ខណៈតុលាការនឹងបើកសវនាការទាក់ទងនឹងការស្នើសុំនៅក្រៅឃុំរបស់កញ្ញា សេង ធារី នាថ្ងៃព្រហស្បតិ៍ខាងមុខនេះ មន្រ្តីសិទ្ធិមនុស្សជំរុញឱ្យរដ្ឋាភិបាលកម្ពុជាដោះលែងមេធាវីសញ្ជាតិខ្មែរអាមេរិកាំងរូបនោះនៅក្រៅឃុំ ដើម្បីកុំឱ្យកម្ពុជារងសម្ពាធអន្តរជាតិណាមួយ។
លោក នី សុខា ប្រធានសមាគមការពារសិទ្ធិមនុស្សអាដហុក ប្រាប់វីអូអេនៅថ្ងៃអង្គារនេះថា តុលាការគួរតែសម្រេចឱ្យកញ្ញា សេង ធារី បាននៅក្រៅឃុំឃាំង ព្រោះមានលក្ខខណ្ឌគ្រប់គ្រាន់ដែលស្របទៅតាមនីតិវិធីព្រហ្មទណ្ឌ។ លោកបន្តថា តុលាការមិនគួរប្រើប្រាស់យន្តការឃុំមនុស្សជាចម្បងនោះទេ ហើយការដោះលែងឱ្យនៅក្រៅឃុំក៏អាចបន្ថយស្ថានការណ៍តានតឹងផងដែរ។
លោកថ្លែងថា៖ «បើសិនជាអនុញ្ញាតឱ្យគាត់បាននៅក្រៅឃុំបណ្តោះអាសន្ន អានេះក៏ជាការមួយបង្ហាញពីការបន្ធូរបន្ថយនៃបរិយាកាសស្ថានភាពសិទ្ធិមនុស្ស»។
លោក នី សុខា អះអាងថា ការឃាត់ខ្លួនសកម្មជនរូបនេះធ្វើឡើងដោយជាប់ហេតុផលនយោបាយ។ ហេតុនេះ តុលាការក៏ដូចជារដ្ឋាភិបាលគួរតែទម្លាក់ចោលបទចោទលើកញ្ញា សេង ធារី ដើម្បីកុំឱ្យរងសម្ពាធពីសហរដ្ឋអាមេរិក និងសហគមន៍អឺរ៉ុបកាន់តែខ្លាំង។
លោកបន្ថែមថា៖«បើសិនជាយើងនៅបន្តការឃុំខ្លួន ការចោទប្រកាន់បែបនេះទៀត ខ្ញុំគិតថា នៅពេលខាងមុខនេះ កម្ពុជានឹងរងនូវសម្ពាធសហគមន៍អន្តរជាតិផ្សេងៗទៀតជាក់ជាមិនខាន»។
រដ្ឋមន្រ្តីការបរទេសអាមេរិក លោក Antony Blinken ដែលបានមកបំពេញទស្សនកិច្ចនៅកម្ពុជា កាលពីកន្លងទៅ ក៏បានស្នើឱ្យរដ្ឋាភិបាលកម្ពុជាដោះលែងកញ្ញា សេង ធារី ផងដែរ។
អ្នកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា ដែលបានទៅសួរសុខទុក្ខកញ្ញា សេង ធារី នៅពន្ធនាគារក្នុងខេត្តព្រះវិហារ នៅថ្ងៃទី៣០ ខែសីហា បានបង្ហោះសារនៅលើហ្វេសប៊ុករបស់អ្នកស្រីថា សុខភាពរបស់សកម្មជនរូបនេះនៅតែល្អធម្មតា ជាពិសេស«ឆន្ទៈខ្វល់ខ្វាយ»ពីសង្គមជាតិ «នៅតែមានផុសផុល»។
អ្នកស្រីបន្ថែមថា កញ្ញា សេង ធារី បានលើកជាសំណូមពរមួយចំនួនពី«លទ្ធភាពទទួលបានព័ត៌មាន ការផ្ទេរទៅពន្ធនាគារព្រៃសវិញ» ពីព្រោះវាមានការលំបាកក្នុងការធ្វើដំណើរទៅសួរសុខទុក្ខដោយគ្រួសារ មិត្តភ័ក្តិ និងបាត់បង់ឱកាសទទួលបានព័ត៌មាន។
អ្នកស្រី ចក់ សុភាព បន្ថែមថា អ្នកស្រីខ្លួនឯងផ្ទាល់មាន«អារម្មណ៍សង្វេគ ដោយឃើញជនរួមជាតិមួយចំនួន ដោយសារតែមាននិន្នាការនយោបាយ ឬទស្សនៈខុសគ្នា ត្រូវប្រឈមមុខចំពោះបទចោទក្បត់ជាតិ ឬញុះញង់ជាដើម»។
