ភ្ជាប់​ទៅ​គេហទំព័រ​ទាក់ទង

លោក​ហ៊ុន សែន​ព្រមាន​សកម្មភាព​នយោបាយ​ក្រោម​ស្លាប​សិទ្ធិ​មនុស្ស និង​លទ្ធិ​ប្រជាធិបតេយ្យ


លោកស្រី រ៉ូណា ស្មីត (Rhona Smith) អ្នក​រាយការណ៍​ពិសេស​របស់​អង្គការ​សហប្រជាជាតិអំពី​សិទ្ធិមនុស្ស​នៅ​កម្ពុជា ថត​រូប​ជាមួយ​នឹង​លោក​នាយក​រដ្ឋ​មន្ត្រី ហ៊ុន សែន ក្នុង​ជំនួប​មួយ​នៅ​ឯ​វិមាន​សន្តិភាពនៅ​រាជធានី​ភ្នំពេញ កាល​ពី​ថ្ងៃច័ន្ទ ទី២១ ខែ​កញ្ញា ឆ្នាំ២០១៥។ លោកស្រី រ៉ូណា ស្មីត​ បាន​ជួប​ជាមួយ​នឹង​លោក​ ហ៊ុន សែន​ ក្នុង​អំឡុង​ដំណើរ​ទស្សនកិច្ច​ដំបូង​បង្អស់​របស់​លោក​ស្រី​មក​កាន់​ប្រទេស​កម្ពុជា ក្រោយ​ពេល​ដែល​លោក​ស្រី​បាន​កាន់​តំណែង​នេះជំនួសលោក សូរិយា ប្រាសាទ​ស៊ូប៊េឌី។ (AP/ហេង ស៊ីនិត)

​រដ្ឋាភិបាល​កម្ពុជា​ថ្លែង​ថា​​នឹង​វាយ​បំបាក់​ និង​ទប់​ស្កាត់​រាល់​សកម្ម​ភាព​ និង​ល្បិចកល​ក្រោម​ស្លាក​«លទ្ធិ​ប្រជា​ធិបតេយ្យ​ និង​សិទ្ធិ​មនុស្ស​ ដែល​បម្រើ​ផល​ប្រយោជន៍​នយោបាយ​របស់​បុគ្គល​ ឬ​ក្រុម​មនុស្ស​មួយ​ក្តាប់​តូច»​ ដើម្បី​ថែរក្សា​សន្តិភាព​នៅ​ក្នុង​ប្រទេស។

ប្រមុខ​រាជ​រដ្ឋាភិបាល​កម្ពុជា​ថ្លែង​ថា​ លោក​នឹង​វាយ​បំបាក់​ ហើយ​ទប់​ស្កាត់​រាល់​សកម្ម​ភាព​ និង​ល្បិចកល​ក្រោម​ស្លាក​«លទ្ធិ​ប្រជា​ធិបតេយ្យ​ និង​សិទ្ធិ​មនុស្ស​ ដែល​បម្រើ​ផល​ប្រយោជន៍​នយោបាយ​របស់​បុគ្គល​ ឬ​ក្រុម​មនុស្ស​មួយ​ក្តាប់​តូច»​ ដើម្បី​ថែរក្សា​សន្តិភាព​នៅ​ក្នុង​ប្រទេស។​

សកម្ម​ជន​សិទ្ធិ​មនុស្ស​ និង​អ្នក​វិភាគ​សង្គម​នៅ​ប្រទេស​កម្ពុជា​យល់​ថា​ កម្ពុជា​អាច​មាន​សន្តិភាព​តាម​រយៈ​ការ​ត្រៀម​វាយ​បំបាក់​នេះ​ តែ​ពួក​គេ​ថា​ សន្តិភាព​ដែល​បាន​មក​ពី​មធ្យោបាយ​នេះ​មិន​មែន​ជា​សន្តិភាព​ពិតនោះ​ទេ។​ ពួកគេ​ថា អស្ថិរភាព​ក្នុង​សង្គម​អាច​កើត​មាន​ ប្រសិន​បើ​រដ្ឋាភិបាល​មិន​ធ្វើ​ការ​ផ្លាស់​ប្តូរ​របៀប​គ្រប់គ្រង​ មិន​ដោះ​ស្រាយ​បញ្ហា​ជូន​ប្រជាពលរដ្ឋ​ខ្មែរ​ដែល​រង​គ្រោះ​ដោយ​ទំនាស់​ដីធ្លី​ និង​ការ​ចាប់​ចង​ពី​អាជ្ញាធរ​មាន​សមត្ថកិច្ច​ជាដើម។​

