ភ្ជាប់​ទៅ​គេហទំព័រ​ទាក់ទង

អង្គ​ការ​សិទ្ធិ​មនុស្ស៖ រដ្ឋាភិបាល​ប្រជាធិបតេយ្យ​នៅ​បស្ចឹម​ប្រទេស​មិន​បាន​ទប់ទល់នឹង​ការ​រំលោភ​លើ​សិទ្ធិ​មនុស្ស


នាយក​ប្រតិបត្តិ​នៃ​អង្គការ​​ឃ្លាំមើល​​សិទ្ធិមនុស្ស​​ (Human Rights Watch) លោក ខេនណេស រ៉ស់ (Kenneth Roth)​បង្ហាញ​អ្នក​ដែល​ចូលរួម​ក្នុងសន្និសីទ​កាសែត នូវ​របាយការណ៍​ប្រចាំឆ្នាំ​។

ទីក្រុងឡុងដ៍៖ រដ្ឋាភិបាល​ប្រជាធិប​តេយ្យ​នៃ​បស្ចឹម​ប្រទេស​ខកខាន​ ​មិន​បាន​ទប់ទល់​នឹង​ការ​រំលោភ​លើ​សិទ្ធិ​មនុស្ស​សកល​ទេ ​នេះ​បើ​យោង​ទៅ​តាម​អង្គការការពារ​សិទ្ធិ​មនុស្ស​អន្ដរជាតិ​Human ​Rights​ Watch។ សេចក្ដី​រាយ​ការណ៍​របស់​ក្រុម​នេះ​ប្រចាំ​ឆ្នាំ​២០១១​អំពី​ការ​រំលោភ​សិទ្ធិ​មនុស្ស​ក្នុង​ពិភពលោក​ ឲ្យ​ដឹង​ថា​ ​ជើងឯក​ខាង​លទ្ធិប្រជា​ធិបតេយ្យ​មិន​បាន​ប្រឆាំង​មេដឹក​នាំ​កាន់​អំណាច​ផ្ដាច់ការ​នៅ​ក្នុង​ពិភព​លោក​ទេ។

លោក​តុម ប័រសឺស (​Tom ​Porteous)​ ​នាយក​ការិយាល័យ​របស់​អង្គការ​ឃ្លាំមើល​សិទ្ធិ​មនុស្ស​ (Human​ Rights​ Watch)​ នៅ​ក្នុង​ទីក្រុង​ឡុង​ថ្លែង​ថា៖

«រដ្ឋាភិបាល​ប្រជា​ធិបតេយ្យ​ ​ហើយ​ជា​ពិសេស​ ​រដ្ឋាភិបាលលើកស្ទួយ​សិទ្ធិមនុស្ស​ជាទូទៅ​ ខក​ខាន​មិន​បានកៀប​សង្កត់​ទៅ​លើ​រដ្ឋាភិបាល​ក្នុង​ប្រទេស​ដែល​មានការរំ​លោភ​សិទ្ធិ​មនុស្ស​ច្បាស់​ក្រឡែត​នោះទេ»។

សេចក្ដីរាយការណ៍​នោះ​ចេញ​ឈ្មោះ​មន្ដ្រី​អន្ដរជាតិ​ល្បី​ឈ្មោះ​ ដែល​អង្គការ​នោះ​ថ្លែង​ថា​ ជាអ្នក​ជើងឯក​ខាង​លទ្ធិប្រជាធិបតេយ្យ​ ដែល​បរាជ័យ​ ដូចជាលោក​បាន​ គី​មូន​ (Ban Ki-moon)​ អគ្គ​លេខាធិការ​អង្គការ​សហ​ប្រជាជាតិ ​ លោក​ស្រី​ខេតសឺរីន​ អាស្ហតុន ​(Catherine ​Ashton)​ ​ចាងហ្វាងនយោបាយ​បរទេសរបស់​សហភាព​អឺរ៉ុប​ និងប្រធានាធិបតី​ ស.រ.អ. ​លោកបារាក់​ អូបាម៉ា (Barack Obama)។

