ប្រទេសឥណ្ឌូនេស៊ីនិយាយថា ខ្លួនបានប្រុងប្រៀបរួចហើយដើម្បីរៀបចំពិធីខួបលើកទី៦០ឆ្នាំនៃសន្និសីទកំពូលអាស៊ីនិងអាហ្វ្រិកដែលនឹងនាំគណៈប្រតិភូមកពីប្រទេសរាប់សិបទៅកាន់រដ្ឋធានីហ្សាការតានៅខែនេះ។
លោក Basuki Tjahaja អភិបាលក្រុងហ្សាការតាដែលគេស្គាល់ថា Ahok បានប្រាប់ក្រុមអ្នកយកព័ត៌មានកាលពីថ្ងៃព្រហស្បតិ៍ថា ការប្រុងប្រៀបរៀបចំកំពុងធ្វើឡើងដើម្បីបង្ហាញរដ្ឋធានីនេះ។
លោកនិយាយថា «យើងបានបោសសម្អាតផ្លូវក្រោមស្ពាន អាគារខុសច្បាប់ត្រូវបានកម្លេចចោល ហើយអ្នករស់នៅទីនោះត្រូវរើទៅកាន់កន្លែងរស់នៅសាធារណៈ»។
លោកអភិបាលក្រុងនិយាយបន្ថែមទៀតថា ក្នុងអំឡុងពិធីនេះគម្រោងសាងសង់ផ្លូវរទេះភ្លើងរដ្ឋធានីហ្សាការតាដែលត្រូវបានគេគិតថាអាក្រក់មើលនោះនឹងត្រូវគ្របដណ្តប់ពីលើដោយបដា។
ជំនួបភាគច្រើននឹងត្រូវធ្វើឡើងនៅរដ្ឋធានីហ្សាការតាដោយចាប់ផ្តើមពីថ្ងៃទី១៩ ខែមេសានេះ ក៏ប៉ុន្តែពិធីសំខាន់នឹងត្រូវធ្វើឡើងនៅទីក្រុងបានឌុងដែលនៅទីនោះសន្និសីទកំពូលលើកដំបូងបានត្រូវធ្វើឡើងនៅឯអាគារអាស៊ីអាហ្វិកក្នុងឆ្នាំ១៩៥៥។
លោក Ridwan Kamil អភិបាលក្រុងបានឌុងបានប្រាប់ក្រុមអ្នកយកព័ត៌មានថា ក្រុមវប្បធម៌ដ៏ធំមួយបានត្រៀមខ្លួនជាស្រេចហើយដើម្បីស្វាគមន៍ឥស្សរៈជនអន្តរជាតិដោយមានរបស់អនុស្សាវរីយ៍ពិសេស៕
