ភ្ជាប់​ទៅ​គេហទំព័រ​ទាក់ទង

នាយករដ្ឋមន្ត្រី​ឥណ្ឌា​ថា​លោក​បើក​ចំហ​ចំពោះ​ការ​ពិភាក្សា​អំពី​សេចក្តី​ព្រាង​ច្បាប់​ប្រឆាំង​នឹង​អំពើ​ពុករលួយ


ក្រុម​អ្នក​គាំទ្រ​លោក​អាន់​ណា​ ហាហ្សារេ​សកម្មជន​ប្រឆាំង​អំពើ​ពុករលួយ​គ្រវីទង់​ជាតិ​ពេល​លោក​ហាហ្សារេ​ធ្វើ​កូដកម្ម​អត់​អាហារ​នៅ​ទីវាល​រ៉ាំលីឡា​នៅ​ទីក្រុង​ញូដេលី​នៅ​ថ្ងៃ​ទី​២២​សីហា​ឆ្នាំ​២០១១។​

ខណ:ពេល​ដែល​ការ​ប្រឆាំង​អំពើ​ពុក​រលួយ​កើន​ឡើង​នៅ​ប្រទេស​ឥណ្ឌា​ នាយករដ្ឋមន្ដ្រី​ និយាយ​ថា​ លោក​បើក​ចំហ​ឲ្យ​មាន​ការ​ជែក​ដេញដោល​គ្នា​អំពី​បញ្ហា​សំណើ​ច្បាប់​ប្រឆាំង​អំពើពុករលួយ​ ដែល​ក្លាយ​ទៅ​ជា​ចំណុច​មិន​ចុះ​សម្រុង​គ្នា​រវាង​រដ្ឋាភិបាល​និង​សកម្មជន​សង្គម​ស៊ីវីល។ ក៏​ប៉ុន្ដែ​គេមិន​ឃើញ​មាន​សញ្ញា​ណា​មួយ​ថា​ភាព​មិន​ចាញ់​មិន​ឈ្នះ​គ្នា​រវាង​ភាគី​ទាំង​ពីរ​បាន​ធូរ​ស្រាល​ទេ។

ក្នុង​ពេល​ដែល​អ្នក​ធ្វើ​យុទ្ធនាការ​ប្រឆាំង​អំពើ​ពុក​រលួយ​ លោក អាន់​ណា​ ហាហ្សារេ​ (Anna Hazare) ធ្វើ​កូដកម្មអត់​អាហារ​ចូល​ដល់​ថ្ងៃ​ទី​៧​ហើយ​នោះ​ មនុស្ស​រាប់​ម៉ឺន​នាក់​នាំ​គ្នា​ទៅ​សម្ដែង​សាមគី្គភាព​ជា​មួយ​លោក​ នៅ​ទី​លាន​កណ្ដាល​វាល​មួយ​នៅ​ទីក្រុង​ញូវដេលី ដែល​ជា​ទី​កន្លែង​ប្រឆាំង​របស់​លោក។

ក្រុម​វេជ្ជ​បណ្ឌិត​និយាយ​ថា​ លោក​ចុះ​ទម្ងន់​៥​គីឡូក្រាម​ ប៉ុន្ដែ​លោក​មាន​សុខភាព​ល្អ។

នៅ​ចុង​សប្ដាហ៍​កន្លង​ទៅ​នេះ​ មាន​មនុស្ស​កុះករ​មិន​ធ្លាប់​មាន​ពី​មុន​មក​នៅ​ទូទាំង​ប្រទេស​ ដែល​ប្រមូល​ផ្ដុំ​គ្នា​គាំទ្រ​យុទ្ធនាការ​របស់​លោក​ហាហ្សារេ។ មនុស្ស​ពាក់​មួក​មាន​សរសេរ​ពាក្យ​ថា​ «ខ្ញុំ​ជា​ អាន់​ណា​ ហាហ្សារេ» ហើយ​គ្រវី​ទង់​ ធ្វើ​បាតុកម្ម​នៅ​ទី​ក្រុង​ Mumbai, Bangalore, និង​ Chennai ព្រម​ទាំង​ទីប្រជុំជន​និង​ទី​ក្រុង​ដទៃៗ​ទៀត។

