ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​ហ៊ុន សែន ​កោត​សរសើរ​ក្រុមហ៊ុន​ឯកជន​មិន​បិទ​ដំណើរការ ​គ្រា​មាន​វិបត្តិ​កូវីដ១៩


រូបឯកសារ៖ លោក​នាយករដ្ឋមន្ត្រី ហ៊ុន សែន លើកដៃ​ស្វាគមន៍ ពេល​លោក​ទៅ​ទស្សនា​ទីស្នាក់ការ​គណបក្ស​ប្រជាជន​កម្ពុជា នៅរាជធានីភ្នំពេញ ថ្ងៃទី ៥ ខែមិថុនា ឆ្នាំ​២០២០។

នាយក​រដ្ឋមន្ត្រី​កម្ពុជា​លោក ​ហ៊ុន សែន​ បាន​ថ្លែង​កោត​សរសើរ​ក្រុមហ៊ុន​ឯកជន​ ចំពោះ​ការ​តស៊ូ​នៅ​ក្នុង​ការ​ទប់ទល់​នឹងវិបត្តិ​ជំងឺកូវីដ១៩​ ដោយ​ពួកគេ​មិន​បាន​បិទ​ដំណើរការ​ ហើយ​បន្ត​រក្សា​ការងារ​ឲ្យ​បុគ្គលិក។​

ក្នុង​ពិធី​សម្ពោធ​ដាក់​ឲ្យ​ដំណើរ​ការ​មជ្ឈមណ្ឌល​កម្សាន្ត​ ព្រីន៍ ម៉ាណ័រ ​គ្រប់​គ្រង​ដោយ​វិនិយោគិន​ចិន​ នៅ​ក្នុង​ស្រុក​កៀនស្វាយ ​ខេត្ត​កណ្តាល ​កាលពី​ថ្ងៃពុធ​លោក ​ហ៊ុន សែន​ មាន​ប្រសាសន៍​ថា​ ក្នុង​ពេល​វិបត្តិ​ជំងឺ​ឆ្លង​កូវីដ១៩ ​ក្រុម​ហ៊ុន​ឯកជន​បាន​ខិតខំ​បន្ត​អាជីវកម្ម​របស់​ខ្លួន ​ហើយ​ថែម​ទាំង​មិន​បាន​កាត់​បន្ថយ​បុគ្គលិក​ទៀត​ផង។​

«នៅ​លើ​ពិភពលោក​បាត់​បង់​ការងារ​ច្រើន​ណាស់! ​បាត់​បង់​ការងារ​ច្រើន​ណាស់!​ មិន​មែន​គ្រាន់​តែ​ប្រទេស​កម្ពុជា​មួយ​ទេ។ អ៊ីចឹង ​ការណ៍​ដែល​ក្រុមហ៊ុន​ឯក​ជន​ទាំង​អស់​នៅ​បន្ត​ការ​ខិត​ខំ​វិនិយោគ​ និង​បន្ត​ដំណើរ​ការ​នៃ​ក្រុមហ៊ុន​របស់​ខ្លួន ​ដោយ​មិន​បិទ ​ឬ​មិន​បន្ថយ​បុគ្គលិក​ គឺ​ជា​ការ​រួម​ចំណែក​ដ៏​ធំ​នៃ​ការ​ដោះស្រាយ​ការងារ​ធ្វើ​ និង​ប្រាក់​ចំណូល​ឲ្យ​ប្រជាជន​កម្ពុជា​ ហើយ​មិន​ទម្លាក់​បន្ទុក​ដោះស្រាយ​បញ្ហា​សង្គម​ឲ្យ​រាជ​រដ្ឋាភិបាល​នោះ​ទេ»។​

«ខ្ញុំ​ឃើញ​ថា​ ក្រុមហ៊ុន​សំណង់​នានា​ គឺ​បន្ត​ធ្វើ។​ ហើយ​បើ​តាម​ខ្ញុំ​សួរ​ទៅ ​គឺ​គម្រោង​ធ្វើ​គម្រោង​ផ្ទះ​ស្អីៗ​ហ្នឹង​ តែ​បើក​ភ្លាម​មាន​អ្នក​ដាក់​កក់​ទិញ​ កក់​ទិញ​កក់។​ ដូច្នេះ​នៅ​តែ​បន្ត​ធ្វើ​បែប​នេះ​ ធ្វើ​ឲ្យ​កម្មករ​យើង​មាន​ការ​ងារ​ធ្វើ​ (អាច​រក)​ ប្រាក់​ចំណូល​ថែម​ទៀត»

