ភ្ជាប់​ទៅ​គេហទំព័រ​ទាក់ទង

​ឥណ្ឌូនេស៊ី​នឹង​ផ្អាក​​កាប់​ព្រៃឈើ​ ​​​ដើម្បី​បង្កើត​ឧស្សាហកម្ម​ប្រេង​ដូង​

  • Brian Padden
  • VOA

ដោយ BRIAN PADDEN ប្រែ​សម្រួល​ដោយ លី​ សុខឃាង។

ប្រទេស​ឥណ្ឌូនេស៊ីជា​ប្រទេស​បង្កើត​ឧស្ម័នផ្ទះ​កញ្ចក់​បំពុល​បរិស្ថាន ធំ​បំផុតទីបី ក្នុងពិភព​លោក​ ដែល​មួយ​ផ្នែក​ធំ បណ្តាល​មក​ពី ការដុត​ព្រៃ​ឈើដ៏​ធំ​ល្វឹង​ល្វើយ​របស់​ខ្លួន។ ឧស្ម័នផ្ទះ​កញ្ចក់មាន​ជាប់​ពាក់​ព័ន្ធនឹង​កំដៅ​ផែនដី​។

ភាគ​ច្រើន​នៃ​ព្រៃ​ឈើ​ ត្រូវ​បាន​កាប់​ដើម្បី​យក​កន្លែង​សម្រាប់​ដំណាំ​ដូង​ប្រេង​ថ្មី​ៗ។ តម្រូវ​ការ​ប្រេង​ដូងកំពុង​កើន​ឡើងនៅ​ក្នុង​ពិភព​លោក។ ដូង​ប្រេង ត្រូវ​បាន​ប្រើសម្រាប់ផលិតរបស់​របរផ្សេងៗ​ រាប់​ចាប់​តាំង​ពី​សាប៊ូ​ រហូត​ដល់​ឥន្ធនៈ​ផ្សេង​ៗ​ទៀ​ត។ មន្រ្តី​ឧស្សាហកម្ម​ និយាយ​ថា ផលិតកម្ម​ប្រេង​ដូង​ បានផ្តល់​ការ​ងារ​ឲ្យមនុស្ស​ប្រហែល​២​លាន​នាក់​ក្នុង​ប្រទេស​ឥណ្ឌូ​នេស៊ី ហើយ​ការ​នាំ​ចេញ​អាច​រក​ប្រាក់​បាន​ជាង​១០​ពាន់​លាន​ដុល្លារ​ក្នុង​មួយ​ឆ្នាំៗ។

កាល​ពី​មុន ឧស្សាហកម្ម​ប្រេង​ដូង​ មាន​អទិភាព​ខ្ពស់​ជាង​ការ​ការពារ​បរិស្ថាន​ទៅ​ទៀត។ និន្នាការ នោះកំពុងចាប់ផ្តើម​ផ្លាស់​ប្តូ​រ។

នៅ​ក្នុង​ឆ្នាំ​២០១១​ រដ្ឋាភិបាល​នឹង​ហាម​រាល់​គម្រោង​ការ​កាប់​ព្រៃ​ឈើ​រយៈពេល​ពីរ​ឆ្នាំ។ ហើយលោក​ ម៉ាហិនដ្រា​ ស៊ីរ៉េហ្កា (Mahendra Siregar) ជា អនុរដ្ឋមន្រ្តី​ពាណិជ្ជកម្ម​ មាន​ប្រសាសន៍ថា​ រដ្ឋាភិបាល​មាន​បំណង​ទាមទារ​ឲ្យ​មាន​វិធីសាស្រ្ត​ធ្វើ​កសិកម្ម​ថ្មី​ប្រកប​ដោយ​និរន្ត​ភាព​។

នៅ​ឯ​វេទិការ​សម្រាប់​អ្នកយក​ព័ត៌មាននា​ថ្ងៃ​ព្រហស្បត្តិ៍នេះ​ លោកបាន​ឲ្យ​ដឹង​ថា​ រដ្ឋាភិបាលមានផែនការ​ទាមទារឲ្យ​មានដំណើរ ការ កំណត់អត្ត​សញ្ញាណ​មួយ សម្រាប់អ្នក​ផលិត​ប្រេង​ដូងទាំង​អស់។ លោកស៊ី​រ៉េ​ហ្កាមាន​ប្រសាសន៍​ទៀតថា ភាព​ជោគ​ជ័យ​ក្នុង​កិច្ច​ខិត​ខំ​ប្រឹង​ប្រែង​របស់ប្រទេស​ឥណ្ឌូណេស៊ីនឹងត្រូវ​វិនិច្ឆ័យ​ចុង​ក្រោយ​នៅ​លើ​ទី​ផ្សារ​។ លោក​ស៊ីរ៉េហ្កា​មាន​ប្រសាសន៍​ថា៖

«ប្រសិន​បើ​យើង​អាច​ឃើញកំណើន​នៃ​ទំហំ​ប្រេង​ដូងដែល​មាន​លិខិត​បញ្ជាក់​ទទួលជោគ​ជ័យនៅ​លើ​ទី​ផ្សារប្រេងដូង​ជា​ទូទៅ នោះ យើង​នឹង​រំពឹង​ថា​ ជា​ការ​ពិត​ណាស់តម្លៃខ្ពស់​ឬការទទួល​ស្គាល់​បន្ថែមនឹង​ផុស​ចេញ​ពី​អតិថិជន​ផ្ទាល់​ ដែល​មាន​បំណង​ចំណាយប្រាក់​បន្ថែម​ទៀត​ ដោយ​សារ​ការ​ទាម​ទា​រ​ និង​សេចក្តី​ត្រូវ​ការដែល​ពួក​គេ​បាន​ស្នើ​ឡើង »។