លោក​នាយក​រដ្ឋមន្រ្តី​ ហ៊ុន សែន​ ថ្លែង​នៅ​ក្នុង​សារលិខិត​មួយ​ថា​ រដ្ឋាភិបាល​កម្ពុជា​នឹង​បន្ត​ថែ​រក្សា​សន្តិភាព​ដល់​ប្រជា​ពលរដ្ឋ​កម្ពុជា​ ដោយ​ការ​កម្ចាត់​ចលនា​បម្រើ​នយោបាយ​តាម​រយៈ​ការ​យក​លទ្ធិ​ប្រជា​ធិបតេយ្យ​ និង​សិទ្ធិ​មនុស្ស​ធ្វើ​ជា​ខែល​ និង​បន្ត​អនុវត្ត​វប្បធម៌​សន្ទនា ​ដែល​កើត​ចេញ​ពី​កិច្ច​ព្រម​ព្រៀង​នយោបាយ​ចុះ​នៅ​ថ្ងៃ​ទី​២២​ ខែ​កក្កដា​ឆ្នាំ​២០១៤ ​រវាង​គណបក្ស​កាន់​អំណាច​ និង​គណបក្ស​ប្រឆាំង។​

លិខិត​របស់​លោក​នាយក​រដ្ឋមន្ត្រី ​ហ៊ុន​ សែន ធ្វើ​ឡើង​នៅ​ចំ​ថ្ងៃ​នៃ​ការ​ប្រារព្ធ​ «ទិវា​សន្តិភាព​អន្តរជាតិ​លើក​ទី​១៣»​ នៅ​ថ្ងៃ​ទី​២១ ​ខែ​កញ្ញា​ ឆ្នាំ​២០១៥​នេះ។​

នៅ​ក្នុង​លិខិត​របស់​លោក​ចុះ​នៅ​ថ្ងៃ​ច័ន្ទ​ទី​២១​ ខែ​កញ្ញា​នេះ​ លោក​នាយក​រដ្ឋមន្ត្រី​ដ៏​មាន​ឥទ្ធិពល​បាន​សរសេរ​ថា៖ ​«ទន្ទឹម​នឹង​ការ​រីក​ចម្រើន​ក្នុង​វិស័យ​សេដ្ឋកិច្ច​ និង​សង្គម​ ការ​លើក​ស្ទួយ​នីតិរដ្ឋ​ ការ​អនុវត្ត​លទ្ធិ​ប្រជា​ធិបតេយ្យ​ និង​ការ​ការ​ពារ​សិទ្ធិ​មនុស្ស​ក៏​កំពុង​មាន​ដំណើរ​ការ​ល្អ​នៅ​ក្នុង​ក្រប​ខណ្ឌ​រដ្ឋ​ធម្មនុញ្ញ​ ច្បាប់​ប្រទេស​ជាតិ​ និង​សេចក្តី​ប្រកាស​ជា​សាកល​ស្តីពី​សិទ្ធិ​មនុស្ស​ ដើម្បី​ធានា​ជូន​ប្រជាពលរដ្ឋ​គ្រប់​រូប​នូវ​សិទ្ធិ​សេរីភាព​ជា​មូលដ្ឋាន​ក្នុង​ការ​រួម​ចំណែក​ការ​ពារ​អធិបតេយ្យ​ភាព​ជាតិ​ បូរណភាព​ដែន​ដី​ និង​ការ​អភិវឌ្ឍ​ប្រទេស​ជាតិ»។​

លោក​សង្កត់​ធ្ងន់​ថា៖​ «ជាមួយ​គ្នា​នេះ​ រាជ​រដ្ឋាភិបាល​ក៏​មាន​ការ​ប្តេជ្ញា​ខ្ពស់​ផង​ដែរ​ ក្នុង​ការ​វាយ​បំបាក់​ និង​ទប់​ស្កាត់​រាល់​សកម្ម​ភាព​ និង​ល្បិចកល​ក្រោម​ស្លាក​«លទ្ធិ​ប្រជា​ធិបតេយ្យ​ និង​សិទ្ធិ​មនុស្ស»​ ដែល​បម្រើ​ផល​ប្រយោជន៍​នយោបាយ​របស់​បុគ្គល​ ឬ​ក្រុម​មនុស្ស​មួយ​ក្តាប់​តូច»។​

