លោក Mark Zaid មេធាវីរបស់អ្នកលួចបញ្ចេញព័ត៌មានសម្ងាត់អំពីការសន្ទនាតាមទូរស័ព្ទរវាងប្រធានាធិបតីសហរដ្ឋអាមេរិកលោក Donald Trump និងប្រធានាធិបតីអ៊ុយក្រែនលោក Volodymir Zelenskiy ដែលព័ត៌មានសម្ងាត់នេះបានជំរុញឲ្យរដ្ឋសភាបើកការស៊ើបអង្កេតដើម្បីចោទប្រកាន់ទម្លាក់លោក Trump ពីតំណែងនោះ បាននិយាយថា អ្នកលួចបញ្ចេញព័ត៌មានសម្ងាត់នេះត្រៀមខ្លួនឆ្លើយសំណួរជាលាយលក្ខណ៍អក្សររបស់គណបក្សសាធារណរដ្ឋ។
លោកមេធាវី Zaid បានសរសេរនៅលើ Twitter កាលពីថ្ងៃអាទិត្យម្សិលមិញថា ក្រុមមេធាវីអនុញ្ញាតឲ្យលោក Devin Nunes សមាជិកកំពូលខាងគណបក្សសាធារណរដ្ឋនៃគណៈកម្មាធិការស៊ើបការណ៍សម្ងាត់នៃរដ្ឋសភា ផ្ដល់ជាសំណួរ ដែលអ្នកលួចបញ្ចេញព័ត៌មានសម្ងាត់នោះអាចឆ្លើយ «ជាលាយលក្ខណ៍អក្សរដោយមានការស្បថស្បែថានឹងនិយាយការពិត» បាន។
លោកមេធាវី Zaid បានបន្ថែមថា សំណួរដែលអ្នកលួចបញ្ចេញព័ត៌មានសម្ងាត់នឹងបដិសេធមិនឆ្លើយគឺសំណួរពាក់ព័ន្ធនឹងអត្តសញ្ញាណរបស់ខ្លួន។
លោក Jim Jordan សមាជិកសភាខាងគណបក្សសាធារណរដ្ឋនៃគណៈកម្មាធិការត្រួតពិនិត្យកិច្ចការរដ្ឋាភិបាលនៃរដ្ឋសភា បានជំទាស់ទៅនឹងដំណើរការដែលបានស្នើឡើងនេះ ដោយនិយាយថា ចម្លើយជាលាយលក្ខណ៍អក្សរនឹងមិនផ្ដល់ដល់ដំណើរការសួរចម្លើយសាក្សីឲ្យបានគ្រប់គ្រាន់នោះទេ។
លោកមេធាវី Zaid បានតបតាម Twitter ដោយនិយាយថា ការលើកឡើងរបស់លោក Jordan បង្ហាញឲ្យឃើញពី «ការមិនយល់» អំពីច្បាប់សហព័ន្ធដែលការពារអត្តសញ្ញាណរបស់អ្នកលួចបញ្ចេញព័ត៌មានសម្ងាត់។
ច្បាប់នេះការពារអត្តសញ្ញាណ និងមុខតំណែងរបស់អ្នកដែលរាយការណ៍អំពីបញ្ហាមួយចំនួនដូចជាទង្វើមិនគប្បី ការរំលោភអំណាច និងការបង្កគ្រោះថ្នាក់ដល់សុវត្ថិភាពសាធារណៈដែលធ្វើឡើងដោយបុគ្គលិករដ្ឋាភិបាលជាដើម៕
