ប៉ូលីសបានចាប់ខ្លួនសកម្មជនកំពូលម្នាក់ក្នុងចំណោមសកម្មជនកំពូលផ្សេងៗទៀតរបស់ប្រទេសឥណ្ឌា ដោយសារគាត់គ្រោងនឹងចាប់ផ្តើមធ្វើ កូដកម្មបង្អត់អាហារដើម្បីគាំទ្រឲ្យមានច្បាប់ប្រឆាំងអំពើពុករលួយដែលមានប្រសិទ្ធិភាពជាងមុន។ ការឃុំឃាំងលោក អាន់ណា ហាស្សារ៉េ (Anna Hazare) កាលពីថ្ងៃអង្គារ បាននាំឲ្យមានការតវ៉ាទ្រង់ទ្រាយធំមួយនៅរដ្ឋធានីប្រទេសឥណ្ឌា ប៉ុន្តែមន្ត្រីរដ្ឋការឥណ្ឌានៅតែការពារនូវសេចក្តីសម្រេចក្នុងការឃុំឃាំងសកម្មជនរូបនេះ ដោយសារលោក ហាស្សារ៉េ (Hazare) ចាប់ផ្តើមនូវអ្វីដែលលោកហៅថា ការប្រយុទ្ធដើម្បីឯករាជ្យលើកទី២។
កាលពីថ្ងៃអង្គារ អ្នកតវ៉ារាប់រយនាក់បានប្រមូលផ្តុំគ្នានៅក្នុងទីក្រុងញូដេលីដើម្បីថ្កោលទោសទៅលើការដាក់ឃុំរបស់ប៉ូលីសចំពោះសកម្មជនសង្គមលោក អាន់ណា ហាស្សារ៉េ ដែលមានអាយុ ៧៤ ឆ្នាំ។ ចំនួនអ្នកតវ៉ាបានបន្តកើនឡើងរហូតដល់ពេលល្ងាច ខណៈក្រុមអ្នកតវ៉ា ស្រដៀងគ្នានេះដែរបានផុសឡើងនៅពាសពេញប្រទេស។
លោក ហាស្សារ៉េ ទើបតែបានចាប់ផ្តើមនូវអ្វីដែលគាត់ហៅថា “ការបង្អត់អាហារដល់ស្លាប់” ដែលផុសគំនិតតាមលោក ហ្គាន់ឌី (Gandhi) ដើម្បីគាំទ្រឲ្យមានច្បាប់ថ្មីដ៏ខ្លាំងក្លាមួយក្នុងការប្រឆាំងអំពើពុករលួយ។ ពួកមន្ត្រីនិយាយថា គាត់កំពុងជាប់ឃុំរយៈពេល ៧ ថ្ងៃ ដែលសម្រេចដោយតុលាការ។
រដ្ឋមន្រ្តីក្រសួងមហាផ្ទៃឥណ្ឌា លោក ភី. ឈីដាំបារ៉ាំ (P. Chidambaram) បានសង្កត់ធ្ងន់ថាការសម្រេចឃុំឃាំងលោក ហាស្សារ៉េ (Hazare) គឺធ្វើឡើង ដោយប៉ូលីសក្នុងតំបន់ ប៉ុន្តែគាត់បានការពារទង្វើនេះ។ លោកបានហៅទង្វើនេះថាជា «កាតព្វកិច្ចដ៏ឈឺចាប់» ដែលប៉ូលីសតម្រូវឲ្យបំពេញ បន្ទាប់ពីលោក ហាស្សារ៉េ (Hazare) បានប្រាប់លោកថា លោកនឹងបដិសេធទទួលយកលក្ខខណ្ឌដែលកំណត់ ឲ្យការតវ៉ាមានរយៈពេលត្រឹមតែ៣ថ្ងៃ និង អ្នកតវ៉ាមិនឲ្យលើសពី ៥,០០០ នាក់នោះ។
«លោកនិយាយថា លោកបន្តបដិសេធបញ្ជាទាំងនោះ។ នៅត្រង់ចំនុចនេះប៉ូលីស បានសន្មត់ថា លោក និងអ្នកគាំទ្ររបស់លោកនឹងប្រព្រឹត្តនូវសកម្មភាពដ៏ហ្មត់ចត់មួយដែលផ្ទុយនឹងផ្លូវច្បាប់ ហើយវាអាចមានគ្រោះថ្នាក់ដល់សន្តិភាព»។
កូដកម្មបង្អត់អាហារស្រដៀងគ្នានេះ ដែលដឹកនាំដោយលោក ហាស្សារ៉េ កាលពីខែមេសាមានរយៈពេលប៉ុន្មានថ្ងៃប៉ុណ្ណោះ ប៉ុន្តែបានដាក់សម្ពាធ ទៅលើរដ្ឋាភិបាលឲ្យបង្កើតច្បាប់ស្តីពីការបង្កើតអង្គការសង្គមស៊ីវិលដើម្បីត្រួតពិនិត្យ និង បង្ក្រាបអំពើពុករលួយនយោបាយ។ លោក ហាស្សារ៉េ មានប្រសាសន៍ថា សំណើច្បាប់របស់រដ្ឋាភិបាលខ្សោយខ្លាំងណាស់ ហើយលោក ទាមទារឲ្យមានច្បាប់មួយដែលសូម្បីតែនាយករដ្ឋមន្រ្តីឥណ្ឌា និងសមាជិក តុលាការក៏អាចប្រឈមនឹងការដាក់ទោសទណ្ឌពីអង្គភាពប្រឆាំងនឹងអំពើពុករលួយដែរ។