លោក​នាយក​រដ្ឋ​មន្រ្តី​ហ៊ុន​ សែន​ និង​លោក​សម​ រង្សី​ ប្រធាន​គណបក្ស​សង្គ្រោះ​ជាតិ​ ចាប់​ដៃ​គ្នា​នៅ​មុខរដ្ឋសភាជាតិ​ បន្ទាប់​ពី​ការ​បោះឆ្នោត​ផ្តល់​សេចក្តី​ទុក​ចិត្ត​គណៈកម្មាធិការ​ជាតិ​រៀបចំ​ការបោះឆ្នោត ​រាជធានី​ភ្នំពេញ​ ថ្ងៃ​ទី​៩​ ខែ​មេសា​ ឆ្នាំ​២០១៥។ (នូវ​ ពៅ​លក្ខិណា/VOA)
លោក​នាយក​រដ្ឋ​មន្រ្តី​ហ៊ុន​ សែន​ និង​លោក​សម​ រង្សី​ ប្រធាន​គណបក្ស​សង្គ្រោះ​ជាតិ​ ចាប់​ដៃ​គ្នា​នៅ​មុខរដ្ឋសភាជាតិ​ បន្ទាប់​ពី​ការ​បោះឆ្នោត​ផ្តល់​សេចក្តី​ទុក​ចិត្ត​គណៈកម្មាធិការ​ជាតិ​រៀបចំ​ការបោះឆ្នោត ​រាជធានី​ភ្នំពេញ​ ថ្ងៃ​ទី​៩​ ខែ​មេសា​ ឆ្នាំ​២០១៥។ (នូវ​ ពៅ​លក្ខិណា/VOA)

ទាក់​ទិន​វប្បធម៌​សន្ទនា​ លោក​នាយក​រដ្ឋ​មន្ត្រី​សរសេរ​ថា​ «ខ្ញុំ​សូម​អំពាវ​នាវ​ដល់​ជន​រួម​ជាតិ​ ព្រម​ទាំង​អង្គការ​អន្តរជាតិ​ និង​សង្គម​ស៊ីវិល​ទាំង​អស់​នៅ​កម្ពុជា​ សូម​បន្ត​ពួត​ដៃ​គ្នា​អនុវត្ត​ និង​គាំទ្រ​ស្មារតី​«ទិវា​សន្តិភាពអន្តរជាតិ​នេះ»​ និង​បន្ត​អនុវត្ត​«វប្បធម៌​សន្ទនា»​ឲ្យ​បាន​ខ្ជាប់​ខ្ជួន​ និង​បន្ត​ខិតខំ​ថែ​បំប៉ន​ ពង្រឹង​ និង​ផ្សព្វផ្សាយ​ឲ្យ​បាន​ទូលំទូលាយ​នូវ​ការ​យល់​ដឹង​អំពី​គ្រឹះ​មូលដ្ឋាន​ទ្រទ្រង់​សន្តិភាព​ ដែល​មាន​ជា​អាទិ៍​ ការ​លើក​កម្ពស់​វប្បធម៌​អហិង្សា​ ការ​អត់​ធ្មត់​ ការ​យោគយល់​ ការ​អធ្យាស្រ័យ​ ការ​សន្តោស​ប្រណី​រាប់​អាន​គ្នា​ជា​ភាតរៈនៅ​ក្នុង​សង្គម​ជាតិ​យើង»។​

សកម្ម​ជន​សិទ្ធិ​មនុស្ស​ និង​អ្នក​វិភាគ​សង្គម​យល់​ឃើញ​ថា​ ការ​ទប់​ស្កាត់​សកម្ម​ភាព​នេះ​ជា​ការ​ប្រសើរ​មួយ​ ដើម្បី​ធានា​សន្តិសុខ​សង្គម​ តែ​ពួកគេ​ថា​ រដ្ឋាភិបាល​គួរ​ធ្វើ​ឲ្យ​ប្រជា​ពលរដ្ឋ​ខ្មែរ​មាន​សុវត្ថិ​ភាព​ផ្លូវ​ចិត្ត​ ដោយ​ធ្វើ​យ៉ាង​ណា​ឲ្យ​ប្រជា​ពលរដ្ឋ​ខ្មែរ​ឈប់​ឮ​ពាក្យ​សម្តី​គំរាម​កំហែង​ពី​មេ​ដឹកនាំ​របស់​ពួក​គេ​ និង​បញ្ចៀស​វិបត្តិ​នយោបាយ​ ដែល​កើតមានក្រោយ​ការ​បោះ​ឆ្នោត។