លោក​ ហ៊ុន សែន ​បាន​អះអាង​ថា​ ទោះបី​មាន​រោងចក្រ​ខ្លះ​បាន​បិទ​ទ្វារ​ តែ​ក៏​មាន​រោងចក្រ​ថ្មី​ត្រូវ​បាន​បង្កើត​ឡើង ​ក្នុង​គ្រា​មាន​វិបត្តិ​នេះ។ ​លោក​មិន​បាន​បញ្ជាក់​ពី​ប្រភេទ​ផលិត​កម្ម​របស់​រោងចក្រ ​ដែល​បង្កើត​ឡើង​ថ្មី​នោះ​ទេ។​ ក៏​ប៉ុន្តែ​ លោក​ថា ​វាជា​ឱកាស​នៃ​ការ​បង្កើត​ការងារ​ថ្មី​សម្រាប់​ពល​រដ្ឋ​កម្ពុជា។​

លោក​នាយក​រដ្ឋមន្ត្រី​ក៏​បាន​កត់​សម្គាល់​នូវ​ការ​បន្តមាន​សកម្ម​ភាពទិញ​ដូរ​ក្នុង​វិស័យ​សំណង់​ ហើយ​ការ​ផ្គត់​ផ្គង់​ផលិត​ផល​កសិកម្ម​ក្នុង​ស្រុក​ ក៏​បាន​រើប​ឡើង​វិញ​ទៀត​ផង។​

លោក​ ហ៊ុន សែន ​ថ្លែង​ថា៖​ «ខ្ញុំ​ឃើញ​ថា​ ក្រុមហ៊ុន​សំណង់​នានា​ គឺ​បន្ត​ធ្វើ។​ ហើយ​បើ​តាម​ខ្ញុំ​សួរ​ទៅ ​គឺ​គម្រោង​ធ្វើ​គម្រោង​ផ្ទះ​ស្អីៗ​ហ្នឹង​ តែ​បើក​ភ្លាម​មាន​អ្នក​ដាក់​កក់​ទិញ​ កក់​ទិញ​កក់។​ ដូច្នេះ​នៅ​តែ​បន្ត​ធ្វើ​បែប​នេះ​ ធ្វើ​ឲ្យ​កម្មករ​យើង​មាន​ការ​ងារ​ធ្វើ​ (អាច​រក)​ ប្រាក់​ចំណូល​ថែម​ទៀត»។​

សម្រាប់​វិស័យ​កសិកម្ម​ លោក​នាយករដ្ឋ​មន្ត្រី​ថ្លែង​យ៉ាង​ដូច្នេះ៖​ «ឯ​រឿង​មួយ​ទៀត​ក្នុង​វិស័យ​កសិកម្ម​ នៅ​ពេល​ដែល​មាន​ការ​អត់​នាំ​ចូល​បាន​នូវ​អាដែង​របស់​របរ​មក​ពី​ខាងក្រៅ​ ប្រឹង​ដាំ​ប្រឹង​ដុះ​ប្រឹង​ចិញ្ចឹម​ខ្លួន​ឯង​ ចិញ្ចឹម​ទីផ្សារ​បាន​អីតើ​...​អ៊ីចឹង​ ដូច​ជា​ការ​នាំជ្រូក​ចូល ​ឬនាំ​បន្លែ​បង្ការ​ចូល​ ក៏​ត្រូវ​បាន​កាត់​បន្ថយ​នៅ​ក្នុង​ដំណាក់​កាល​អា​កូវីដ​នេះ។​ អ៊ីចឹង​ តើ​នរណា​ផ្គត់​ផ្គង់? ​គឺ​កសិករ​យើង​ផ្គត់​ផ្គង់​ទីផ្សារ​ក្នុងស្រុក​របស់​យើង»។​

