អង្គការសិទ្ធិមនុស្សHuman Rights Watch ចង់ឲ្យក្រុមមេដឹកនាំ Nigeria ធានាឲ្យជាក់ច្បាស់ថាកងកម្លាំងសន្ដិសុខប្រព្រិត្ដអំពើដោយមានការទទួលខុសត្រូវ នៅក្នុងការបញ្ឈប់អំពើហិង្សានៅពេលក្រោយការបោះឆ្នោត។ក្រុមអ្នកគាំទ្រអតីតមេដឹកនាំយោធាបានពើបប្រយុទ្ធជាមួយប៉ូលីសកុប្បកម្ម នៅក្នុងការតវ៉ាប្រឆាំងនឹងការបោះឆ្នោតជ្រើសរើសលោកប្រធានាធិបតី Goodluck Jonathan ឲ្យកាន់តំណែង។
លោកប្រធានាធិបតី Jonathan កំពុងតែបញ្ជូនកងកម្លាំងរក្សាសន្ដិសុខច្រើនថែមទៀត ទៅកាន់ក្រុមរដ្ឋនៅភាគខាងជើង ដែលនៅក្នុងរដ្ឋទាំងនោះ ក្រុមអ្នកកាន់សាសនាឥស្លាមដែលគាំទ្រ លោក Muhammadu Buhari បេក្ខជន សម្រាប់តំណែងប្រធានាធិបតី ដែលបានចាញ់ការបោះឆ្នោត បានវាយប្រហារទៅលើព្រះវិហារគ្រីស្ដ ផ្ទះសម្បែង ហើយនឹងស្ថានីយ៍ប៉ូលីស ជាហេតុធ្វើឲ្យមានការវាយប្រហារសងសឹកវិញរបស់ក្រុមអ្នកកាន់សាសនាគ្រីស្ដ។
«ជាអកុសលដែលមានក្រុមវង្វេងវង្វាន់ខ្លះ មិនបានចូលរួមនៅក្នុងស្មារតីនៃ សមិទ្ធិផលប្រជាធិបតេយ្យរបស់យើងទេ។ ពួកគេបង្កើតជាក្រុមមនុស្សមិនមានការជឿជាក់ ហើយវាយប្រហារដោយប្រើកម្លាំងបំផ្លិចបំផ្លាញនិងយ៉ាងប្រល័យ នៅក្នុងផ្នែកខ្លះៗនៃប្រទេសនេះ។ ពួកគេបានសម្លាប់ហើយធ្វើឲ្យពលរដ្ឋស្លូតត្រង់ដាច់ដៃជើងដែរ។ ពួកគេដុតអគារពាណិជ្ជកម្ម ផ្ទះរបស់ឯកជន ហើយព្រមទាំងទីកន្លែងសក្ការ:បូជាថែមទៀតផង»។
លោក Buhari និយាយថា ការបោះឆ្នោតមិនសុច្ចរឹត មានការក្លែងបន្លំ តាមរយ:ការប្រើម៉ាស៊ីនកុំព្យូទ័ររបស់គណ:កម្មការរៀបចំការបោះឆ្នោត ហើយលោកកំពុងតែអំពាវនាវឲ្យក្រុមអ្នកគាំទ្រលោក ស្ថិតនៅឲ្យស្ងប់ស្ងៀម នៅពេលដែលគណបក្សរបស់លោក តវ៉ាប្រឆាំងនឹងលទ្ធផលនោះនៅក្នុងតុលាការ។
លោកប្រធានាធិបតី Jonathan មានប្រសាសន៍ថា ការរំជើបរំជួលទាំងនេះមិនគ្រាន់តែជាការប្រឆាំងតវ៉ានយោបាយប៉ុណ្ណោះទេ។ លោក មានប្រសាសន៍ថា ការរំជើបរំជួលទាំងនេះ មានគោលដៅជាក់ស្ដែងដើម្បីធ្វើឲ្យការបោះឆ្នោតនាពេលអនាគតនៃប្រទេស មានការលំបាក ហើយនេះជាការមិនអាចទទួលយកបានទេ។
នៅពេលដែលកងកម្លាំងរក្សាសន្ដិសុខ ទៅបញ្ឈប់អំពើហិង្សាដែលអង្គការកាកបាទក្រហមឲ្យដឹងថា បានធ្វើឲ្យមនុស្សជាង៤ម៉ឺននាក់ភៀសលំនៅដ្ឋាន អង្គការ Human Rights Watch ឲ្យដឹងថា រដ្ឋាភិបាលរបស់លោក Jonathan ត្រូវតែធានាឲ្យបានជាក់ច្បាស់ថា កងកម្លាំងទាំងនោះមិនធ្វើឲ្យស្ថានភាពកាន់តែយ៉ាប់យ៉ឺនថែមទៀតទេ ដោយប្រើកម្លាំងជ្រុលហួសនោះ៕
ប្រែសម្រួលដោយ កងស៊ីវន