អង្គការឃ្លាំមើលការរំលោភសិទ្ធិមនុស្ស Human Rights Watch អំពាវនាវឲ្យអាជ្ញាធរកម្ពុជាបញ្ឈប់ការប្រើពាក្យបញ្ឆេះកំហឹងប្រឆាំងក្រុមជនបរទេសនិងជនជាតិភាគតិច ទាក់ទងនឹងករណីឆ្លងរាលដាលវីរុសកូរ៉ូណាថ្មី ឬកូវីដ១៩។ នេះបើយោងតាមសេចក្តីប្រកាសព័ត៌មានមួយដែលអង្គការនេះបានចេញផ្សាយកាលពីថ្ងៃទី៣១ ខែមីនា។
អង្គការដែលមានមូលដ្ឋាននៅសហរដ្ឋអាមេរិកនេះ បញ្ជាក់ថា ដើម្បីការពារបុគ្គលដែលមានផ្ទុកមេរោគកូវីដ១៩ កុំឲ្យទទួលរងការរើសអើងនិងអំពើហិង្សា រដ្ឋាភិបាល គួរតែកម្រិតការបញ្ចេញព័ត៌មានផ្ទាល់ខ្លួនរបស់បុគ្គលដូចជាជាតិពន្ទុ ពូជសាសន៍ សាសនា ចំណងទាក់ទងខាងនយោបាយ និងអត្តសញ្ញាណភេទជាដើម។
ការអំពាវនាវនេះ បានធ្វើឡើង ក្រោយពីក្រសួងសុខាភិបាលកម្ពុជា កាលពីថ្ងៃទី១៧ ខខែមីនា បានបង្ហោះព័ត៌មានតាមទំព័រហ្វេសប៊ុកផ្លូវការរបស់ខ្លួនអំពីករណីអ្នកឆ្លងជំងឺកូវីដ១៩នេះ ដោយបង្ហាញក្រុមជាក់លាក់នៃអ្នកដែលបានឆ្លងវីរុសនេះថាជា«ខ្មែរឥស្លាម»។
ការបង្ហោះព័ត៌មានបែបនេះ បានញ៉ាំងឲ្យមានការអត្ថាធិប្បាយរើសអើងនិងសម្អប់លើបណ្តាញអ៊ីនធឺណិត ប្រឆាំងនឹងសហគមន៍ជនជាតិភាគតិចចាមដែលកាន់សាសនាឥស្លាមក្នុងប្រទេសកម្ពុជា។
គិតមកត្រឹមបំណាច់ខែមីនានេះ កម្ពុជា មានអ្នកឆ្លងវីរុសនេះចំនួន១០៩នាក់៕
