លោកនាយករដ្ឋមន្ត្រី ហ៊ុន ម៉ាណែត នៅថ្ងៃចន្ទនេះ បានណែនាំទៅក្រសួងកសិកម្ម និងក្រសួងស្ថាប័នរដ្ឋផ្សេងទៀតត្រូវបែងចែកតួនាទី និងភារកិច្ច និងនាយកដ្ឋាននីមួយៗឱ្យបានច្បាស់លាស់ ដើម្បីបញ្ចៀសការងារជាន់គ្នា។
លោក ហ៊ុន ម៉ាណែត ដែលឡើងកាន់អំណាចជានាយករដ្ឋមន្រ្តីបានជិត៣ខែ ថ្លែងបែបនេះ នៅក្នុងពិធីប្រកាសឱ្យអនុវត្តជាផ្លូវការ«កម្មវិធីគោលនយោបាយអាទិភាពទី៥ និងទី៦របស់រាជរដ្ឋាភិបាល នីតិកាលទី៧នៃរដ្ឋសភា» ដែលធ្វើឡើងនៅក្រសួងកសិកម្ម។
លោកនាយករដ្ឋមន្ត្រី ហ៊ុន ម៉ាណែត បញ្ជាក់ថា កន្លងមក ស្ថាប័នរដ្ឋខ្លះមានភារកិច្ច និងតួនាទីត្រួតស៊ីគ្នា ដូច្នេះរដ្ឋាភិបាលរបស់លោកត្រូវធ្វើកំណែទម្រង់។
លោកថ្លែងថា៖ «អាណត្តិថ្មី ២០២៤ នេះ គឺខ្ញុំដាក់គោលដៅកំណែទម្រង់រដ្ឋបាលសាធារណៈនេះ គឺគ្រប់ក្រសួងទាំងអស់ត្រូវពិនិត្យឡើងវិញ រចនាសម្ពន្ធផ្ទៃក្នុង ពិនិត្យតួនាទីភារកិច្ចរបស់យើង ព្រោះកន្លែងខ្លះ អាចជាន់គ្នា។ ឧទាហរណ៍នៅកសិកម្ម អាចថានាយកដ្ឋានស្រាវជ្រាវជាមួយ CARDI [វិទ្យាស្ថាន ស្រាវជ្រាវនិងអភិវឌ្ឍកសិកម្មកម្ពុជា] តើយើងជាន់គ្នា ឬមួយយ៉ាងម៉េច...។ យើងពង្រឹងមួយណា ទុកមួយណា តួនាទីយ៉ាងម៉េច។ [ក្រសួង]ធនធានទឹក [និង]អភិវឌ្ឍន៍ជនបទ ជាន់គ្នាយ៉ាងម៉េច? [ក្រសួង]រ៉ែ និងថាមពល និង[ក្រសួង]ធនធានទឹក ពីណាគេគ្រប់គ្រងខ្សាច់ ពីណាគ្រប់គ្រងអី? ពេលខ្លះត្រូវមើលអាហ្នឹងឡើងវិញ រៀបអាហ្នឹង ពិនិត្យមើល»។
លោកបន្ថែមថា៖ «កុំបង្កើតជាន់គ្នា អាជាន់គ្នាហ្នឹងពិបាកណាស់ មិនត្រឹមតែខាតធនធានមនុស្សទេ គឺធ្វើឱ្យមនុស្សលែងធ្វើការ ព្រោះជាន់គ្នា មិនដឹងពីណា ធ្វើអី។ អ៊ីចឹងត្រូវធ្វើម៉េច ដើម្បីបំពេញគ្នាទៅវិញទៅមក ចែកគ្នាទៅពីណាផ្តោតទៅលើអី Specialist (ជំនាញ) ខាងអី ពីណាត្រូវបំពេញទៅខាងបឋម ពីណាត្រូវកាន់មធ្យម ពីណាត្រូវបច្ចេកទេស ស្រាវជ្រាវ ប្រមូលផ្តុំទៅណា»។
លោក អ៊ូ ច័ន្ទរ័ត្ន ប្រធានគណបក្សកែទម្រង់កម្ពុជា និងជាអតីតតំណាងរាស្រ្តមួយរូប ថ្លែងថារដ្ឋាភិបាលអាណត្តិទី៧ គួរតែច្របាច់ក្រសួងមួយចំនួនបញ្ចូលគ្នា ដើម្បីបញ្ចៀសការងារជាន់គ្នា និងធានាប្រសិទ្ធភាពការងារ។ លោកបន្ថែមថា បច្ចុប្បន្ន កម្ពុជាមានក្រសួងច្រើន ហើយមន្ត្រីខ្លះមិនមានការងារធ្វើនោះទេ។ ដូច្នេះលោកថា ការតែងតាំងមន្រ្តីច្រើនបែបនេះជាការចំណាយថវិការដ្ឋឥតប្រយោជន៍ ហើយវាបង្កទៅជាអំពើពុករលួយ បក្សពួកនិយម។
លោកថ្លែងថា៖ «ខ្ញុំឃើញក្រសួងខ្លះ គួរតែកាត់បន្ថយទៅ បូកបញ្ចូលគ្នាទៅ ដូចជាធនធានទឹកជាមួយកសិកម្មអីជាដើម។ ដូច្នេះគួរតែបង្រួមឱ្យទៅជាក្រសួងតែមួយអីវិញទៅ»។
បើតាមលោក អ៊ូ ច័ន្ទរ័ត្ន បើសិនរដ្ឋបង្វែរថវិកាជាតិ ទៅដល់ភូមិឃុំសង្កាត់ដោយផ្ទាល់ ដោយមិនចាំបាច់មានក្រសួងអភិវឌ្ឍន៍ជនបទ នោះវានឹងមានប្រសិទ្ធភាពជាង ព្រោះអាជ្ញាធរឃុំសង្កាត់ ដឹងថាត្រូវអភិវឌ្ឍអ្វីនៅតាមមូលដ្ឋាន៕
លោក ហ៊ុន ម៉ាណែត ណែនាំស្ថាប័នរដ្ឋឱ្យបែងចែកភារកិច្ចគ្នាឱ្យច្បាស់លាស់បញ្ចៀសការងារជាន់គ្នា
ភ្នំពេញ —
