រដ្ឋាភិបាលកណ្តាលស្តាំនិយមរបស់អូស្ត្រាលី និយាយថា ខ្លួន នឹងបើកមជ្ឈមណ្ឌលឃុំឃាំងដ៏ចម្រូងចម្រាសឡើងវិញនៅលើកោះគ្រឹស្តម៉ាស (Christmas) បន្ទាប់ពីចាញ់ឆ្នោតជាប្រវត្តិសាស្រ្តនៅក្នុងសភា។
រដ្ឋាភិបាលអូស្រ្តាលី កំពុងបង្កើនការពិភាក្សាដ៏ក្តៅគគុកអំពីពួកអ្នកស្វះស្វែងសុំសិទ្ធិជ្រកកោន។ ដោយទើបតែចេញពីភាពបរាជ័យដ៏អាម៉ាសនៅក្នុងការបោះឆ្នោតសភា លោកនាយករដ្ឋមន្រ្តី Scott Morrison និយាយថា ច្បាប់ថ្មីដែលធ្វើឲ្យមានភាពងាយស្រួលកាន់តែខ្លាំងឡើងសម្រាប់ជនចំណាកស្រុកមានជំងឺដែលត្រូវបានឃុំខ្លួននៅក្នុងកោះត្រូវបានព្យាបាលជំងឺក្នុងប្រទេសអូស្រ្តាលីនោះ នឹងលើកទឹកចិត្តឲ្យអ្នកសុំសិទ្ធិជ្រកកោនកាន់តែច្រើនឡើងមកប្រទេសអូស្រ្តាលីតាមសមុទ្រ។
លោកនាយករដ្ឋមន្រ្តី បាននិយាយថា «ចំពោះជនណាដែលគិតថា ពួកគេ ត្រូវធ្វើដំណើរតាមទូក ខ្ញុំនៅទីនេះហើយខ្ញុំ នឹងបញ្ឈប់អ្នកឯង។ ការងាររបស់ខ្ញុំនៅពេលនេះ គឺត្រូវធ្វើអ្វីៗទាំងអស់នៅក្នុងអំណាចរបស់ខ្ញុំនិងនៅក្នុងអំណាចរបស់រដ្ឋាភិបាលដើម្បីធ្វើឲ្យប្រាកដថា អ្វីដែលសភាបានធ្វើដើម្បីធ្វើឲ្យចុះខ្សោយព្រំដែនរបស់យើង មិននាំឲ្យទូកមកអូស្រ្តាលីទេ»។
មជ្ឈមណ្ឌលឃុំឃាំងនៅលើកោះ Christmas ដែលជាដែនដីអូស្រ្តាលីនៅក្នុងមហាសមុទ្រឥណ្ឌា នឹងត្រូវបើកឡើងវិញ។ មជ្ឈមណ្ឌលឃុំឃាំងនេះ បានប្រតិបត្តិការចាប់តាំងពីឆ្នាំ២០០៣មក ក៏ប៉ុន្តែ ត្រូវបានបិទកាលពីឆ្នាំទៅ។
ក្រុមអ្នករិះគន់ និយាយថា ការសម្រេចរបស់នាយករដ្ឋមន្រ្តីដើម្បីបើកមជ្ឈមណ្ឌលឃុំ ឃាំង ដែលស្ថិតនៅចម្ងាយ៣០០គីឡូម៉ែត្រភាគខាងត្បូងប្រទេសឥណ្ឌូនេស៊ីជាការប៉ុន ប៉ងមួយដើម្បីបន្លាចពួកអ្នកបោះឆ្នោតអំពីសន្តិសុខព្រំដែនមុនពេលការបោះឆ្នោតដែលត្រូវគេរំពឹងនឹងធ្វើឡើងនៅខែឧសភាខាងមុខនេះ។
ក្រុមអ្នកប្រឆាំង ចង្អុលបង្ហាញថា ច្បាប់ជម្លៀសដោយហេតុផលព្យាបាលជំងឺ បានអនុ ម័តកាលពីសប្តាហ៍មុនសំដៅលើមនុស្សដែលត្រូវឃុំខ្លួននៅលើកោះក្នុងសមុទ្ររួច ហើយតែប៉ុណ្ណោះ ហើយនឹងមិនអនុវត្តដល់ពួកអ្នកមកដល់ថ្មីទេ។
លោក Alex Riley ជាសាស្រ្តាចារ្យមកពីសាកលវិទ្យាល័យ Adelaide និយាយថា ជនចំណាកស្រុកជាច្រើន នឹងដឹងពីការរឹតត្បិតដែលអូស្រ្តាលី នឹងធ្វើឡើង។
