នៅក្នុងប្រទេសឥណ្ឌា ពលរដ្ឋក្នុងភូមិកំណើតជីដូនជីតារបស់អ្នកស្រី Kamala Harris ដែលទើបត្រូវបានព្យាករណ៍ថានឹងឈ្នះឆ្នោតក្លាយជាអនុប្រធានាធិបតីរបស់សហរដ្ឋអាមេរិកនោះ បានដុតកាំជ្រួចដើម្បីអបអរដល់ជ័យជម្នះរបស់អ្នកស្រី ហើយពូខាងម្តាយរបស់អ្នកស្រីដែលមានទីលំនៅក្នុងទីក្រុង New Delhi ប្រទេសឥណ្ឌានោះ បានទទួលទូរស័ព្ទហៅចូលគ្មានលោះពេល ពីក្រុមអ្នកយកព័ត៌មាន ខណៈពេលដែលពលរដ្ឋសាមញ្ញឥណ្ឌា មានមោទនភាពដែលអ្នកស្រី Kamala Harris ដែលមានដើមកំណើតមួយផ្នែកមកពីប្រទេសឥណ្ឌានោះ បានបង្កើតនូវប្រវត្តិសាស្ត្រក្នុងសហរដ្ឋអាមេរិកក្រោយត្រូវបានព្យាករណ៍ថានឹងក្លាយជាអនុប្រធានាធិបតីស្រី្តដំបូងបំផុតក្នុងសហរដ្ឋអាមេរិក។
ប្រទេសឥណ្ឌាធ្លាប់មានមេដឹកនាំជាស្ត្រីកាលពីជាង៥០ឆ្នាំមុន នៅពេលដែលអ្នកស្រី Indira Gandhi (អ៊ីនដ្រា ហ្កាន់ធី) បានក្លាយជានាយករដ្ឋមន្ត្រីស្រ្តីជាលើកដំបូងរបស់ឥណ្ឌា ក្នុងឆ្នាំ១៩៦៦ នោះ។
ក្នុងភូមិ Thulasendirapuram (ធូឡាសិនឌីរ៉ាភូរ៉ាម) ក្នុងរដ្ឋ Tamil Nadu ភាគខាងត្បូងប្រទេសឥណ្ឌា ដែលជាភូមិកំណើតរបស់ជីតាអ្នកស្រី Kamala Harris នោះ ពលរដ្ឋបានបង្ហាញពីអារម្មណ៍សប្បាយរីករាយនិងអបអរសារទរ ដោយស្រ្តីមួយចំនួន បានគូររូបភាពនៅលើជញ្ជាំង ហើយក្មេងៗបាននាំគ្នាលើកផ្ទាំងរូបភាពអ្នកស្រី Harris ហើយពលរដ្ឋផ្សេងៗមួយចំនួនទៀតបានអរគុណដល់ព្រះវិហារសាសនាក្នុងភូមិរបស់គេ ដែលបានជួយឲ្យអ្នកស្រីឈ្នះការបោះឆ្នោតនោះ ដោយពួកគេហៅអ្នកស្រីKamala Harris ថាជា«កូនស្រីនៃភូមិរបស់គេ»ផងដែរ។
ដោយឡែកនៅផ្ទះពូខាងម្តាយរបស់អ្នកស្រីក្នុងក្រុង New Delhi នោះវិញ ការអបអរសាទរដល់អ្នកស្រី Kamala Harris មានភាពចម្រុះជាមួយនឹងជ័យជម្នះរបស់គណបក្សប្រជាធិបតេយ្យក្នុងការបោះឆ្នោតសហរដ្ឋអាមេរិកដែលត្រូវបានធ្វើឡើងកាលពីថ្ងៃទី៣ វិច្ឆិកា កន្លងទៅនេះ។
គ្រូបង្រៀនចូលនិវត្តន៍ម្នាក់អាយុ៧៩ឆ្នាំ លោក Balachandran បា្រប់វីអូអេថា «ខ្ញុំចូលរួមសាទរជាមួយអ្នកស្រី Kamala Harris តែខ្ញុំក៏សប្បាយរីករាយសម្រាប់ពួកយើងទាំងអស់គ្នាផងដែរ។ ខ្ញុំមានការបារម្ភពីទិសដៅនៃបរិយាកាសសន្តិសុខអន្តរជាតិទាំងមូល»។
សម្រាប់ជនជាតិឥណ្ឌាភាគច្រើន ផ្លូវឆ្ពោះទៅរកភាពជោគជ័យជាអនុប្រធានាធិបតីស្ត្រីដំបូងរបស់សហរដ្ឋអាមេរិក ដែលជាបេក្ខជនស្ត្រីស្បែកខ្មៅ និងជាពលរដ្ឋអាមេរិកដើមកំណើតឥណ្ឌាដំបូងគេ នោះ បានបង្ហាញពីសមិទ្ធផលនៃសហគមន៍ឥណ្ឌាក្នុងសហរដ្ឋអាមេរិក៕
