លោកនាយករដ្ឋមន្ត្រី ហ៊ុន សែន បានរិះគន់ចំៗលើសម្តេចក្រុមព្រះនរោត្តមរណឫទ្ធិ ហើយព្រមាននៅថ្ងៃច័ន្ទនេះកុំឱ្យយកព្រះមហាក្សត្រខ្មែរមកពាក់ព័ន្ធនឹងបញ្ហាព្រំដែនបើមិនដូច្នេះទេអាចនឹងមិនទទួលបានអាសនៈអ្វីទេក្នុងពេលបោះឆ្នោតខាងមុខ។
ប្រតិកម្មខ្លាំងៗរបស់ប្រមុខរដ្ឋាភិបាលកើតឡើងក្រោយពីមានសេចក្តីរាយការណ៍សារព័ត៌មាននានាដកស្រង់បន្ទូលរបស់សម្តេចក្រុមព្រះនរោត្តម រណឫទ្ធិ ដែលបានលើកឡើងថាព្រះមហាក្សត្រមានបំណងកោះប្រជុំមេដឹកនាំនយោបាយសំខាន់ៗដើម្បីពិភាក្សារកដំណោះស្រាយរឿងព្រំដែន។
លោកហ៊ុន សែនបានបន្ថែមថា៖
«បើព្រះអង្គធ្វើតែអញ្ចឹងគឺព្រះអង្គអត់កៅអីហើយ។ ទូលដោយត្រង់ៗក្នុងឋានៈជាអ្នកស្រឡាញ់ទេ បាននិយាយត្រង់ព្រោះធ្វើតាំងពីមានកៅអីរហូតដល់អត់កៅអី ឥឡូវនៅបន្តអញ្ចឹងទៀត។ ពីមុនថាតាមស៊ីកេរិ៍ ស៊ីកេរិ៍សម្តេចព្រះបិតាឥឡូវចង់មកស៊ីកេរិ៍ព្រះអនុជអាម៉េច?សុំប៉ុណ្ណឹងបានទេ? ឱ្យចេះឈរលើជើងខ្លួនឯងបានទេ?»
លោកនាយករដ្ឋមន្ត្រីក៏បានរំលឹកឡើងវិញនូវអ្វីដែលសម្តេចក្រុមព្រះបានមានបន្ទូលកន្លងមកថា៖
«មកធ្វើនយោបាយអីចឹង។ មកថាសុំរាជរដ្ឋាភិបាលពន្យាបោះបង្គោលព្រំដែនដូចបក្សប្រឆាំងនិយាយ រួចហើយថាព្រះមហាក្សត្រផ្តួចផ្តើមគំនិតដើម្បីឱ្យគណបក្សទាំងបី»។
សម្តេចក្រុមព្រះនរោត្តម រណឫទ្ធិ ប្រធានគណបក្សរាជានិយមហ៊្វុនស៊ីនប៉ិចហាក់បានបង្ហាញជំហរស្របតាមការទាមទាររបស់គណបក្សប្រឆាំងដែលសុំឱ្យរដ្ឋាភិបាលផ្អាកការបោះបង្គោលព្រំដែនជាមួយនឹងប្រទេសវៀតណាមមួយរយៈសិនក្នុងពេលដែលអ្នកនយោបាយនៅមិនទាន់មានមតិរួមគ្នារឿងព្រំដែន។
បញ្ហាព្រំដែនរវាងប្រទេសកម្ពុជានិងប្រទេសវៀតណាមបានឡើងកម្តៅជាថ្មីបន្ទាប់ពីសកម្មជនព្រំដែនដឹកនាំដោយគណបក្សសង្គ្រោះជាតិបានធ្វើដំណើរទៅពិនិត្យមើលតំបន់ជាប់ព្រំដែនដែលប្រជាពលរដ្ឋរាយការណ៍ថាប្រទេសវៀតណាមបានរំលោភចូលជាច្រើនកន្លែង។
ក្នុងពេលកន្លងមកក៏ មានការប៉ះទង្គិចគ្នារវាងសកម្មជនព្រំដែនកម្ពុជានិងទាហាននិងកសិករវៀតណាមដែលបណ្តាលឱ្យមនុស្សជាង១០នាក់រងរបួស៕
