ប្រធានាធិបតីចិនលោក Xi Jinping នឹងចំណាយពេលភាគច្រើននៃទស្សនកិច្ចរយៈពេល ៥ ថ្ងៃរបស់លោកនៅទ្វីបអឺរ៉ុបក្នុងសប្ដាហ៍នេះនៅក្នុងប្រទេសតូចៗចំនួនពីរនៅភាគខាងកើតនៃទ្វីបនេះ ដែលជាតំបន់ដែលចិនបានប្រើជាជំហរសម្រាប់មហិច្ឆតាពង្រីកសេដ្ឋកិច្ចរបស់ខ្លួននៅទ្វីបអឺរ៉ុប។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
បន្ទាប់ពីបានធ្វើទស្សនកិច្ចនៅទីក្រុងប៉ារីសនៃប្រទេសបារាំងកាលពីថ្ងៃចន្ទដើម្បីចាប់ផ្ដើមដំណើរទស្សនកិច្ចជាលើកដំបូងរបស់លោកទៅកាន់ទ្វីបអឺរ៉ុបនៅក្នុងរយៈពេល ៥ ឆ្នាំចុងក្រោយនេះ លោក Xi នឹងធ្វើដំណើរទៅប្រទេសហុងគ្រីនិងប្រទេសស៊ែប៊ី ដែលជាប្រទេសពីរដែលមានមេដឹកនាំបែបអត្តាធិបតេយ្យ ដែលត្រូវបានគេមើលឃើញថាមានភាពរាក់ទាក់ជាមួយចិននិងមានភាពជិតស្និទ្ធជាមួយនឹងប្រធានាធិបតីរុស្ស៊ីលោក Vladimir Putin។
ស្របពេលដែលបណ្ដាមេដឹកនាំធំៗនៅអឺរ៉ុបបានបន្តអនុវត្តគោលនយោបាយការពារទំនិញក្នុងស្រុកដើម្បីដាក់កំហិតលើឥទ្ធិពលរបស់ចិននិងរុស្ស៊ីនៅទ្វីបអឺរ៉ុប រដ្ឋាភិបាលរបស់មេដឹកនាំអភិរក្សជាតិនិយមលោក Viktor Orban នៃប្រទេសហុងគ្រី និងលោក Aleksandar Vucic នៃប្រទេសស៊ែប៊ីបានទាក់ទាញបង្កើតទំនាក់ទំនងសេដ្ឋកិច្ចជាមួយចិន ដោយអំពាវនាវឱ្យមានការវិនិយោគធំៗលើផ្នែកហេដ្ឋារចនាសម្ព័ន្ធ ផលិតកម្ម ថាមពល និងបច្ចេកវិទ្យា៕
វេទិកាបញ្ចេញមតិ