ពួក​គេ​ថា​ រដ្ឋាភិបាល​ក៏​ត្រូវ​ដោះ​ស្រាយ​វិបត្តិ​សង្គម​ដែល​កំពុង​កើត​មាន​នៅ​ក្នុង​ប្រទេស​កម្ពុជា​ដែរ​ ក្នុងនោះ​រួមមាន​វិបត្តិ​ដីធ្លី​ និង​ភាព​និទណ្ឌ​ភាព​ ដែល​មាន​ការ​រើសអើង​ជា​ដើម។​

លោក​ អំ សំអាត​ ប្រធាន​បច្ចេកទេស​ស៊ើប​អង្កេត​នៃ​អង្គ​ការ​សិទ្ធិ​មនុស្ស​លីកាដូ​ មាន​ប្រសាសន៍​ប្រាប់​វីអូអេ​ថា​ លោក​សាទរ​ចំពោះ​ចំណាត់​ការ​របស់​រដ្ឋាភិបាល​ក្នុង​ការ​បង្ក្រាបជន​ដែល​យក​ស្លាក​ប្រជា​ធិប​តេយ្យ​មក​ប្រើ​ ដើម្បី​បម្រើ​សកម្ម​ភាព​នយោបាយ​ ហើយ​ថា ​ប្រទេស​កម្ពុជា​ពិត​ជា​ទទួល​បាន​សន្តិភាព​ គ្មាន​សង្គ្រាម​ក្នុង​ស្រុក​កាល​ពី​ឆ្នាំ​១៩៩៨​ តែ​ចាប់​តាំង​ពី​ពេល​នោះ​មក​ ពលរដ្ឋ​កម្ពុជា​តែង​តែ​បាន​ឃើញ​នូវ​ការ​តវ៉ា ​និង​ការ​ធ្វើ​បាតុកម្ម​ស្ទើរ​តែ​រាល់​លើក ​ក្រោយ​ការ​បោះឆ្នោត។

ការ​តវ៉ា​ប្រឆាំង​ការអនុម័ត​របស់​រដ្ឋសភា​ លើ​សេចក្តី​ព្រាង​ច្បាប់​ស្តី​ពី​សមាគម​និង​អង្គការ​មិន​មែន​រដ្ឋាភិបាល​ នៅ​ក្បែរ​រដ្ឋសភា​ជាតិ​ កាល​ពី​ថ្ងៃ​ទី​១៣​ ខែ​កក្កដា​ ឆ្នាំ​២០១៥។ (នូវ​ ពៅ​លក្ខិណា/VOA)​
ការ​តវ៉ា​ប្រឆាំង​ការអនុម័ត​របស់​រដ្ឋសភា​ លើ​សេចក្តី​ព្រាង​ច្បាប់​ស្តី​ពី​សមាគម​និង​អង្គការ​មិន​មែន​រដ្ឋាភិបាល​ នៅ​ក្បែរ​រដ្ឋសភា​ជាតិ​ កាល​ពី​ថ្ងៃ​ទី​១៣​ ខែ​កក្កដា​ ឆ្នាំ​២០១៥។ (នូវ​ ពៅ​លក្ខិណា/VOA)​

លោក​បញ្ជាក់​ថា​ ការណ៍​នេះ​មិន​បាន​ផ្តល់​សន្តិភាព​ផ្លូវ​ចិត្ត​ដល់​ប្រជា​ពលរដ្ឋ​នោះ​ទេ​ ហើយ​ក៏មិន​អាច​ឆ្លុះ​បញ្ចាំង​ឲ្យ​ឃើញ​ថា ​កម្ពុជា​មាន​សន្តិភាព​ពេញ​លេញ​នោះ​ដែរ។​

