ញូដេលី ឥណ្ឌា៖ រដ្ឋ ហ្គូដ្យារ៉ាត (Gujarat) នាប៉ែកខាងលិចនៃប្រទេសឥណ្ឌាកំពុងបង្កើតរោងចក្រមួយដែលនឹងប្រើប្រាស់ការបោកបក់នៃរលកមហាសមុទ្រដើម្បីផលិតអគ្គិសនី។
កិច្ចព្រមព្រៀងរវាងក្រុមហ៊ុន សាជីវកម្មធនធានអាត្លង់ទីស (Atlantis Resources Corporation) មានមូលដ្ឋានក្នុងក្រុងឡុងដ៍ និងរដ្ឋាភិបាលរដ្ឋ ហ្គូដ្យារ៉ាត បានត្រូវចុះហត្ថលេខាកាលពីពេលមុននេះក្នុងសប្តាហ៍នេះ ក្រោយពីការសិក្សាស្រាវជ្រាវមួយបានបង្ហាញថា ឈូងសមុទ្រ គុតច៍ (Kutch) នៅតាមឆ្នេរសមុទ្រខាងលិចនៃប្រទេសឥណ្ឌាជាកន្លែងសក្តិសមសម្រាប់ការបង្កើតអគ្គិសនីដោយប្រើកម្លាំងរលកសមុទ្រ។
កម្លាំងរលកសមុទ្រប្រើប្រាស់ទួរប៊ីនសម្រាប់បង្កើតថាមពលនៅក្នុងការបោកបក់នៃរលកមហាសមុទ្រ។ គម្រោងការនេះដែលជាគម្រោងការទីមួយ ក្នុងប្រភេទនេះនៅក្នុងប្រទេសឥណ្ឌានឹងផលិតអគ្គិសនី៥០ មេហ្កាវ៉ាត។ ក៏ប៉ុន្តែ កម្លាំងអគ្គិសនីនេះអាចត្រូវបង្កើនដល់២៥០ មេហ្កាវ៉ាត។
ប្រទេសកូរ៉េខាងត្បូងជាប្រទេសនៅទ្វីបអាស៊ីតែមួយគត់មួយទៀត ដែលគេដឹងថា កំពុងកសាងរោងចក្រថាមពលរលកសមុទ្រមួយ។ ប្រសិនបើរោងចក្រនៅក្នុងរដ្ឋ ហ្គូដ្យារ ត្រូវបើកឱ្យប្រើប្រាស់ក្នុងពេលឆាប់ៗនេះ គម្រោងការនេះនឹងក្លាយទៅជាគម្រោងការថាមពលរលកសមុទ្រទីមួយក្នុងទ្វីបអាស៊ី។
លោករ៉ាចគូម៉ារ រ៉ាចស៊ីងហានី (Rajkumar Rajsinghani) ជាមន្ត្រីមើលការខុសត្រូវគម្រោងការថាមពលរលកសមុទ្ររបស់ក្រុមហ៊ុន សាជីវកម្មថាមពលហ្គូដ្យារ៉ាត (Gujarat Power Corporation Ltd) ។ លោកនិយាយថា គម្រោងការនេះនឹងផ្តល់អត្ថប្រយោជន៍ច្រើនដល់រដ្ឋហ្គូដ្យារ៉ាត។ លោកបន្តថា៖
«គម្រោងការនេះនឹងជួយយើងពីរយ៉ាង។ បច្ចេកវិជ្ជានេះមិនមែនជាមួយពួកប្រទេសក្នុងភូមិភាគអាស៊ីប៉ាស៊ីហ្វិកទេ។ បច្ចេកវិជ្ជានេះនឹងត្រូវផ្ទេរទៅឱ្យរដ្ឋ។ ហើយទីពីរ គឺថា ដោយសារនេះជាគម្រោងការមួយដែលអាចផលិតអគ្គិសនីពេញ២៤ម៉ោងរៀងរាល់ថ្ងៃ យើងយល់ថា ប្រភពថាមពលនេះនឹងផ្តល់ឱ្យយើងនូវថាមពលដែលអាចយកមកប្រើវិញបានដោយមានតម្លៃថោកល្មម»។