បើ​តាម​របាយ​ការណ៍​បច្ចុប្បន្ន​ភាព​នៃ​សេដ្ឋកិច្ច​កម្ពុជា​របស់​ធនាគារ​ពិភព​លោក ​ដែល​បាន​ចេញ​ផ្សាយ​កាល​ពី​ខែ​កញ្ញា ​ឆ្នាំ ​២០២០ ​នេះ​ ​«សេដ្ឋកិច្ច​កម្ពុជា​នៅ​ឆ្នាំ ​២០២០​ នេះ​ ត្រូវបាន​ព្យាករ​ទុក​ថា ​នឹង​មាន​កំណើន​អវិជ្ជមាន​គឺ ​-២​ភាគរយ​ ដែល​ជា​ការ​ធ្លាក់​ចុះ​យ៉ាង​គំហុក​បំផុត ​មិន​ធ្លាប់​មាន​ក្នុង​ប្រវត្តិ​សាស្ត្រ​ថ្មីៗ​នេះ​របស់​កម្ពុជា ​ជា​ហេតុ​ប៉ះ​ពាល់​ធ្ងន់​ធ្ងរ​ទៅ​លើ​សុខុមាល​ភាព​គ្រួសារ​ និង​អាច​ធ្វើ​ឲ្យ​ភាព​ក្រីក្រ​កើន​ឡើង​ទៀត​ផង»។​

ធនាគារ​ពិភព​លោក​ដែល​មាន​មូលដ្ឋាន​នៅ​សហ​រដ្ឋ​អាមេរិក​ ពន្យល់​បន្ថែម​ថា​ នៅ​ឆ្នាំ​ ២០២០ ​នេះ​ ការ​រាល​ដាល​ជំងឺកូវីដ​នេះ​បាន​ប៉ះពាល់​យ៉ាង​ដំណំ​ទៅលើ​ក្បាល​ម៉ាស៊ីន​កំណើន​ធំៗ​របស់​កម្ពុជា​ ជា​ពិសេស​វិស័យ​សំណង់​ ទេសចរណ៍ ​និង​ផ្នែក​នាំទំនិញ​ចេញ​ដែល​ទាំង​អស់​នេះ ​មាន​ចំណែក​ជាង​ ៧០​ ភាគរយ ​ក្នុង​កំណើន​ផលិត​ផល​ក្នុង​ស្រុក​សរុប ​និង ​៣៩ ​ភាគរយ​នៃ​ការងារ​មាន​ប្រាក់​កម្រៃ​ទាំង​អស់​ក្នុង​ឆ្នាំ​ ២០១៩។​ ជំងឺ​កូវីដ១៩ ​ក៏​បាន​ធ្វើ​ឲ្យ​វិស័យ​សំណង់​ និង​អចលន​ទ្រព្យ​ នៅទ្រឹង​ដែល​ជា​វិស័យ​មាន​ការ​ពឹង​ពាក់​ខ្លាំង​ទៅ​លើ​ការ​វិនិយោគ​ពី​បរទេស។​

សណ្ឋាគារ​ជា​ច្រើនបាន​បិទ​ទ្វារ​ ផ្អាក​ដំណើរ​ការ​ក្នុង​អំឡុង​វិបត្តិ​សេដ្ឋកិច្ច ដែល​កើតឡើង​ដោយ​សារ​ការ​រីករាល​ដាល​នៃ​ជំងឺ​កូវីដ១៩, នៅខេត្ត​សៀមរាប​។​ (ផន​ បុប្ផា/ VOA)
សណ្ឋាគារ​ជា​ច្រើនបាន​បិទ​ទ្វារ​ ផ្អាក​ដំណើរ​ការ​ក្នុង​អំឡុង​វិបត្តិ​សេដ្ឋកិច្ច ដែល​កើតឡើង​ដោយ​សារ​ការ​រីករាល​ដាល​នៃ​ជំងឺ​កូវីដ១៩, នៅខេត្ត​សៀមរាប​។​ (ផន​ បុប្ផា/ VOA)

ធនាគារ​បាន​កត់​សម្គាល់​ទៀត​ថា៖​ «វិស័យ​ទេស​ចរណ៍​ និង​បដិសណ្ឋារកិច្ច​របស់​កម្ពុជា​ បាន​ដួល​រលំ​ដោយ​សារ​តែ​ការ​រឹតត្បិត​លើ​ការ​ធ្វើ​ដំណើរ​ និង​វិធាន​ការ​រាំង​ខ្ទប់​ឲ្យ​នៅ​មួយ​កន្លែង»។​

«ក្នុង​ចំណោម​ក្រុមហ៊ុន​ចំនួន ​៥៣៧​ ដែល​ផ្តល់​ចម្លើយ​មាន ​១៨ ​ភាគរយ ​ដែល​បាន​បិទទ្វារ​បណ្តោះ​អាសន្ន​ ឬ​ជា​ស្ថាពរ​តែ​ម្តង​ដោយ​សារ​តែ​ជំងឺ​កូវីដ១៩»