លោក​ ហាហ្សារេ​ ចង់​ឲ្យ​រដ្ឋាភិបាល​ដក​សេចក្ដី​ព្រាង​ច្បាប់​ប្រឆាំង​អំពើ​ពុក​រលួយ​ដែល​ខ្លួន​បាន​ដាក់​ស្នើ​ នៅ​រដ្ឋសភា​ ហើយ​អនុម័ត​កំណែ​ថ្មី​ដែល​សកម្មជន​សង្គម​ស៊ីវីល​បាន​ព្រាង​ឲ្យ​បាន​ត្រឹម​ថ្ងៃ​ទី​៣០​ខែ​សីហា។

ស្ថិត​នៅ​ក្រោម​សម្ពាធ​ច្រើន​ឡើង​ពី​ការ​តវ៉ា​ លោក​នាយករដ្ឋមន្ដ្រី​ Manmohan ​Singh​ និយាយ​ថា​សំណើ​ច្បាប់​ប្រឆាំង​អំពើ​ពុករលួយ​របស់​រដ្ឋាភិបាល ​ហៅ​ថា​ Lokpal​ ជា​សេចក្ដី​ព្រាង​ដំបូងៗ​ដែល​អាច​ផ្លាស់​ប្ដូរ​បាន។​ លោក​និយាយ​ថា​ អ្នក​ដែល​ខ្វែង​គំនិត​អំពី​សំណើ​នេះ​ត្រូវ​ធ្វើតាម​នីតិវិធី​នៃ​រដ្ឋសភា។

«យើង​បាន​បញ្ជាក់​ច្បាស់ថា​ បុគ្គល​ណា​ដែល​ពាក់ព័ន្ធ​នឹង​រឿង​នេះ​ គួរ​បញ្ជូន​សេចក្ដី​ព្រួយ​បារម្ភ​របស់​គេ​អំពី​ខផ្សេងៗនៃ​សំណើ​ច្បាប់​នេះ​ ជូន​អ្នកតំណាង​របស់​ពួក​គេ​នៅ​ក្នុង​រដ្ឋសភា​ និង​គណ:កម្មាធិការ​អចិន្ដ្រៃយ៍។​ គណ:កម្មាធិការ​អចិន្ដ្រៃយ៍​នេះ​ មាន​អំណាច​ដាក់​ស្នើ​វិសោធនកម្ម​ណា​មួយ​ឬ​វិសោធនកម្ម​ផ្សេងៗ។ យើង​បើក​ចំហ​ចំពោះ​ការ​ជជែក​ដេញ​ដោល​គ្នា​សម​ហេតុ​សម​ផលអំពី​បញ្ហាទាំង​អស់​នេះ។

លោក​ Singh​ ក៏​និយាយ​ដែរ​ថា​ ខណ:​ពេល​ដែល​អង្គការ​ឃ្លាំ​មើល​ការ​ប្រឆាំង​អំពើ​ពុក​រលួយ​នឹង​ជួយ​អំពី​រឿង​នេះ​ អង្គការ​នោះ​នឹង​មិន​អាច​ដោះស្រាយ​បញ្ហា​នេះ​ទេ។​ លោក​និយាយ​ថា​ អំពើ​ពុករលួយ​មិន​អាច​ត្រូវ​បាន​បំបាត់​ដោយ​ទង្វើ​តែ​មួយ​ដងភ្លាមៗ​ទេ គេ​មិន​បាន​គិត​អំពី​ភាព​ស្មុគស្មាញ​និង​លំបាក​ក្នុង​ការ​បំបាត់​ឫសគល់​នៃ​អំពើ​ពុករលួយ​ទេ។ ក៏​ប៉ុន្ដែ​ក្រុម​សកម្មជន​សង្គម​ស៊ីវីល​ ដែល​ត្រូវ​បាន​ទទួល​ការ​លើក​ទឹក​ចិត្ដ​ក្នុង​សប្ដាហ៍​កន្លង​ទៅ​នេះ​ ដោយ​ការ​គាំទ្រ​យ៉ាង​ធំ​ មិនមានអារម្មណ៍​ចង់​ដក​ខ្លួន​ចេញ​ពី​ការ​ទាមទារ​របស់​គេ​ ដែល​ចង់បាន​អ្នក​សម្រប​សម្រួល​ដ៏​មាន​អំណាច​ម្នាក់។​ ពួក​គេ​ទទូច​ថា​ លោក​នាយករដ្ឋមន្ដ្រី​ ប្រព័ន្ធ​តុលាការ​ និងក្រុម​មន្ដ្រី​លំដាប់​ថ្នាក់​ទាបៗ​ ដែល​រដ្ឋាភិបាល​ចង់​ដាក់​ឲ្យ​នៅ​ក្រៅ​សមត្ថកិច្ច​របស់​ច្បាប់​នេះ​ គួរ​ត្រូវ​បាន​ដាក់​បញ្ចូលក្នុង​ច្បាប់​នេះដែរ។