«យើង​ចង់​បាន​ថា​ ធ្វើ​យ៉ាង​ម៉េច​ក៏ដោយ​ អ្នក​នយោបាយ​ទាំង​អស់​ នៅ​ពេល​ដែល​មាន​ការ​បោះ​ឆ្នោត​ហ្នឹង​ បាន​ន័យ​ថា​ ការ​បោះ​ឆ្នោត​ហ្នឹង​ប្រកប​ដោយ​សេរី​យុត្តិធម៌​ និង​ត្រឹម​ត្រូវ ​ហើយ​ក្រោយ​ពេល​បោះ​ឆ្នោត​គឺ​គ្រប់​គណបក្ស​នយោបាយ​ទាំង​អស់​ បាន​ន័យ​ថា​ ទទួល​ស្គាល់​ មិន​មាន​ការ​ធ្វើ​ការ​ជំទាស់​តវ៉ា​រហូត​ទៅ​ដល់​មាន​ការ​បង្ក្រាប​ ធ្វើឲ្យ​ប៉ះពាល់​ទៅ​ដល់​អាយុ​ជីវិត​ ឬក៏​រាងកាយ​ និង​ផ្លូវ​ចិត្ត​របស់​ប្រជា​ពលរដ្ឋ​នោះ​ទេ។ ​អាហ្នឹង​បាន​ជា​សុខ​សន្តិភាព​ពេញលេញ»។​

លោក​ កែម​ ឡី​ អ្នក​វិភាគ​សង្គម​ និង​ជា​អ្នក​តាមដាន​នយោបាយ​យ៉ាង​ដិតដល់​ យល់​ឃើញ​ថា​ ភាព​វឹក​វរ​ក្នុង​សង្គម​កម្ពុជា​អាច​នឹង​កើត​មាន​ឡើង​ដោយ​ជៀស​មិន​រួច​ ប្រសិន​បើ​រាជ​រដ្ឋាភិបាល​នៅ​រក្សា​របៀប​ដឹក​នាំ​ ដែល​ផ្តេក​ផ្តួល​លើ​ទស្សនៈ​បុគ្គល​និយម​ និង​យក​អំណាច​កងទ័ព​ជា​ធំ។​

«ខ្ញុំ​មើល​ទៅ​ ជៀស​មិន​ផុត​ពី​ភាព​វឹក​វរ​ក្នុង​សង្គម​ទេ។​ បើសិន​ជា​គាត់​មិន​មាន​កំណែ​ទម្រង់​ច្បាស់​លាស់​ ជៀស​មិន​ផុត​ពី​បដិវត្តន៍​ ការ​បះបោរ​ទេ។​ ប្រសិន​បើ​បញ្ហា​សង្គម​ ដែល​កើត​ឡើង​រាល់​ថ្ងៃ​ វា​ទៅ​ជា​រ៉ាំរ៉ៃ​ វា​ទៅ​មហារីក​ ឧទាហរណ៍​ ការ​រំលោភ​សិទ្ធិ​មនុស្ស​ ប្រព័ន្ធ​យុត្តិ​ធម៌​ ឬក៏​បំណុល​ពលរដ្ឋ​រាល់​ថ្ងៃ​នេះ​ អាច​បង្ក​ឲ្យ​មាន​បដិវត្តន៍។​ ប្រសិន​ជា​គាត់​មិន​ព្យាយាម​ដោះ​ស្រាយ​ ឬ​ក៏​មូលហេតុ​នៃ​បញ្ហា​ និង​ឬស​គល់​នៃ​បញ្ហា​ ហើយ​គាត់​ព្យាយាម​រើស​ទ័ព​ ពង្រឹង​កម្លាំង​ទ័ព​ ដើម្បី​បង្ក្រាប​បញ្ហា​ វា​អត់​ទទួល​បាន​ជោគ​ជ័យ​យូរ​អង្វែង​ទេ។​ វា​គ្រាន់​តែ​ទទួល​បាន​ជោគ​ជ័យ​មួយ​រយៈ​ណា​ណាស់»។​

នៅ​ក្រោយ​ការ​បោះ​ឆ្នោតឆ្នាំ​២០១៣​ សកម្មភាព​តវ៉ា​ និង​ការ​ធ្វើ​បាតុកម្ម​បាន​កើត​ឡើង​ជា​បន្តបន្ទាប់។​ ការ​តវ៉ា​ និង​ការ​ធ្វើ​បាតុកម្ម​នា​ពេល​នោះ​ទទួល​បាន​នូវ​ការ​ឆ្លើយ​តប​យ៉ាង​ហិង្សា​ពី​កម្លាំង​ប្រដាប់​អាវុធ​របស់​រដ្ឋាភិបាល។​

