លោកនាយករដ្ឋមន្ត្រី ហ៊ុន សែន បានស្នើបេក្ខភាពមួយរូបជាកូនប្រុសរបស់ប្រធានតុលាការកំពូលគឺ លោក ឌិត ទីណា ឱ្យកាន់តំណែងជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជំនួសរដ្ឋមន្ត្រីចាស់ លោក វេង សាខុន ដែលត្រូវបញ្ឈប់ពីតួនាទីកាលពីថ្ងៃសៅរ៍សប្តាហ៍មុន។
លោក ឌិត ទីណា ដែលជាកូនប្រុសរបស់លោក ឌិត មុន្ទី នឹងក្លាយជារដ្ឋមន្ត្រីវ័យក្មេងមួយរូបទៀត បន្ទាប់ពី លោក សាយ សំអាល់ ប្រសិនបើលោកត្រូវរដ្ឋសភាផ្តល់សេចក្តីទុកចិត្តឱ្យកាន់ការងារជារដ្ឋមន្ត្រីកសិកម្មនោះ។ លោក សាយ សំអាល់ បច្ចុប្បន្នជារដ្ឋមន្ត្រីក្រសួងបរិស្ថាន គឺជាកូនប្រុសប្រធានព្រឹទ្ធសភា លោក សាយ ឈុំ។
បើតាមលិខិតមួយច្បាប់ចុះថ្ងៃទី៨ ខែតុលា លោក ហ៊ុន សែន បានស្នើ លោក ហេង សំរិន ប្រធានរដ្ឋសភា អនុញ្ញាតឱ្យមានការរៀបចំការបោះឆ្នោតផ្តល់សេចក្តីទុកចិត្តរបស់រដ្ឋសភាលើការបំពេញបន្ថែម សមាសភាពសមាជិកនៃរាជរដ្ឋាភិបាលដល់លោក ឌិត ទីណា ដែលជាមន្ត្រីជាន់ខ្ពស់ក្រសួងរ៉ែ និងថាមពលជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ការស្នើសុំរបស់ លោក ហ៊ុន សែន ដាក់លោក ឌិត ទីណា ជារដ្ឋមន្ត្រីកសិកម្មនេះ ធ្វើឡើងកាលពីថ្ងៃសៅរ៍ គឺក្នុងថ្ងៃតែមួយដែល លោក ហ៊ុន សែន បានបញ្ចប់មុខតំណែងលោក វេង សាខុន ដែលទើបបញ្ចប់បេសកកម្មការងារនៅទ្វីបអឺរ៉ុប។
អ្នកនាំពាក្យរដ្ឋសភា លោក ឡេង ប៉េងឡុង ថ្លែងថា សភាបានទទួលលិខិតរបស់លោកនាយករដ្ឋមន្ត្រី ហ៊ុន សែន តែមិនទាន់មានការកំណត់ថ្ងៃប្រជុំទៅលើសំណើតែងតាំង លោក ឌិត ទីណា នៅឡើយទេ ដោយរង់ចាំការសម្រេចរបស់គណៈអចិន្ត្រៃយ៍សភាជាមុនសិន។
លោកប្រាប់វីអូអេនៅថ្ងៃអង្គារនេះថា៖ «បាទចូលហើយបាទ ប៉ុន្តែអត់ទាន់ដាក់ជូនអចិន្ត្រៃយ៍។ អចិន្ត្រៃយ៍មិនទាន់សម្រេចផង»។
លោក ឌិត ទីណា ដែលបច្ចុប្បន្នជារដ្ឋលេខាធិការក្រសួងរ៉ែ និងថាមពលសុំមិនទាន់ផ្តល់ការអត្ថាធិប្បាយដោយថា ការស្នើបេក្ខភាពរបស់លោកកំពុងធ្វើតាមនីតិវិធីរបស់រដ្ឋាភិបាល និងរដ្ឋសភា។ វីអូអេព្យាយាមសុំការអត្ថាធិប្បាយពី លោក វេង សាខុន តាមសំណួរផ្ញើតាមប្រព័ន្ធតេឡេក្រាម តែមិនមានការឆ្លើយតបនៅថ្ងៃអង្គារនេះ។
