លោកនាយករដ្ឋមន្ត្រី ហ៊ុន សែន អំពាវនាវឱ្យពលរដ្ឋខ្មែរនិងមេទ័ពដែលធាត់ខ្លាំង ធ្វើការតម ចំណី និងការហាត់ប្រាណឱ្យបានជាប្រចំា ដើម្បីទទួលបានសុខភាពល្អ រឹងមាំដូចលោក។
ក្នុងសារខ្លីមួយដែលផ្សាយតាមទំព័រហ្វេសប៊ុកផ្ទាល់ខ្លួនកាលពីថ្ងៃព្រហស្បតិ៍ លោក ហ៊ុន សែន ដែលកាន់អំណាចជាង៣០ឆ្នាំ បានសរសេរថា៖
«សព្វថ្ងៃនេះ ខ្ញុំក៏សង្កេតឃើញមេទ័ពយើងដុះពោះច្រើនដែរ។ វិធីដែលធ្វើឲ្យមេទ័ពមានរូបរាងសង្ហាឡើងវិញគឺឲ្យមេទ័ពយើងស្ពាយបាឡូដាក់ដុំឥដ្ឋដើរ ឬរត់ឡើងទួល គឺនឹងស្រកហើយ។ ពិតណាស់ គឺមានតែវិធីហាត់ប្រាណតែមួយគត់ដែលជួយសម្រកទម្ងន់បានលឿន ហើយធ្វើឲ្យសុខភាពល្អរឹងមាំ»។
ការសិក្សាស្រាវជ្រាវមួយនៅក្នុងឆ្នាំ២០១០ ដែលធ្វើឡើងដោយក្រសួងសុខាភិបាលកម្ពុជានិងអង្គការសុខភាពពិភពលោក បង្ហាញថា ប្រជាជនកម្ពុជា ប្រមាណ១៥,៤ភាគរយប្រឈមនឹងការលើសទម្ងន់និងធាត់ជ្រុល ហើយមនុស្សពេញវ័យជាង៥ភាគរយ ដែលកំពុងរស់នៅក្នុងទីក្រុង និងទីប្រជុំជន មានជំងឺទឹកនោមផ្អែម។
យ៉ាងណាក៏ដោយ លោក ហ៊ុន សែន បញ្ជាក់ថា ខ្លួនលោកផ្ទាល់បានធ្វើការតមចំណី និងហាត់ប្រាណជាប្រចាំដែលធ្វើឱ្យទម្ងន់ខ្លួនលោកស្រកចុះពី៨៦គីឡូក្រាមមកនៅត្រឹម៧២ហើយលោកមានបំណងបន្ថយទម្ងន់របស់លោកឱ្យនៅត្រឹម៦៨គីឡូក្រាមនៅពេលខាងមុខ។ លោកថា លោកសម្រកទម្ងន់ដោយជោគជ័យគឺការបង្អត់អាហារពេលល្ងាយ និងហាត់ប្រាណជាប្រចាំ៕