ចំនួន​ភ្ញៀវ​មក​ដល់​បាន​ធ្លាក់​ចុះ​ប្រហែល ​៦៤,៦​ ភាគ​រយ ​ក្នុង​អំឡុង​ពេល​ ៦ ​ខែ​ដំបូង​នៃ​ឆ្នាំ​ ២០២០។​ ការ​ធ្លាក់​ចុះ​យ៉ាង​គំហុក​នូវ​តម្រូវ​ការ​លើ​សកល​លោក ​ក៏​បាន​បណ្តាល​ឲ្យ​វិស័យ​កមន្តសាល​របស់​កម្ពុជា​ចុះ​ខ្សោយ ​ពោល​គឺ​ការ​នាំ​ចេញ​នូវ​ផលិត​ផល​កាត់​ដេរ ​ផលិត​ផល​សម្ភារៈ​ធ្វើ​ដំណើរ​ និង​ស្បែកជើង​បាន​ធ្លាក់​ចុះ​ ៧,២ ​ភាគ​រយ ​ក្នុង​អំឡុង​ពេល ​៦ ​ខែ​ដំបូង​នៃ​ឆ្នាំ​ ២០២០​ ហើយ​ទន្ទឹម​គ្នា​នោះ​ ការ​នាំ​ចូល​នូវ​ក្រណាត់​សម្រាប់​យក​មក​កាត់​ដេរ​ បាន​ធ្លាក់​ចុះ​ ៨៥,៤ ​ភាគរយ។​

ចំពោះ​សុខភាព​ហិរញ្ញ​វត្ថុ​របស់​ក្រុមហ៊ុន​ឯកជន​ ​ធនាគារ​ពិភពលោក​ បាន​រក​ឃើញ​ថា​ ក្រុមហ៊ុន​ក៏​កំពុង​ជួប​ការ​លំបាក​ផ្នែក​សេដ្ឋកិច្ច​ដែរ។

ធនាគារ​បាន​យោង​ទៅ​លើ​ការ​ស្ទង់​មតិ​មួយ​ក្នុង​ខែ​មិថុនា ​ឆ្នាំ​ ២០២០​ ដែល​បាន​បង្ហាញ​ថា៖​ «ក្នុង​ចំណោម​ក្រុមហ៊ុន​ចំនួន ​៥៣៧​ ដែល​ផ្តល់​ចម្លើយ​មាន ​១៨ ​ភាគរយ ​ដែល​បាន​បិទទ្វារ​បណ្តោះ​អាសន្ន​ ឬ​ជា​ស្ថាពរ​តែ​ម្តង​ដោយ​សារ​តែ​ជំងឺ​កូវីដ១៩»។​ ត្រង់​នេះ​បាន​ជះ​ផល​ប៉ះទង្គិច​យ៉ាង​អាក្រក់​ទៅ​លើ​សុខុមាល​ភាព​ ជា​ពិសេស​ទៅ​លើ​ជន​ក្រីក្រ​ និង​ក្រុម​ជន​ងាយ​រងគ្រោះ​បំផុត។​

លោក​ស្រី​ ឆាយ ស៊ាវលីន​ ប្រធាន​សមាគម​ទីភ្នាក់​ងារ​ទេសចរណ៍​កម្ពុជា​ ទទូច​ឲ្យ​រដ្ឋាភិបាល​រក​យន្តការ​ស្រោច​ស្រង់​ម្ចាស់​ក្រុមហ៊ុន​ទេស​ចរណ៍ ដែល​កំពុង​ទទួល​រង​វិបត្តិ​ហិរញ្ញ​វត្ថុ​ធ្ងន់​ធ្ងរ​ ហើយ​ស្ទើរ​តែ​ដំណើរ​ការ​លែង​បាន។​

លោក​ស្រី​ប្រាប់​វីអូអេ​កាល​ពី​សប្តាហ៍​មុន​ថា៖​ «អ៊ីចឹង​ ការ​អូស​បន្លាយ​នេះ ​បាន​ធ្វើ​ឲ្យ​ខាង​ឯកជន​ហ្នឹង​ គឺ​កាន់​តែ​រង​ផល​ប៉ះពាល់​ខ្លាំង​មែន​ទែន ​ដែល​យើង​ដូច​ថា​ មិន​អាច​...​សឹងតែ​មិន​អាច​ទៅមុខ​រួច​ឥឡូវ​ហ្នឹង។ ​អ៊ីចឹង​ទាល់​តែ​រដ្ឋាភិបាល​ជួយ​បន្ថែម​នូវ​ការ​គាំទ្រ​ ការ​ជួយ​មក​ដល់​ឯក​ជន​នេះ»។​

