រដ្ឋមន្ត្រីការពារជាតិឥណ្ឌូណេស៊ីលោក Prabowo Subianto និងបេក្ខជនអនុប្រធានាធិបតីរបស់លោកដែលត្រូវជាកូនប្រុសរបស់ប្រធានាធិបតីបានចុះឈ្មោះកាល ពីថ្ងៃពុធ ទី២៥ ខែតុលា កន្លងទៅនេះ សម្រាប់ការបោះឆ្នោតជ្រើស រើសប្រធានាធិបតីនៅឆ្នាំក្រោយ ការណ៍នេះជាការកំណត់នៃការចាប់ផ្តើមការប្រកួតប្រជែងតំណែងប្រធានាធិបតីដែលមានបេក្ខជនបីនាក់ចូលរួមដែលអតីតមេបញ្ជាការយោធារូបនេះ ត្រូវបានគេរំពឹងថានឹងឈ្នះ។
មួយភាគបីនៃប្រជាពលរដ្ឋឥណ្ឌូនេស៊ីដែលមានចំនួនជិត២០៥លាននាក់ ជាពលរដ្ឋដែលមានអាយុតិចជាង៣០ឆ្នាំ ដែលពួកគេមានសិទ្ធិបោះឆ្នោតជ្រើសរើសប្រធានា ធិបតីនិងអង្គនីតិបញ្ញត្តិនៅថ្ងៃទី១៤ ខែកុម្ភៈ ឆ្នាំក្រោយនៅក្នុងប្រទេសដែលកាន់លទ្ធិប្រជាធិបតេយ្យធំទីបីនៅលើពិភពលោក។
អ្នកគាំទ្ររាប់ពាន់នាក់បានជួបលោក Prabowo អាយុ៧២ ឆ្នាំនិងលោក Gibran Rakabuming Raka ដែលជាកូនប្រុសច្បងរបស់លោកប្រធានាធិបតី Joko Widodo ដែលនឹងចាកចេញពីតំណែង ស្របពេលដែលពួកគេទាំងពីរនាក់បានប្រគល់ប័ណ្ណសម្គាល់ខ្លួននិងគោលនយោបាយដល់មន្រ្តីទទួលបន្ទុកផ្នែកបោះឆ្នោតក្នុងរដ្ឋធានីហ្សាការតា។
លោក Prabowoបាននិយាយថា«យើងត្រៀមខ្លួនជាស្រេចដើម្បីឆ្ពោះទៅមុខជាមួយនឹងកម្មវិធីរបស់យើង ចក្ខុវិស័យដើម្បីបន្តការអភិវឌ្ឍន៍ ដូច្នេះឥណ្ឌូណេស៊ីអាចជាប្រ ទេសជឿនលឿននិងមានវិបុលភាព»។ លោកកំពុងប្រជែងតំណែងប្រធានាធិបតីជាលើកទីបី បន្ទាប់ពីចាញ់យ៉ាងតិចតួចក្នុងឆ្នាំ ២០១៤ និង២០១៩ ទៅលោក Widodo ដែលត្រូវបានគេស្គាល់ថាJokowi ដែលលោកមិនអាចឈរឈ្មោះបានម្តងទៀតដោយសារតែការកំណត់អាណត្តិ។
នៅក្នុងការស្ទង់មតិអតីតប្រធានកងកម្លាំងពិសេសលោក Prabowo មានការនាំមុខតិចតួចលើគូប្រជែងពីរនាក់ផ្សេងទៀត គឺអតីតអភិបាលខេត្ត លោក Ganjar Pranowo និងអតីតអភិបាលក្រុងហ្សាការតាលោក Anies Baswedan។
ការស្ទង់មតិដោយ Indikator Politik ដែលបានចេញផ្សាយកាលពីពេលថ្មីៗនេះ បានបង្ហាញថា៣៧%នៃ អ្នកឆ្លើយតបក្នុងចំណោមអ្នកចូលរួមដែលមានចំនួន៤.៣០០នាក់ បានគាំទ្រលោកPrabowo ខណៈដែលលោកGanjar វិញមានអ្នកគាំទ្រ៣៥% និងលោក Anies មាន២២% ។ ការស្ទង់មតិដែលបានធ្វើឡើងចាប់ពីថ្ងៃទី២ ដល់ថ្ងៃទី១០ ខែតុលាបានបង្ហាញថាជិត៧%មិនទាន់ធ្វើការសម្រេចចិត្តទេ។ នៅក្នុងទ្រឹស្តីគោល នយោបាយដែលមាន៨៨ទំព័រ លោក Prabowoបានសន្យាថានឹងជំរុញការសាងរដ្ឋធា នីថ្មីនៅលើកោះBorneo និងអភិវឌ្ឍឧស្សាហកម្មកែច្នៃរ៉ែក្នុងចំណោមគោលនយោ បាយសំខាន់ៗរបស់លោក Jokowi។
លោកក៏បានសន្យាផងដែរថានឹងរឹតបន្តឹងការហូរចូលនៃពលករបរទេស លុបបំបាត់ភាពក្រីក្រខ្លាំងក្នុងរយៈពេល ២ ឆ្នាំ និងបិទដំណើរការរោងចក្រថាមពលធ្យូងថ្ម និងពន្លឿនការកាត់បន្ថយការបញ្ចេញឧស្ម័នកាបូនិច។ លោកក៏បាននិយាយផងដែរថា លោកនឹងបង្កើនថវិកាការពារជាតិ និងធ្វើទំនើបកម្មផ្នែកសម្ភារយោធា។ លោកមិនបានផ្តល់ព័ត៌មានលម្អិតអំពីរឿងនេះទេ៕
ប្រែសម្រួលដោយអ្នកស្រី លី ម៉ូរីវ៉ាន់