ព្រឹត្តិ​ការណ៍​បង្ក្រាប​ដ៏​ហិង្សា​ពី​ក្រុម​សមត្ថ​កិច្ច​បាន​កើត​ឡើង​កាលពី​យប់​ថ្ងៃ​ទី​១៥ ​ខែ​កញ្ញា ​ឆ្នាំ​២០១៣ ​នៅ​លើ​ស្ពាន​ក្បាលថ្នល់។​ នៅ​ក្នុង​ព្រឹត្តិ​ការណ៍​នោះ​ មនុស្ស​ម្នាក់​បាន​ស្លាប់​ និង​យ៉ាងតិច​១០​នាក់​ផ្សេង​ទៀត​ត្រូវ​កង​កម្លាំង​មាន​សមត្ថកិច្ច​បាញ់​ឲ្យ​រងរបួស។ ​កាលពី​ថ្ងៃទី៣ ​ខែ​មករា​ ឆ្នាំ​២០១៤​ មាន​មនុស្ស​យ៉ាងហោច​ណាស់​ប្រាំ​នាក់​បាន​ស្លាប់​ និង​២៣​នាក់​ផ្សេង​ទៀត​បាន​រង​របួស​នៅ​ក្នុង​ព្រឹត្តិ​ការណ៍​បង្រ្កាប​បាតុកម្ម ​ដោយ​ការបាញ់​រះ​មួយ​ពី​ក្រុម​សមត្ថ​កិច្ច​នៅ​តំបន់​សួន​ឧស្សហ​កម្ម​កាត់​ដេរ​កាណាឌីយ៉ា​ក្នុង​ទី​ក្រុង​ភ្នំពេញ។​

ចាប់​តាំង​ពីពេល​នោះ​មក​ រាជ​រដ្ឋាភិបាល​កម្ពុជា​ពុំ​បាន​រក​ឃើញ​ជន​បង្កហេតុ​នៅ​ក្រោយ​ហេតុការណ៍​ទាំង​នោះ​ទេ​ ទោះ​បី​ជាមាន​ការ​បង្កើត​គណៈ​កម្មាការ​ស៊ើប​អង្កេត​ក៏ដោយ។ នេះ​បើ​តាម​ការ​បញ្ជាក់​ពី​សកម្មជន​សិទ្ធិ​មនុស្ស។​

ដោយ​ឡែក​ នៅ​ថ្ងៃ​ដដែល​នេះ​ដែរ​ លោក​នាយក​រដ្ឋមន្ត្រី​ ហ៊ុន សែន ​បាន​ជួប​ជាមួយ​លោក​ស្រី ​រ៉ូណា ស្មីត​ (Rhona Smith) ​នៅ​ឯវិមាន​សន្តិភាព​ ដើម្បី​ធ្វើ​ការ​ពិភាក្សា​ស្តីពី​ស្ថានភាព​សិទ្ធិ​មនុស្ស​នៅ​ក្នុងប្រទេស​កម្ពុជា។ នេះ​បើ​តាម​ការ​បញ្ជាក់​ពី​ជំនួយ​ការ​ផ្ទាល់​របស់​លោក​នាយករដ្ឋ​មន្ត្រី​ ហ៊ុន សែន។ លោក​ស្រី ​រ៉ូណា ស្មីត​ (Rhona Smith)​គឺជា​អ្នក​រាយការណ៍​របស់​អ.ស.ប.​អំពី​សិទ្ធិ​មនុស្ស​នៅ​កម្ពុជា ​ដែល​មក​ជំនួស​លោក​សូរិយា​ ប្រាសាទ​ស៊ូប៊េឌី។​