លោកស្រី​បន្ថែម​ថា៖​ «ត្រូវ​មាន​កញ្ចប់​ថវិកា​ ដើម្បី​ជា​កម្ចី​ដល់​ម្ចាស់​សហគ្រាស​មួយ​ចំនួន​ច៎ា។​ ម្ចាស់​សហគ្រាស​ដែល​គាត់​អស់​ទុន​បង្វិល​ហើយ អស់​ទុន​នៅ​ក្នុងការ​ចំណាយ​ហើយ ​ព្រោះ​ថា​ គាត់​ប្រឈម​មុខ​នឹង​ការ​ចំណាយ​ច្រើន​ណាស់​បច្ចុប្បន្ន​នេះ។​ ដូច​ជា​ការ​ជួល​អគារ​អី​ គាត់​នៅ​ដែរ​ដោយ​សារ​អី? ​យើង​មិន​អាច​ឈប់​ជួល​បាន​ កាល​ណា​ឈប់​ជួល​ដូច​បិទ​អ៊ីចឹង។​ អ៊ីចឹង​វា​ប៉ះពាល់​ទៅ​ដល់​អតិថិជន​ ប៉ះពាល់​ទៅ​ដល់​អ្នក​ដែល​ជំពាក់​វាក់​វិន ​ព្រោះ​ថា ​រហូត​មក​ដល់​ថ្ងៃ​នេះ​ អត់​មាន​នរណា​រួច​ខ្លួន​ទេ»។​

ធនាគារ​ពិភពលោក​បាន​លើក​ឡើង​ក្នុង​របាយ​ការណ៍​របស់​ខ្លួន​ ចេញ​ផ្សាយ​កាលពី​ខែ​កញ្ញា​ថា​ សកម្ម​ភាព​សេដ្ឋ​កិច្ច​ផ្ទៃ​ក្នុង​របស់​កម្ពុជា​បាន​ចាប់​ផ្តើម​កម្រើក​បណ្តើរៗ​ ឆ្ពោះ​ទៅ​រក​ប្រក្រតី​ភាព​ឡើង​វិញ​ហើយ​ក្រោយ​ពី​មាន​ការ​សម្រាល​ឲ្យ​បើក​អាជីវកម្ម​ឡើង​វិញ។​ តម្រូវ​ការ​ក្នុង​ស្រុក ​រួម​មាន​ការ​ធ្វើ​ដំណើរ​ និង​សកម្ម​ភាព​ទេស​ចរណ៍​ក្នុង​ស្រុក​ផង​ កំពុង​តែ​ងើប​ឡើង​វិញ។​

អ្នក​វិភាគ​សេដ្ឋកិច្ច​មួយ​រូប​គឺ​លោក ​ង៉ែត ជូ ​ចាត់​ទុក​ការ​អធិប្បាយ​របស់​លោក​នាយក​រដ្ឋមន្ត្រី​ ហ៊ុន សែន ​ដែល​ថា​ ក្រុមហ៊ុន​ឯកជន​មិន​ទាន់​បិទ​ទ្វារ ​គឺ​ជា​ការ​លើក​ឡើង​សមហេតុផល ​ដោយសារ​រហូត​មក​ដល់​ពេល​នេះ ក្រុមហ៊ុន​ឯកជន​ភាគ​ច្រើន​នៅ​បន្ត​ដំណើរ​ការ​ បើ​ទោះ​មាន​ក្រុមហ៊ុន​ក្នុង​វិស័យ​ខ្លះ​ដូច​ជា​ទេស​ចរណ៍ ​បាន​ផ្អាក​ដំណើរ​ការ​ ឬ​បិទ​ទាំង​ស្រុង​ក៏​ដោយ។​

អ្នក​វិភាគ​រូប​នេះ​នៅ​មិន​ហ៊ាន​វាយ​តម្លៃ​បាន​ថា​ តើ​ស្ថានភាព​ហិរញ្ញ​វត្ថុ​របស់​ក្រុមហ៊ុន​ឯក​ជន​អាច​ស្ថិត​ក្នុង​ស្ថាន​ភាព​ល្អ​ប្រសើរ​បន្ត​ទៀត​ ឬ​ក៏អាក្រក់​នោះ​ទេ​ ដោយ​សារ​វិបត្តិ​កូវីដ​មិន​ទាន់​បាន​មួយ​ឆ្នាំ​ផង។​

