លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះ បានណែនាំទៅឯកអគ្គរដ្ឋទូតអឺរ៉ុបប្រចាំនៅកម្ពុជាឲ្យប្រុងប្រយ័ត្នចំពោះការទទួលព័ត៌មានពីក្រុមផ្សេង ដែលលោកថាខុសពីការពិតនៅកម្ពុជា។
លោក ហ៊ុន សែន បានថ្លែងបែបនេះនៅក្នុងពិធីបិទនិងប្រគល់សញ្ញាបត្រដល់និស្សិតសាលាភូមិន្ទរដ្ឋបាល ដែលអ្នកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា ត្រូវបានអញ្ជើញឲ្យចូលរួមផងដែរ។
លោក ហ៊ុន សែន ប្រាប់ឯកអគ្គរដ្ឋទូតអឺរ៉ុបដែលអង្គុយនៅពីក្រោយលោកពេលលោកកំពុងថ្លែងសុន្ទរកថាថាកម្ពុជាពិតខុសពីកម្ពុជានៅលើសារព័ត៌មាន។ លោកបន្ថែមថាការបង្ហោះហ្វេសប៊ុករបស់ក្រុមណាមួយ ឬបុគ្គលណាមួយដែលលោកមិនបានបញ្ចេញឈ្មោះ «និយាយអាក្រក់ណាស់» ដែលរួមមានការជេរប្រមាថ និងប្រើប្រាស់«ភាសាញុះញង់» ដែលលោកមិនអាចទទួលយកបាន។
លោក ហ៊ុន សែន បញ្ជាក់ថា៖ «ទេ ខ្ញុំមិនមែនធ្វើបឋកថាសម្រាប់អប់រំអគ្គរដ្ឋទូតសហភាពអឺរ៉ុបនៅទីនេះទេ ក៏ប៉ុន្តែខ្ញុំគ្រាន់តែជូនជាយោបល់ ព្រោះលោកជំទាវធ្លាប់ឲ្យអនុសាសន៍មកខ្ញុំដែរ។ ខ្ញុំក៏គួរឲ្យអនុសាសន៍ទៅលោកជំទាវតើគួរធ្វើម៉េច ដើម្បីដឹងពិត។ មានសិទ្ធិនិយាយ»។
លោក ហ៊ុន សែន មិនបានបញ្ជាក់ការថ្លែងរបស់លោកក្នុងបរិបទអ្វីឡើយ។ ប៉ុន្តែលោកបានលើកឡើងអំពីបំណង«បំផ្លាញ»ផែនការចាក់វ៉ាក់សាំងបង្ការជំងឺកូវីដ១៩នៅក្នុងប្រទេសកម្ពុជា។
កាលពីថ្ងៃទី២៣ ខែឧសភា ឆ្នាំ២០២២ ឯកអគ្គរដ្ឋទូតសហភាពអឺរ៉ុប ឯកអគ្គរដ្ឋទូតបារាំង និងឯកអគ្គរដ្ឋទូតអាល្លឺម៉ង់ បានជួបជាមួយមន្ត្រីជាន់ខ្ពស់គណបក្សភ្លើងទៀន ដឹកនាំដោយលោក សុន ឆ័យ អនុប្រធានគណបក្សនេះ ដោយជជែកគ្នាអំពីបញ្ហាប្រឈមនៃដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់ និងលទ្ធិប្រជាធិបតេយ្យនៅពេលអនាគត។
គួរបញ្ជាក់ថាកាលពីដើមខែឧសភា ឆ្នាំ២០២២ សមាជិកសភាអឺរ៉ុបភាគច្រើនលើសលប់ បានបោះឆ្នោតសម្រេចលើញត្តិមួយ ដោយបង្ហាញក្តីព្រួយបារម្ភអំពីការបន្តបង្រ្កាបនយោបាយនៅកម្ពុជា។ សភាអឺរ៉ុបឲ្យដឹងថាសមាជិកសភាអឺរ៉ុបបានបង្ហាញ«ក្តីព្រួយបារម្ភយ៉ាងខ្លាំង»ទៅលើការដើរថយក្រោយនៃសិទ្ធិមនុស្សក្នុងប្រទេសកម្ពុជា នៅមុនការបោះឆ្នោតឃុំសង្កាត់នៅក្នុងខែមិថុនា ឆ្នាំ២០២២ និងការបោះឆ្នោតថ្នាក់ជាតិនៅឆ្នាំ២០២៣។
ពួកគេក៏បានអំពាវនាវជាថ្មីឲ្យទម្លាក់ចោលការចោទប្រកាន់ជាបន្ទាន់លើលោក កឹម សុខា លោក សម រង្ស៊ី អ្នកស្រី មូរ សុខហួរ និងមន្រ្តីបក្សប្រឆាំងផ្សេងទៀត៕