ក្រុម​និស្សិត​និង​ប្រជាពលរដ្ឋ​ប្រមាណ​៤០០​នាក់​ បាន​មក​ជួបជុំ​គ្នា​នៅ​ឯ​ទី​លានប្រជាធិបតេយ្យកាល​ពី​ថ្ងៃ​អាទិត្យ​ទី១៣ ខែ​កញ្ញា ឆ្នាំ​២០១៥ ដើម្បី​ធ្វើ​ការ​តវ៉ា​ស្នើ​សុំ​ឲ្យ​លោក​នាយរដ្ឋមន្ត្រី ​ហ៊ុន សែន​ ជំរុញ​ឲ្យ​អាជ្ញាធរ​ខេត្ត​កំពត​អនុវត្ត​អនុក្រឹត្យ​មួយ​ដែល​ចេញ​ដោយ​រដ្ឋាភិបាល​កាល​ពី​៣​ឆ្នាំ​មុន​សម្រាប់​ការ​បែងចែក​ដីធ្លី​មួយ​កន្លែង​ក្នុង​ស្រុក​ឈូក​ខេត្ត​កំពត។​ (រូបថត​ផ្តល់​ឲ្យ)
ក្រុម​និស្សិត​និង​ប្រជាពលរដ្ឋ​ប្រមាណ​៤០០​នាក់​ បាន​មក​ជួបជុំ​គ្នា​នៅ​ឯ​ទី​លានប្រជាធិបតេយ្យកាល​ពី​ថ្ងៃ​អាទិត្យ​ទី១៣ ខែ​កញ្ញា ឆ្នាំ​២០១៥ ដើម្បី​ធ្វើ​ការ​តវ៉ា​ស្នើ​សុំ​ឲ្យ​លោក​នាយរដ្ឋមន្ត្រី ​ហ៊ុន សែន​ ជំរុញ​ឲ្យ​អាជ្ញាធរ​ខេត្ត​កំពត​អនុវត្ត​អនុក្រឹត្យ​មួយ​ដែល​ចេញ​ដោយ​រដ្ឋាភិបាល​កាល​ពី​៣​ឆ្នាំ​មុន​សម្រាប់​ការ​បែងចែក​ដីធ្លី​មួយ​កន្លែង​ក្នុង​ស្រុក​ឈូក​ខេត្ត​កំពត។​ (រូបថត​ផ្តល់​ឲ្យ)

លោក ​អៀង​ សុផល្លែត​ ជំនួយ​ការ​ផ្ទាល់​របស់​លោក​នាយក​រដ្ឋមន្ត្រី​ បាន​ថ្លែង​ប្រាប់​អ្នក​សារព័ត៌​មាន​បន្ទាប់​ជំនួប​នោះ​ថា​ លោក​ស្រី​ រ៉ូណា​ ស្មីត​ បាន​សម្តែង​ការ​បេ្តជ្ញា​ចិត្ត​ដើម្បី​ការ​ពារ​សិទ្ធិមនុស្ស​នៅ​ក្នុង​ប្រទេស​កម្ពុជា​ នៅ​ចំពោះ​មុខ​លោក​នាយក​រដ្ឋមន្ត្រី ​ហ៊ុន សែន។ លោក​នាយក​រដ្ឋ​មន្ត្រី​បាន​ស្នើ​ឲ្យ​លោក​ស្រី​ រ៉ូណា ស្មីត​ ស្វែង​រក​ចំណុច​រួម​មួយ​ក្នុង​ការ​ដោះ​ស្រាយ​បញ្ហា​សិទ្ធិ​មនុស្ស​ ដោយ​ផ្អែក​លើ​ករណី​ជាក់​ស្តែង​នីមួយៗ។​ ជំនួយ​ការ​លោក​នាយក​រដ្ឋ​មន្ត្រី​បញ្ជាក់​ថា​ លោក​ស្រី​ រ៉ូណា​ ស្មីត​ ថ្លែង​ថា​ ​លោក​ស្រី​នឹង​បំពេញ​ការងារ​របស់​លោក​ស្រី​ ដោយ​ឈរ​លើតុល្យភាព​នៃ​ប្រភព​ព័ត៌មាន​មក​ពី​គ្រប់​ភាគី​ពាក់​ព័ន្ធ​ ដែល​ធ្វើ​ការ​ក្នុង​វិស័យ​សិទ្ធិ​មនុស្ស​ សម្រាប់​ការ​វាយ​តម្លៃ​ពី​ស្ថាន​ភាព​សិទ្ធិ​មនុស្ស​នៅ​ក្នុង​ប្រទេស​កម្ពុជា។​