«មក​ទល់​ឥឡូវ​ហ្នឹង​គឺ​៨​ខែ​ទេ​ អ៊ីចឹង​វា​រៀង​លឿនបន្តិច។​ វា​មាន​មានន័យ​ថា​ ពេល​វេលា​ដូច​ជា​នៅ​ខ្លី​នៅ​ឡើយ​សម្រាប់​ក្រុមហ៊ុន​ទាំង​អស់​ហ្នឹង។ ​ប៉ុន្តែ​ ក្រុមហ៊ុន​ខ្លះ​ជា​ការពិត​ក្រុម​ហ៊ុន​តូចៗ​ គាត់​មាន​ការ​លំបាក​ទាក់​ទង​ជាមួយ​នឹង​បញ្ហា​ហិរញ្ញ​វត្ថុ​បាទ»។​

ស្រប​ពេល​ជាមួយ​គ្នា​នេះ​ ការ​វាយ​តម្លៃ​របស់​កម្មវិធី​អភិវឌ្ឍន៍​សហ​ប្រជាជាតិ ​(UNDP)​ លើ​ផល​ប៉ះពាល់​សង្គម​សេដ្ឋកិច្ច​ ដោយ​សារ​ជំងឺ​កូវីដ១៩​ នៅ​កម្ពុជា​ឲ្យ​ដឹង​ថា​ អត្រា​ភាព​ក្រីក្រ​អាច​កើន​ឡើង​ជិត ​២​ ដង​ដល់​ ១៧,៦​ ភាគ​រយ​ ហើយ​អត្រា​អ្នក​អត់​មាន​ការងារ​ធ្វើ​ អាច​កើន​ឡើង​ដល់ ​៤,៨​ ភាគរយ។​

លោក​ ហ៊ុន ​សែន​ បាន​ឲ្យ​ដឹង​ទៀត​ថា ​រដ្ឋា​ភិបាល​បាន​បន្ត​ជួយ​កម្មករ​រោងចក្រ ​ដែល​ត្រូវ​បាន​ព្យួរ​ការងារ​ដោយ​ខាង​ភាគី​រដ្ឋាភិបាល​ផ្តល់​ប្រាក់​ចំនួន ​៤០ ​ដុល្លារ​ ក្នុង​មួយ​ខែ​ ហើយ​ខាង​ភាគី​ថៅកែ​រោងចក្រ​ ជួយ​ឧបត្ថម្ភ ​៣០ ​ដុល្លារ​ក្នុង​មួយ​ខែ។ កម្មករ​ក្នុង​វិស័យ​ទេស​ចរណ៍​ក៏​ទទួល​បាន​ការ​គាំទ្រ​ចំនួន ​៤០​ ដុល្លារ​ពី​រដ្ឋាភិបាល​ផង​ដែរ។​ លោក​បញ្ជាក់​ថា​ ការ​គាំទ្រ​ទាំង​នេះ​នឹង​បន្ត​ទៅ​មុខ​រយៈ​ពេល ​៣ ​ខែ​ទៀត។​

ប៉ុន្តែ​ លោក​ អាត់ ធន់​ មេ​ដឹកនាំ​សហភាព​ការងារ​កម្ពុជា​ មាន​ប្រសាសន៍​ថា​ ការ​ទទួល​បាន​ប្រាក់​ឧបត្ថម្ភ​ចំនួន ​៧០​ ដុល្លារ​របស់​កម្មករ​ក្នុង​ឧស្សាហ​កម្ម​កាត់​ដេរ​ មិន​ទាន់​បំពេញ​តម្រូវ​ការ​ប្រចាំ​ថ្ងៃ​ទេ​ បើ​ទោះ​វា​ជួយ​ដោះ​ទ័ល​បាន​មួយ​គ្រា។​ លោក​បន្ថែម​ថា​ កម្មករ​កាត់ដេរ​ដែល​បាត់​បង់​ការងារ​ អាច​បង្ខំ​ចិត្ត​លក់​ដីធ្លី​ បន្ទាប់​ពី​ពួក​គេ​បាន​លក់​សម្ភារៈ​ប្រើ​ប្រាស់​មួយ​ចំនួន​ ដើម្បី​ទ្រទ្រង់​ការ​រស់​នៅ​ប្រចាំ​ថ្ងៃ៕

តួលេខនៃករណីឆ្លងជំងឺកូវីដ១៩

XS
SM
MD
LG