ប្រធានសមាគមសម្ព័ន្ធសហគមន៍កសិករកម្ពុជា (CCFC) លោកថេង សាវឿន យល់ថា ការផ្លាស់ប្តូរក្បាលម៉ាស៊ីននៅក្រសួងកសិកម្ម នឹងមិនធ្វើឱ្យមានភាពខុសប្លែកគ្នាក្នុងការពង្រឹងវិស័យកសិកម្មទេ បើសិនរដ្ឋាភិបាលមិនព្រមធ្វើការកែទម្រង់របៀបធ្វើការងារ និងបន្ថែមទុនវិនិយោគលើវិស័យសំខាន់មួយនេះ។
លោកថ្លែងថា៖ «ទោះបីមានការផ្លាស់ប្តូរមនុស្ស ឬក៏អ្នកទទួលខុសត្រូវក៏ដោយ ក៏ប៉ុន្តែបើយើងមិនមានការផ្លាស់ប្តូរជាយុទ្ធសាស្ត្រក្នុងការធ្វើការកំណែទម្រង់ប្រព័ន្ធកសិកម្មប្រកបដោយអភិបាលកិច្ច ពិសេសធ្វើការដាក់ជាធនធានថវិកាជាតិ វិនិយោគឱ្យបានច្រើនទៅលើវិស័យកសិកម្មទេ បញ្ហានៅតែមិនអាចដោះស្រាយបាន»។
បើតាមលោក ថេង សាវឿន អតីតរដ្ឋមន្ត្រីកសិកម្ម លោក វេង សាខុន ខកខានមិនបានជួយពលរដ្ឋក្នុងការដោះស្រាយបញ្ហាទីផ្សារផលិតផលកសិកម្ម ដែលធ្វើឱ្យកសិករខ្លះត្រូវធ្វើចំណាកស្រុកដើម្បីគេចពីម្ចាស់បំណុល ហើយលោកក៏ខកខានមិនបានដោះស្រាយបញ្ហាខ្វះទឹកដល់កសិករដើម្បីបង្កបង្កើនផលផងដែរ។
ការដកតំណែង លោក វេង សាខុន កើតឡើងក្រោយជិតមួយឆ្នាំដែលរដ្ឋមន្ត្រីកសិកម្មរូបនេះបានរងការស្តីបន្ទោសធ្ងន់ៗពី លោក ហ៊ុន សែន ថាមិនសូវមានការពិភាក្សាជាមួយរដ្ឋមន្ត្រីផ្សេងទៀត នៅពេលធ្វើការដោះស្រាយបញ្ហាមួយចំនួនដែលមានភាពប្រទាក់ក្រឡាគ្នា។
ថ្លែងនៅក្នុងកម្មវិធីបិទសន្និបាតបូកសរុបការងារប្រចាំឆ្នាំរបស់ក្រសួងមហាផ្ទៃកាលពីចុងខែកុម្ភៈ ឆ្នាំ២០២២ លោក ហ៊ុន សែន ថ្លែងនៅចំមុខ លោក វេង សាខុន និងក្រុមមន្ត្រីកម្ពុជាឯទៀតថា លោក វេង សាខុន ជារដ្ឋមន្ត្រីដែលខ្វះកិច្ចសហការ នៅពេលដោះស្រាយបញ្ហាការរារាំងមិនឱ្យនាំចូលជ្រូករស់មកផ្គត់ផ្គង់ក្នុងប្រទេស។
លោក ហ៊ុន សែន ថ្លែងថា៖ «ក្នុងចំណោមរដ្ឋមន្ត្រី ខ្ញុំសុំចង្អុលបង្ហាញថា ក្នុងចំណោមរដ្ឋមន្ត្រីគឺរដ្ឋមន្ត្រីដែលមិនព្រមសហការជាមួយអ្នកដទៃ គឺរដ្ឋមន្ត្រីកសិកម្មហ្នឹងឯង អាហ្នឹងខ្ញុំនិយាយចង្អុលមុខឱ្យត្រង់អ៊ីចឹងម៉ង។ រដ្ឋមន្ត្រីកសិកម្មអត់សូវសហការជាមួយរដ្ឋមន្ត្រីណាទាំងអស់»។
យ៉ាងណាក៏ដោយនៅក្នុងពិធីចែកសញ្ញាបត្រដល់និសិ្សតមួយក្នុងទីក្រុងភ្នំពេញនៅថ្ងៃ អង្គារនេះ លោក ហ៊ុន សែន បានប្រាប់ក្រុមមន្ត្រីរដ្ឋាភិបាលថា លោកបានសម្រេចតែងតាំង លោក វេង សាខុន ជារដ្ឋមន្ត្រីអមនាយករដ្ឋមន្ត្រី ក្រោមហេតុផលថា លោក វេង សាខុន ជាមន្ត្រីរបស់គណបក្សកាន់អំណាចយូរមកហើយ៕