«ច្បាប់​របស់​អ្នក​ធ្វើ​របាយ​ការណ៍​គឺ​ធ្វើ​យ៉ាងណា​មិន​ឲ្យ​មាន​ការ​ប៉ះពាល់​ទៅ​ដល់​អធិបតេយ្យ​ភាព​ ក៏​ដូច​ជា​បូរណ​ភាព​ទឹក​ដី​នៃ​ប្រទេស​មួយ​ដែរ។​ ក្នុង​ន័យ​នេះ​ លោក​ស្រី​បាន​មាន​ប្រសាសន៍​ថា ​លោក​ស្រី​នឹង​ធ្វើ​ការ​ជាមួយ​នឹង​ស្ថាប័ន និង​បុគ្គល​ពាក់​ព័ន្ធ​ទាំង​អស់​ ដើម្បី​ប្រមូល​ឲ្យ​បាន​គ្រប់​សព្វ​នូវ​ភស្តុតាង​ទាំង​ឡាយ​ ដើម្បី​ធ្វើ​ការ​សន្និដ្នាននៅ​ក្នុង​របាយ​ការណ៍​របស់​លោក​ជំទាវ​ ដែល​របាយ​ការណ៍​ទាំង​នោះ​ គឺ​មាន​ភស្តុតាង​ជាក់​លាក់​តែ​ម្តង​ មិន​ឲ្យ​មាន​ការ​ខ្វះ​ខាត​ទេ»។​

លោក​ សុរិយា ប្រាសាទ​ ស៊ូប៊េឌី​ ដែល​បាន​កាន់​ការងារ​សិទ្ធិ​មនុស្ស​នៅ​ក្នុង​ប្រទេស​កម្ពុជា​មុន​លោក​ស្រី​ រ៉ូណា ស្មីត បាន​បញ្ចប់​បេសក​កម្មរយៈពេល​៦ឆ្នាំ​របស់​លោក​ កាល​ពី​ចុង​ខែ​មករា​ ​ដោយ​លោក​បាន​វាយ​តម្លៃ​ថា​ ស្ថានភាព​សិទ្ធិ​មនុស្ស​នៅ​កម្ពុជា​មាន​ភាព​ល្អ​ប្រសើរ​នៅ​ត្រង់​ថា ​ប្រជា​ពលរដ្ឋ​ខ្មែរ​មាន​ភាព​ក្លាហាន​ក្នុង​ការ​ហ៊ាន​ប្រឆាំង​នឹង​អំពើ​អយុត្តិធម៌ ​ខណៈ​ដែល​យុវជន​មាន​សេចក្តី​ក្លាហានច្រើន​ក្នុង​ការ​ចូលរួម​សកម្ម​ភាព​សង្គម។​

ប៉ុន្តែ​លោក​ សុរិយា​ ប្រាសាទ​ ស៊ូប៊េឌី​ យល់​ថា​ ការ​គោរព​សិទ្ធិ​មនុស្ស​ សេរីភាព​បញ្ចេញ​មតិ​នៅ​ពុំទាន់​មាន​ភាព​ល្អ​ប្រសើរ​នៅ​ឡើយទេ​ រីឯ​ស្ថាប័ន​តុលាការ​ក៏​ពុំទាន់​បាន​ផ្តល់​យុត្តិធម៌​តាម​ការ​ទាមទារ​របស់​ប្រជា​ពលរដ្ឋ​កម្ពុជា​ដែរ។​

សកម្ម​ជន​សិទ្ធិ​មនុស្ស​បញ្ជាក់​បន្ថែម​ថា​ លោក​ស្រី ​រ៉ូណា​ ស្មីត ​អាច​នឹង​បង្កើន​កិច្ច​សហការ​ឲ្យ​បាន​កាន់​តែ​ច្រើន​ជាមួយ​នឹង​រដ្ឋាភិបាល​ និង​ដៃ​គូ​ពាក់​ព័ន្ធ​ក្នុង​វិស័យ​សិទ្ធិ​មនុស្ស​ សម្រាប់​ការ​ធ្វើ​ឲ្យ​ប្រសើរ​ឡើងនូវ​ស្ថាន​ភាព​សិទ្ធិ​មនុស្ស​នៅ​កម្ពុជា ​ដែល​ញំាញី​ដោយ​ទំនាស់​ដីធ្លី​ និង​និទណ្ឌ​ភាព។​ ពួក​គេ​ថា ប្រសិន​បើ​បញ្ហា​ទាំង​នេះ​មិន​ត្រូវ​បាន​ដោះ​ស្រាយ​ទេ នោះ​សន្តិភាព​ពិត​បា្រកដ​ក៏​ពុំ​មាន​នោះ​ដែរ​ នៅ​ក្នុង​ប្រទេស​ដ៏ក្រី​ក្រ​មួយ​នេះ៕

XS
SM
MD
LG