លោក​ស៊ីរ៉េហ្កា រួម​ជាមួយ​នឹង​អ្នក​តំណាង​មក​ពី​ឧស្សាហកម្ម​ប្រេង​ដូង​ និង​អង្គការ​អភិរក្សនា​នា​ បាន​ជួប​ជុំ​គ្នា​ដើម្បី​ពិភាក្សា​អំពី​ការផ្អាក​នោះ និង​ថា​តើត្រូវ​ធ្វើ​ដូច​ម្តេច​ដើម្បីឲ្យ​មានតុល្យភាព​រវាង​សេដ្ឋកិច្ច​ ​និង​បរិស្ថាន​។

លោក​ប៊ុស្តា ម៉ៃតា (Bustar Maitar) នៃ​អង្គការហ្គ្រីន​ភីស (Greenpeace) និយាយ​ថា​ ក្រុម​បរិស្ថានមិន​ជំទាស់​ចំពោះ​ការ​អភិវឌ្ឍប្រេង​ដូង​ ឬសេដ្ឋកិច្ច​នោះ​ទេ។​ លោក​ម៉ៃ​តា​ ថ្លែង​ថា៖

«ខ្ញុំ​បាន​និយាយ ម្តង​ហើយ​ម្តង​ទៀត​ថា អង្គការ​ហ្គ្រីន​ភីស​ មិន​ប្រឆាំង​នឹង​ប្រេង​ដូង​ទេ​។ នេះ​ជា​គោលជំហរ​របស់​យើង​។ អ្វី​ដែល​យើង​ប្រឆាំង​នោះ​ គឺ​ការ​កាប់​បំផ្លាញ​ព្រៃ​ឈើ ពីព្រោះនោះគឺជា​ប​ញ្ហា​គន្លឹះ។​ អ្វី​ដែល​យើង​ប្រឆាំង​នោះ​ គឺ​ការ​កាប់​បំផ្លាញ​ព្រៃឈើ​ជា​សាកល មិន​មែនតែនៅ​ក្នុង​ប្រទេស​ឥណ្ឌូនេស៊ី​នោះ​ទេ»។

មន្រ្តីឧស្សាហកម្ម និងអ្នក​អភិរក្ស​មួយ​ក្រុម​ ដែលត្រូវបាន​ហៅ​ថា ជា​ការ​ប្រជុំ​តុ​មូល​ស្តីពី​ប្រេងដូង​ប្រកប​ដោយ​និរន្ត​ភាព​ ឬRSPO បាន​បង្កើត​ដំណើរ​ការ​កំណត់​អត្ត​សញ្ញាណដោយ​ស្ម័គ្រ​ចិត្ត​មួយ។ លោក​វេនដ្យេតា​ រ៉ៅ (Vengeta Rao) នៃ RSPO មាន ​ប្រសាសន៍​ថាការ​កំណត់​អត្ត​សញ្ញាណនោះ​ អាច​ត្រូវ​បាន​ប្រើដើម្បីលើក​ទឹក​ចិត្ត​ដល់​ក្រុមហ៊ុន និង​ផលិតផល​ដែល​មានការ​ទទួល​ខុស​ត្រូវ​ខាង​បរិស្ថាន​។ លោក​រ៉ៅ​បន្ត​ថា៖

«រាល់អ្នក​ប្រើប្រាស់​ប្រេង​ដូង​ ត្រូវ​តាំង​ចិត្ត​ប្រើ​តែ​ប្រេង​ណា​ដែល​ត្រូវ​បាន​ផលិត​ប្រកប​ដោយនិរន្ត​ភាព​។ អ្នក​ផលិត​ត្រូវ​ប្តេជ្ញា​ចិត្តធ្វើ​ និង​ផលិត​ប្រេង​ប្រកប​ដោយ​និរន្ត​ភាព​ ហើយរចនាសម្ព័ន្ធ​ការគាំ​ទ្រ​ដទៃ​ទៀត មិន​ថា​ឡើ​យ អង្គភាព​វិនិ​យោគ​ ឬ​សង្គម​ស៊ីវិលក្តី នឹង​ត្រូវ​ធ្វើ​ឲ្យកិច្ច​ខិត​ខំ​ប្រឹង​ប្រែង​របស់​ខ្លួនលើក​កម្ពស់​ដល់​ ផលិត​កម្ម​ ឬ​ការ​ប្រើ​ប្រាស់​ប្រេង​ ដែល​ត្រូវបាន​ផលិត​ឲ្យ បានប្រសើរ​ជាងមុន​ ជាជាង​លើក​កំពស់​បរិមាណ​ដ៏​ច្រើន​នៃ​អី្វ​ដែល​ត្រូវ​បាន​ផលិត​នា​ពេល​ឥឡូវ​នេះ »។

ខណៈ​ដែល​ក្រុម​អ្នក​បរិស្ថានបាន​លើក​សរសើរ​ចំពោះ​កិច្ច​ខិត​ខំ​ប្រឹង​ប្រែង​ថ្មី​នេះ​ ពួក​គេ​ក៏​បាន​ឲ្យ​ដឹង​ថា​ ក្រុម​ហ៊ុន​ប្រេង​ដូង​កំពុង​តែ​ប្រញាប់​ប្រញាល់​ទិញ​ដី​ឲ្យ​បាន​ច្រើន​បំផុតតាមតែអាច​ធ្វើ​បាន​ ដើម្បី​អភិវឌ្ឍ​មុន​ការ​ផ្អាក​នោះ​ចូល​ជា​ធរមាន៕

XS
SM
MD
LG