាធិបតី Joko Widodo ក្រោយអាណត្តិ ១០ ឆ្នាំ របស់លោក។
អ្នកនាំមុខគេគឺលោក Subianto បាននិយាយថា ប្រសិនបើលោកជាប់ឆ្នោត លោកនឹងថែរក្សាទំនាក់ទំនងវិជ្ជមានជាមួយមហាអំណាចសាកលទាំងអស់តាមរយៈគោលនយោបាយការបរទេស «មិនចូលបក្សសម្ព័ន្ធមិត្ត» របស់ឥណ្ឌូណេស៊ី។
លោកបានថ្លែងនៅក្នុងការជជែកដេញដោលគ្នាផ្សាយតាមកញ្ចក់ទូរទស្សន៍ឥណ្ឌូណេស៊ីថា៖ «ដោយមានទំនាក់ទំនងល្អជាមួយមហាអំណាចទាំងអស់ យើងអាចធានារ៉ាប់រងផលប្រយោជន៍ជាតិរបស់យើង។ មានមិត្តមួយពាន់នាក់ដូចជាតិចពេក មានសត្រូវតែមួយគឺច្រើនពេក។ យើងនឹងបន្តគោលនយោបាយជាអ្នកជិតខាងល្អ»។
អតីតឧត្ដមសេនីយ៍នៃកងកម្លាំងពិសេសរូបនេះបានសង្កត់ធ្ងន់លើសារៈសំខាន់នៃការបង្កើនកម្លាំងយោធាដើម្បីការពារឯករាជ្យ ដោយលោកបានសម្ដែងកង្វល់អំពីស្ថានការណ៍ស្រដៀងនឹងស្ថានភាពដែលតំបន់ហ្កាហ្សាប្រឈមនៅក្នុងសង្គ្រាមរវាងអ៊ីស្រាអែលនិងក្រុមហាម៉ាស់។
ប្រទេសឥណ្ឌូណេស៊ីជាអ្នកគាំទ្រខ្ជាប់ខ្ជួនដល់ឯករាជ្យប៉ាឡេស្ទីន។ ប្រទេសនេះបានអំពាវនាវឱ្យមានដំណោះស្រាយជម្លោះនេះ ផ្អែកលើលក្ខណៈវិនិច្ឆ័យកំណត់ដោយអង្គការសហប្រជាជាតិ ដែលមានរួមការដោះស្រាយដោយបង្កើតរដ្ឋពីរ។
លោក Pranowo បានផ្តល់ចំណុចសំខាន់ៗនៃសំណើមួយសម្រាប់ឱ្យមានកិច្ចព្រមព្រៀងបណ្ដោះអាសន្នមួយអំពីសមុទ្រចិនខាងត្បូងដែលមានជម្លោះ ដោយលោកបានគូសបញ្ជាក់ឋានៈរបស់ឥណ្ឌូណេស៊ីដែលមិនមែនជាភាគីក្នុងជម្លោះទាមទារទឹកដីក្នុងតំបន់នោះទេ។
លោកបានថ្លែងថា កិច្ចព្រមព្រៀងបណ្ដោះអាសន្ននេះជាការចាំបាច់នៅពេលចិនកំពុងធ្វើទំនើបកម្មយោធា ដែលត្រូវរំពឹងថានឹងចប់រួចរាល់ត្រឹមឆ្នាំ ២០២៧។
លោកបានថ្លែងថា៖ «មានការប្រឹងប្រែងឱ្យមានដំណោះស្រាយជាង ២០ ឆ្នាំមកហើយ តែគ្មានការជឿនលឿនសោះ»។
លោកក៏បាននិយាយអំពីសេចក្ដីត្រូវការពង្រឹងការយាមល្បាតដោយកងទ័ពជើងទឹកឥណ្ឌូណេស៊ីផងដែរ។
លោកថា៖ «យើងត្រូវការនាវាផ្ទុកប្រេងឥន្ធនៈអណ្ដែតដែលកងទ័ពជើងទឹក យើងអាចប្រើប្រាស់សម្រាប់យាមល្បាត។ ការណ៍នេះធ្វើឱ្យវិស័យភ័ស្តុភារអស់សោហ៊ុយតិច។
លោក Baswedan វិញ បានលើកពីបញ្ហាគំរាមកំហែងបែបថ្មីនានា ដូចជាកំណើនឧប្បត្តិហេតុនៃការលួចចូលក្នុងអ៊ីនធឺណិត ឬ hacking ដោយលោកបានសន្យាបង្កើតប្រព័ន្ធការពារបណ្តាញអ៊ីនធឺណិត។
លោកបាននិយាយថា៖ «គន្លឹះមិនមែនផ្អែកលើតែបច្ចេកវិទ្យាប៉ុណ្ណោះទេ។ សារៈសំខាន់អាស្រ័យលើការពាក់ព័ន្ធដ៏ទូលំទូលាយរបស់មនុស្សគ្រប់គ្នា»។
លោកក៏បានថ្លែងដែរថា លោកនឹងធ្វើឱ្យឥណ្ឌូណេស៊ីក្លាយជាមេដឹកនាំមួយលើឆាកអន្តរជាតិ មិនមែនត្រឹមតែជា«អ្នកមើល»ប៉ុណ្ណោះ តាមរយៈអំណាចទន់របស់ខ្លួនដូចជាសិល្បៈជាដើម។
លោកបានបន្ថែមថា៖ «តាមរយៈការប្រឹងប្រែងទាំងនេះ យើងមានគោលដៅធ្វើឱ្យប្រជាពលរដ្ឋឥណ្ឌូណេស៊ីទៅជាម្ចាស់ផ្ទះមានការគួរសមនៅក្នុងប្រទេសខ្លួនផ្ទាល់និងជាភ្ញៀវរស់រាយនៅក្នុងប្រទេសឯទៀតៗ»។
លោក Subianto នាំមុខគូប្រជែងលោកក្នុងការស្ទង់មតិតាំងពីលោកបានជ្រើសរើសលោក Gibran Rakabuming Raka កូនប្រុសច្បងរបស់លោកប្រធានាធិបតី Joko Widodo ឱ្យធ្វើជាបេក្ខជនអនុប្រធានាធិបតីរបស់លោក។
លោក Pranowo មានការគាំទ្រលំដាប់ទីពីរ ឆ្ងាយក្រោយពីលោក Subianto។
ការស្ទង់មតិថ្មីៗបំផុតបង្ហាញថាលោក Baswedan ដែលមានលំដាប់ទីបី ប្រហែលមានឱកាសឈ្នះលោក Pranowo ហើយអាចមានការគាំទ្រលំដាប់ទីពីរក្នុងការបោះឆ្នោតលើកទីពីរ នៃប្រព័ន្ធបោះឆ្នោតពីរលើករបស់ឥណ្ឌូណេស៊ី៕
ប្រែសម្រួលដោយលោក ឈឹម សុមេធ
វេទិកាបញ្ចេញមតិ