កាលពីថ្ងៃអង្គារ មេដឹកនាំជាន់ខ្ពស់របស់គណបក្សសមាជកាន់អំណាចនៅក្នុង ប្រទេសឥណ្ឌាបានបញ្ចាក់នូវការអះអាងរបស់ខ្លួនម្តងទៀតថា សភាគឺជាស្ថាប័ន ដែលទទួលស្គាល់តែមួយគត់សម្រាប់ការពង្រាងច្បាប់ថ្មី។ រដ្ឋមន្រ្តីក្រសួងមហាផ្ទៃ ឈីដាំបារ៉ាំ (Chidambaram) បានបដិសេធអំណះអំណាងដែលថា ប៉ូលីសបាន គាបសង្កត់សិទ្ធិប្រជាធិបតេយ្យមូលដ្ឋាននៃការតវ៉ារបស់ប្រជាពលរដ្ឋសាមញ្ញ ក្រោមសម្ពាធរបស់រដ្ឋាភិបាល។ លោកនិយាយថា អាជ្ញាធរបានចំណាយពេល ជាច្រើនខែដើម្បីព្យាយាមចរចារលើលក្ខខណ្ឌគ្រប់គ្រងហ្វូងមនុស្សឲ្យបានសមរម្យសម្រាប់ការតវ៉ារបស់លោក ហាស្សារ៉េ ។
«គ្មានកន្លែងណាមួយលើពិភពលោកដែលការតវ៉ាត្រូវបានអនុញ្ញាតិឲ្យដោយមិនមានលក្ខខណ្ឌនោះទេ។ នេះជារដ្ឋធានីរបស់ប្រទេសឥណ្ឌា»។
ភ្លាមៗបន្ទាប់ពីលោក ហាស្សារ៉េ ត្រូវបានដាក់ឃុំ អ្នកគាំទ្ររបស់លោកបានចេញផ្សាយវីដេអូលើគេហទំព័រ YouTube បង្ហាញថាគាត់បានរំពឹងទុកនិង គ្រោងទុករួចមកហើយអំពីការចាប់ខ្លួនរបស់លោក។
លោក ហាស្សារ៉េ និយាយថា «ខ្ញុំត្រូវបានគេចាប់ខ្លួន»។ លោកសួរថា «តើការចាប់ខ្លួននេះអាចបណ្តាលឲ្យបញ្ចប់នូវយុទ្ធនាការប្រឆាំងអំពើពុករលួយ ឬយ៉ាងណា?»។លោកបានបន្តថា «កុំឲ្យរឿងនេះកើតឡើងឲ្យសោះ»។ លោកនិយាយថា «ពេលវេលានឹងមកដល់នៅពេលដែលគ្មានកន្លែងទំនេរសល់នៅក្នុងគុកនៅក្នុងប្រទេសប៉ុន្តែសូមរក្សាចលនាតវ៉ាឲ្យនៅអហិង្សាដដែល»។
កំហឹងរបស់ប្រជាពលរដ្ឋលើអំពើពុករលួយក្នុងប្រទេសឥណ្ឌាមានការកើនឡើងជាបន្តបន្ទាប់ក្នុងអំឡុងពេលមួយឆ្នាំកន្លងមកនេះ ដោយសារតែមានរបាយការណ៍ ផ្សេងៗអំពីរឿងអាស្រូវការរីកសាយភាយអំពើពុករលួយអស់ពីមួយទៅមួយនៅក្នុងប្រព័ន្ធផ្សព្វផ្សាយជាតិ។
រដ្ឋសភាទាំងពីរថ្នាក់របស់ប្រទេសឥណ្ឌាបានបញ្ចប់ការប្រជុំជាបណ្តោះអាសន្ន មុនការកំណត់ដោយសារភាពចម្រូងចម្រាស់ទាក់ទិននឹងការឃុំឃាំងលោក ហាស្សារ៉េ ។
ឥឡូវនេះ ភាពគំរាមកំហែងនៃការជាប់គាំងដែលអាចកើតឡើង លេចឡើង ប្រកបដោយគ្រោះថ្នាក់លើអង្គនីតិបញ្ញត្តិ ខណៈដែលបក្សប្រឆាំងដ៏មាន ភាពជឿជាក់មួយបានចាប់ផ្តើមចោទប្រកាន់បក្សកាន់អំណាចថាបានដកសិទ្ធិពលរដ្ឋពីអ្នកតវ៉ា៕
ប្រែសម្រួលដោយ ភី សុភាដា