មន្ត្រីមួយចំនួនក្នុងរដ្ឋ ហ្គូដ្យារ៉ាត សង្ឃឹមថា រោងចក្រថាមពលរលកសមុទ្រដែលនឹងកសាង ហើយនឹងក្លាយទៅជារោងចក្រទីមួយក្នុងបណ្តារោងចក្របែបនេះមួយចំនួនទៀត ពីព្រោះឆ្នេរសមុទ្រ១ពាន់៦រយគីទ្បូម៉ែត្ររបស់រដ្ឋនេះផ្តល់សក្តានុពលល្អប្រសើរសម្រាប់ការបង្កើតកម្លាំងអគ្គិសនីពីកម្លាំងបោកបក់នៃរលកសមុទ្រ។
រដ្ឋហ្គូដ្យារ៉ាត ជារដ្ឋមួយក្នុងបណ្តារដ្ឋនៃប្រទេសឥណ្ឌាដែលមានឧស្សាហកម្ម និងសេដ្ឋកិច្ចលូតលាស់ ក៏ប៉ុន្តែដូចជាផ្នែកឯទៀតៗរបស់ប្រទេសដែរ រដ្ឋនេះផលិតអគ្គិសនីភាគច្រើនរបស់ខ្លួនពីឥន្ធនៈហ្វុស៊ីល។ ក៏ប៉ុន្តែ ទោះជាយ៉ាងណាក៏ដោយ ក៏ក្នុងរយៈពេលប៉ុន្មានឆ្នាំខាងមុខនេះរដ្ឋហ្គូដ្យារ៉ាត គ្រោងនឹងបង្កើតរោងចក្រអគ្គិសនីដោយប្រើកម្លាំងបោកបក់នៃរលកសមុទ្រ កម្លាំងខ្យល់និងចំណាំងថ្ងៃដើម្បីផលិតអគ្គិសនីជាង៧ពាន់មេហ្កាវ៉ាត និងបង្កើនច្រើនក្រាស់ក្រែលដល់ចំណែកនៃប្រភពថាមពលយកមកប្រើជាថ្មីបាន។
កិច្ចខិតខំប្រឹងប្រែងរបស់ប្រទេសឥណ្ឌាក្នុងការស្ថាបនាប្រភពថាមពលស្អាតដែលមានរួមបញ្ចូលថាមពលព្រះអាទិត្យមានទ្បើងនៅពេលមានការផ្តោតការយកចិត្តទុកដាក់សាកលលើការប្រែប្រួលធាតុអាកាស និងការកាត់បន្ថយការបញ្ចេញឧស្ម័នដែលនាំឱ្យធាតុអាកាសពិភពលោកក្តៅជាងមុន។ ប្រទេសឥណ្ឌាជាប្រទេសទីបីដែលបញ្ចេញឧស្ម័នផ្ទះកញ្ចក់ច្រើនជាងគេ។
នៅទូទាំងពិភពលោក ការបង្កើតអគ្គិសនីពីកម្លាំងបោកបក់នៃរលកសមុទ្រនៅតូចនៅទ្បើយ បើប្រៀបធៀបជាមួយប្រភពឯទៀតៗនៃថាមពលយកមកប្រើជាថ្មីបានដូចជាថាមពលព្រះអាទិត្យ និងថាមពលខ្យល់ជាដើម។ ក៏ប៉ុន្តែពួកអ្នកជំនាញការនិយាយថា ការណ៍នេះអាចប្រែប្រូលបានជាមួយកំណើននៃការផ្តោតការយកចិត្តទុកដាក់លើប្រភពថាមពលស្អាត៕
ប្រែសម្រួលដោយ ឈឹម សុមេធ