លោក​ Porteous ​ថ្លែង​ទៀត​ថា អ្នក​ដែល​ធ្លាប់​ធ្វើ​ជា​ជើងឯក​ការពារ​សិទ្ទិមនុស្ស​ជា​ប្រពៃណី​ បាន​បន្ទន់​ឥរិយាបថ​របស់​ខ្លួន​ ​មួយ​ផ្នែក​ដោយ​សារ​តែមាន​ការ​ផ្លាស់​ប្ដូរ​ឥទ្ធិពល​ក្នុង​សកល​លោក។

«នៅ​ពេល​នេះ​ ​យើងរ​ស់នៅ​ក្នុង​ពិភព​លោកពហុមតិ​ ដែល​ប្រទេស​មាន​លទ្ធិ​ប្រជា​ធិបតេយ្យ​នៅ​បស្ចឹម​ប្រទេស​មើល​ឃើញ​ថា​ ឥទ្ធពល​របស់ខ្លួន​ចុះ​ថយ ពី​ព្រោះ​តែ​មូល​ហេតុ​សេដ្ឋកិច្ច​និងនយោបាយ​ ​តែយើង​ក៏បាន​ឃើញ​ថា​ ​ប្រទេសនិយម​លទ្ធិ​ប្រជា​ធិបតេយ្យ​នៅ​បស្ចិម​ប្រទេស​ខ្លួនឯង​ក៏​មានការពាក់ព័ន្ធ​នឹង​ការ​រំលោភ​សិទ្ធិ​មនុស្ស​ធ្ងន់ធ្ងរដែរ ក្នុង​រយៈ​ពេល​១០​ឆ្នាំ​កន្លង​ទៅ​នេះ​ ​ហេតុ​ដូច្នេះ​ ​ភាព​ស្រប​ច្បាប់​និង​ការ​ទុក​ចិត្ដរបស់​គេ​ថា​ ​ជា​អ្នក​លើក​ដំកើង​សិទ្ធិ​មនុស្ស​នោះ​ ​ក៏​បាន​ចុះ​អន់​ថយ​ដែរ។

ឧទាហរណ៍​ ​លោក ​Porteous​ និយាយ​ថា​ ​វិធាន​ការ​ប្រឆាំង​ភេរវ​កម្ម​ ​នៅ​ក្នុង​ស.រ.អ.​ និង​នៅ​ក្នុង​ប្រទេស​អឺរ៉ុប​ទាំង​មូល​ ​បាន​នាំ​ឲ្យ​មានការ​រំលោភ​សិទ្ធិ​មនុស្ស។

លោក​និយាយ​ថា​ ​ហើ​យ​នៅ​ក្នុង​ប្រ​ទេស​អឺរ៉ុប​ ​ការ​រើស​អើង​ប្រឆាំង​ក្រុម​អម្បូរ​ភាគតិច​បាន​ក្លាយទៅជាបញ្ហាកាន់តែ​ធំ។​ កាល​ពី​ឆ្នាំ​កន្លង​ទៅ​នេះ​ ​ប្រទេស​អឺរ៉ុបបាន​ធ្វើការ​វាយ​បង្រ្កាប​មក​លើ​ក្រុម​រ៉ូម៉ា (Roma) ​ឬ​ជិបស៊ី ​(gypsy)​ គឺ​ជា​វិធានការ​មួយ​ដែល​អង្គការ​ការ​ពារ​សិទ្ធិ​មនុស្ស​ទិតៀន​យ៉ាង​ខ្លាំង។

ក្រុម​នោះ​បាន​ដាក់​ប្រទេស​អ៊ីរ៉ង់​ ​ភូមា​ (Myanmar)​ ​កូរ៉េ​ខាង​ជើង​ ​យេ​មិន ​(Yemen )​និង​ប្រទេស​ហ្ស៊ីមបាបវ៉េ ​(Zimbabwe) ​នៅ​ក្នុង​ចំណោម​រដ្ឋាភិបាល​រំលោភ​សិទ្ធិមនុស្សច្រើន​បំផុត។​ ​នេះ​ជា​សេចក្ដី​រាយការណ៍​ប្រចាំ​ឆ្នាំ​លើក​ទី២១​របស់​អង្គការ ​Human Rights ​Watch​ ស្ដីពី​ស្ថានការណ៍​សិទ្ធិ​មនុស្សក្នុង​ពិភព​លោក៕

បក​ប្រែ​សម្រួល​ដោយ ​លោក​ អ៊ូ ធួក

XS
SM
MD
LG