លោកនាយករដ្ឋមន្ត្រី ហ៊ុន សែន នៅថ្ងៃអង្គារនេះ បានឆ្លងជំងឺកូវីដ១៩ នៅពេលលោកបានទៅចូលរួមកិច្ចប្រជុំនៅកោះបាលីនៃប្រទេសឥណ្ឌូណេស៊ី។
លោក ហ៊ុន សែន បានចេញដំណើរទៅប្រទេសឥណ្ឌណេស៊ី កាលពីរសៀលថ្ងៃចន្ទ ក្រោយពីបានរៀបចំនិងដឹកនាំកិច្ចប្រជុំអាស៊ាន ដែលកម្ពុជាបានធ្វើជាម្ចាស់ផ្ទះដើម្បីចូលរួមកិច្ចប្រជុំកំពូល G20 នៃក្រុមប្រទេសដែលមានសេដ្ឋកិច្ចជឿនលឿនទាំង ២០។
បើតាមលោក ហ៊ុន សែន មុនធ្វើដំណើរចេញពីកម្ពុជា លោកបានធ្វើតេស្តរាល់ថ្ងៃ ពិសេសមុនពេលចេញដំណើរ ប៉ុន្តែលទ្ធផលឃើញថាមិនមានជំងឺកូវីដ១៩ នោះទេ។
លោកបានបង្ហោះសារលើហ្វេសប៊ុកថា៖ «ខ្ញុំមិនច្បាស់ថាមេរោគនេះមកនៅជាមួយខ្លួនខ្ញុំចាប់ពីពេលណាមកនោះឡើយ តែអ្វីដែលច្បាស់ពេលមកដល់ពេទ្យឥណ្ឌូណេស៊ីយកសំណាកពេលល្ងាច លុះព្រឹកឡើងបញ្ជាក់ថា វិជ្ជមានកូវីដ១៩ ដែលយើងត្រូវតែទទួលស្គាល់ បើទោះជាក្នុងខ្លួនយើងមិនមានអាការៈចម្លែកក៏ដោយ»។
មុនធ្វើដំណើរទៅកោះបាលី លោក ហ៊ុន សែន បានជួបជាមួយព្រះចៅស៊ុលតង់ ហាជី ហាសសាណាល់ បុលគីយ៉ាស់ មុយ អ៊ីហ្សាឌីន វ៉ាឌូឡាហ៍ ព្រះមហាក្សត្រនៃប្រ៊ុយណេដារូស្សាឡាម ដែលបានមកចូលរួមកិច្ចប្រជុំអាស៊ាន។ នៅពេលចាប់ដៃគ្នា លោក ហ៊ុន សែន បានពាក់ម៉ាសផងដែរ។
លោក ហ៊ុន សែន បានលើកឡើងបន្ថែមក្នុងសារតាមហ្វេសប៊ុកថា លោកមិនបានទៅចូលរួមបាយល្ងាចជាមួយប្រមុខរដ្ឋ ប្រមុខរដ្ឋាភិបាលមួយចំនួនដែលត្រូវបានរៀបចំដោយប្រធានាធិបតីបារាំង នៅកោះបាលី ដោយសារលោកបានទៅដល់យឺត។
ដើម្បីសុវត្ថិភាព លោក ហ៊ុន សែន និងប្រតិភូដែលចូលរួមប្រជុំ នឹងត្រឡប់មកកម្ពុជាវិញនាល្ងាចថ្ងៃអង្គារនេះ។ នេះបើតាមលោក ហ៊ុន សែន។
លោក ផៃ ស៊ីផាន អ្នកនាំពាក្យរដ្ឋាភិបាល ប្រាប់វីអូអេនៅព្រឹកថ្ងៃអង្គារនេះថា ប្រហែលជានាយករដ្ឋមន្ត្រីផ្តាសាយធំតែប៉ុណ្ណោះ ប៉ុន្តែលោកត្រូវតែគោរពតាមលទ្ធផលនៃការធ្វើតេស្ត។
លោកបញ្ជាក់ថា៖ «អ្វីដែលយើងធ្លាប់មានការពិសោធន៍ហ្នឹង ប្រហែលជាផ្តាសាយធំទេមើលទៅ។ យើងមើលអាការៈលោកទាំងពីរ លោកទទួលភ្ញៀវថ្ងៃចុងក្រោយហ្នឹង គឺលោកអស់កម្លាំងហ្មង អស់កម្លាំងខ្លាំងមែនទែន លោកស្ទើរតែលើកជើងលែងចង់រួចនៅពេលដើរ»។
លោក ហ៊ុន សែន នឹងអាក់ខានជួបជាមួយប្រធានាធិបតីចិននិងប្រធានាធិបតីបារាំង ដែលគ្រោងជួបគ្នានៅបាងកកនៃប្រទេសថៃ នាពេលប្រជុំ APEC នាសប្តាហ៍នេះ។
នៅទីក្រុងភ្នំពេញ លោកបានជួបមេដឹកនាំមួយចំនួនក្នុងជំនួបទ្វេភាគី ក្នុងនោះរួមមានប្រធានាធិបតីសហរដ្ឋអាមេរិក នាយករដ្ឋមន្ត្រីកាណាដា ជប៉ុន ឥណ្ឌា និងអគ្គលេខាធិការអាស៊ានជាដើម។ បើតាមសេតវិមាន លោក Joe Biden ប្រធានាធិបតីសហរដ្ឋអាមេរិក បានធ្វើតេស្តកូវីដ ហើយលទ្ធផលបង្ហាញថាអវិជ្ជមាន គិតត្រឹមថ្ងៃអង្គារនេះ៕