លោក បាននិយាយថា «ពួកជនភៀសខ្លួន ចេះស្វែងរកប្រភពព័ត៌មានកាន់តែប្រសើរឡើង។ ទូរស័ព្ទ Smart phone និងព័ត៌មានកាន់តែសម្បូរឡើងនៅលើប្រព័ន្ធអ៊ីនធឺណិតមានន័យថា មនុស្ស នឹងសម្រេចនៅពេលឆាប់ៗនេះពីឱកាសអ្វីដែលមានប្រាកដ។ ពួកគេប្រាកដ នឹងមើលព័ត៌មានលម្អិត។ មុនពួកគេ ហក់ឡើងលើទូកហើយប្តូរអាយុជីវិតរបស់ខ្លួន ដើម្បីធ្វើដំណើរទៅកាន់ប្រទេសផ្សេងទៀតដោយសង្ឃឹមនឹងចំណាយពេលរាប់សិបឆ្នាំក្នុងជំរំឃុំឃាំងនៅលើកោះ ពួកគេ នឹងមើលឲ្យបានល្អិតល្អន់អំពីអ្វីដែលច្បាប់បានចែងរួចហើយនោះ»។
វីដេអូប្រឆាំង នឹងការត់ពន្ធមនុស្សរបស់កងទ័ពអូស្រ្តាលី បាននិយាយថា៖ «បើអ្នក ប្តូរជីវិតនិងប្រាក់កាសរបស់អ្នកដើម្បីព្យាយាមមកដល់អូស្រ្តាលីដោយខុសច្បាប់ អ្នក នឹងទទួលបរាជ័យ។ អ្នក មិនបានទទួលប្រយោជន៍អ្វីទាំងអស់ដោយការព្យាយាមទៅដល់ប្រទេសអូស្រ្តាលីខុសច្បាប់តាមទូកនោះ ក៏ប៉ុន្តែ អ្នក អាចបាត់បង់អ្វីៗទាំងអស់»។
ចាប់តាំងពីឆ្នាំ២០១៣មក នាវាអូស្រ្តាលី បានអូសទូករបស់អ្នកសុំសិទ្ធិជ្រកកោនចេញពីផ្ទៃទឹករបស់ខ្លួន។
មានចលាចលនៅឯជំរំឃុំឃាំងក្នុងមហាសមុទ្រប៉ាស៊ីហ្វិកដែលនៅទីនោះជនចំណាកស្រុកផ្សេងទៀត បានត្រូវគេចាប់នៅសមុទ្របានត្រូវឃុំឃាំងនៅទីនោះ។ ជនចំណាកស្រុកទាំងនោះត្រូវបានគេប្រាប់ថា ពួកគេនឹងមិនត្រូវបានគេអនុញ្ញាតឲ្យតាំងទីលំនៅក្នុងប្រទេសអូស្រ្តាលីទេ។
នៅលើកោះ Manus ក្នុងប្រទេស Papua New Guinea ក្រុមជនភៀសខ្លួនបានស្វាគមន៍ព័ត៌មានថា ពួកគេ អាចទៅប្រទេសអូស្រ្តាលីដើម្បីព្យាបាលជំងឺ។
ក៏ប៉ុន្តែលោក Khalid Hamad ដែលបានរត់គេចខ្លួនមកពីប្រទេសស៊ូដង់ និយាយថា អនាគតយូរអង្វែងរបស់លោក នៅមានភាពមិនប្រាកដប្រជានៅឡើយ។ លោកនិយាយថា៖ «វាមិនមែនជាដំណោះស្រាយអចិន្រ្តៃយ៍សម្រាប់យើងទេ។ ទៅប្រ ទេសអូស្រ្តាលីដើម្បីទទួលបានការព្យាបាល តែប៉ុណ្ណឹងឬ? តើមានអ្វីទៀតបន្ទាប់ពីការព្យាបាលនោះ? ការណ៍នេះមិនមែនជាដំណោះស្រាយអចិន្រ្តៃយ៍ទេ វាគ្រាន់តែជាដំណោះស្រាយបណ្តោះអាស័ន្នប៉ុណ្ណោះ»។
ខណៈដែលការជជែកដេញដោលខាងនយោបាយប្រកបដោយការរំជួលចិត្ត បានផ្តោតលើជនចំណាកស្រុកដែលបានមកដល់តាមទូកនោះ ដែលចំនួនរបស់ពួកគេបានធ្លាក់ចុះបន្តិចម្តងៗក្នុងប៉ុន្មានឆ្នាំថ្មីៗ គេបានយកចិត្តទុកដាក់បន្តិចបន្តួចដល់ចំនួនមនុស្ស ភាគច្រើនមកពីប្រទេសចិននិងម៉ាឡេស៊ី ដែលបានមកដល់តាមយន្តហោះដើម្បីស្វះស្វែងសុំសិទ្ធិជ្រកកោននៅក្នុងប្រទេសអូស្រ្តាលី៕
ប្រែសម្រួយដោយជឹង ប៉ូជីន