លោក Arvind Kejriwal សកម្មជន​សង្គម​ស៊ីវីល​ម្នាក់​ពី​ក្នុង​ចំណោម​សកម្មជន​សង្គម​ស៊ីវីល​មួយ​ចំនួន​ ដែល​នាំ​មុខ​គេ​នៅ​ក្នុង​យុទ្ធនាការ​នេះ​ ពន្យល់​អ្នក​ទៅ​ស្ដាប់​លោក​ជា​ច្រើន​នាក់​អំពី​ហេតុ​ដែល​សំណើ​របស់​រដ្ឋាភិបាល​នឹង​មិន​បំបាត់​អំពើ​ពុករលួយ​តួចតាច​ថ្នាក់​ទាបទេ​ ដែល​អំពើ​នេះ​តែង​ប៉ះ​ពាល់​ពលរដ្ឋ​សាមញ្ញ។

«លោក​និយាយ​ថា​ នៅ​ពេល​ដែល​ពលរដ្ឋ​ទៅកាន់ការិយាល័យ​របស់​រដ្ឋាភិបាល​ ពួក​គេ​ត្រូវ​បង់​ប្រាក់​សំណូក​ បើ​មិន​ធ្វើ​ដូច្នោះ​ទេ​ ពួក​គេចំណាយ​ពេល​មិន​ចាំ​បាច់។​ លោក​និយាយ​ថា​ពួក​គេ​ទាមទារ​ឲ្យ​កិច្ចការ​ដូច​ជា​ការ​ចេញ​ប័ណ្ណ​របប​ ការ​ទទួល​ប្រាក់​ចូល​និវត្ដន៍​ សំបុត្រ​កំណើត។ល។​ គួរ​ធ្វើ​ឡើង​ក្នុង​រយ:ពេល​មាន​កម្រិត​ បើ​ពុំ​នោះ​សោត​ទេ​ គួរ​ដាក់​ពិន័យលើ​ក្រុម​មន្ដ្រី​ពាក់ព័ន្ធ​ក្នុង​រឿង​នោះ។

រដ្ឋាភិបាល​នៅ​មិនទាន់​បាន​ព្រមព្រៀង​នាំ​យក​មន្ដ្រី​ទាំង​អស់​ដែល​ស្ថិត​នៅ​ក្រោម​សំណើ​របស់​អង្គការ​ឃ្លាំ​មើល​ទេ​ ដោយ​និយាយ​ថា​ ការ​ធ្វើ​ដូច្នេះ​នឹង​តម្រូវ​ឲ្យ​មាន​យន្ដការ​ថ្មី​យ៉ាង​ធំ​មួយ។​ រដ្ឋាភិបាល​ក៏​បញ្ជាក់​ផង​ដែរ​ថា នៅ​បស្ចឹម​ប្រទេស​ ដែល​កាន់​លទ្ធិ​ប្រជាធិបតេយ្យ​ លោក​នាយក​រដ្ឋមន្ដ្រី​ និង​ចៅក្រម​ក្នុង​អាណត្ដិ​ មាន​អភ័យ​ឯកសិទ្ធិ​ពី​ការ​កាត់​ទោស ដើម្បី​ការពារ​អស់​លោកពី​ការ​ជាប់​ផុង​ក្នុងពាក្យ​បណ្ដឹងរបស់​ក្រុម​ប្រឆាំង​នយោបាយ។

ភាគី​ទាំង​ពីរ​និយាយ​ថា​ គេ​បើក​ចំហ​ចំពោះ​ការ​ចរចា​គ្នា​ ក៏​ប៉ុន្ដែ​មិន​ទាន់​មានភាគី​ណា​ស្នើ​ចាប់​ផ្ដើម​ការ​ចរចា​គ្នា​ជា​ផ្លូវ​ការ​នៅ​ឡើយ​ទេ៕

ប្រែសម្រួល​ដោយ កង ស៊ីវន

XS
SM
MD
LG