អ្នកស្រីបញ្ជាក់ក្នុងន័យដើមថា៖ «តើពួកគេក្បត់ជាតិនឹងអ្នកណា? យើងធ្លាប់ឮពីសម័យមុនដែលខ្មែរចោទខ្មែរថា ក្បត់ជាតិ អាយ៉ង។ល។ តែបច្ចុប្បន្ន យើងនៅតែឃើញការចោទប្រកាន់ខ្មែរ និងខ្មែរដដែល។ ខ្ញុំសង្ឃឹមថាការចោទប្រកាន់ដោយសារការប្រកាន់ទស្សនៈនិន្នាការនយោបាយខុសគ្នានេះគួរបញ្ចប់ និងទម្លាក់បទចោទប្រកាន់ដល់ពួកគាត់ ហើយគួរមានដំណោះស្រាយបែបនយោបាយបង្រួបបង្រួមជាតិ ដូចនោះទើបយើងអាចដោះស្រាយបញ្ហាជាតិសំខាន់ៗចំពោះមុខបាន»។
អ្នកស្រី ចក់ សុភាព ប្រាប់វីអូអេតាមទូរស័ព្ទនៅថ្ងៃអង្គារនេះថា កញ្ញា សេង ធារី មានសិទ្ធិនៅក្នុងការសុំនៅក្រៅឃុំ រហូតទាល់តែតុលាការកាត់ទោសចប់សព្វគ្រប់។
អ្នកស្រីថ្លែងថា៖ «ជាគោលការណ៍ មែនទែន គាត់គួរតែអាចមានសេរីភាពរហូតដល់តុលាការកាត់ទោសជាស្ថាពរហ្នឹង ព្រោះគាត់នៅប្តឹងផ្តល់បន្តទៀត»។
វីអូអេមិនអាចសុំការអត្ថាធិប្បាយពីលោក ប្លង់ សំណាង និងលោក ជា ម៉េត អ្នកនាំពាក្យរបស់សាលាឧទ្ធរណ៍រាជធានីភ្នំពេញបានទេនៅថ្ងៃអង្គារនេះ។
អ្នកនាំគណបក្សប្រជាជនកម្ពុជា លោក សុខ ឥសាន ប្រាប់វីអូអេថា តុលាការកាត់ទោសកញ្ញា សេង ធារី ដោយសារតែជាប់ពាក់ព័ន្ធជាមួយការវិលចូលស្រុករបស់លោក សម រង្ស៊ី ដែលលោកថា «ដើម្បីផ្តួលរលំរដ្ឋាភិបាល»។ លោកបន្តថា មិនមានជនណាអាចមានឥទ្ធិពលលើការសម្រេចចិត្តរបស់តុលាការកម្ពុជាបានឡើយ។
លោកថ្លែងថា៖«អ៊ីចឹងការដែលមានការសំណូមពរ ក៏ដូចជាការទាមទារផ្សេងៗឱ្យកញ្ញា សេង ធារី រួចពីការអនុវត្តទោស គឺមិនអាចទៅរួចទេ»។
លោក ជូង ជូងី មេធាវីរបស់កញ្ញា សេង ធារី ប្រាប់វីអូអេថា តុលាការនឹងបើកសវនាការនៅថ្ងៃព្រហស្បតិ៍ ទី១ ខែកញ្ញា ឆ្នាំ២០២២ តាមការគ្រោងទុក។
លោកមេធាវីបន្ថែមថា រហូតមកដល់ពេលនេះ លោកមិនទាន់ដឹងថា តើអាជ្ញាធរពន្ធនាគារនឹងដឹកកញ្ញា សេង ធារី មកចូលរួមសវនាការ នៅរាជធានីភ្នំពេញ ឬយ៉ាងណានៅឡើយទេ។
លោកថ្លែងថា៖ «ហើយជាគោលការណ៍ច្បាប់ សមត្ថកិច្ចត្រូវដឹកគាត់មកសវនាការនៅថ្ងៃទី១នេះ។ ប៉ុន្តែរហូតមកទាល់ពេលនេះ ខ្ញុំមិនទាន់ទទួលបានព័ត៌មានពីខាងពន្ធនាគារ ឬក៏ពីខាងមន្ត្រីក្រសួងមហាផ្ទៃថា មកចូលរួមសវនាការដែរ ឬយ៉ាងណានោះទេ»។
គួរបញ្ជាក់ថាកញ្ញា សេង ធារី ត្រូវបានតុលាការរាជធានីភ្នំពេញ សម្រេចផ្ទន្ទាទោសដាក់ពន្ធនាគារ៦ឆ្នាំពីបទរួមគំនិតក្បត់ និងបទញុះញង់ឱ្យមានភាពវឹកវរដល់សន្តិសុខសង្គម កាលពីថ្ងៃទី១៤ ខែមិថុនា ឆ្នាំ២០២២។ កញ្ញា សេង ធារី ដែលជាមេធាវីមួយរូបមានសញ្ជាតិអាមេរិក ត្រូវបានចាប់ខ្លួនភ្លាមៗ ក្រោយតុលាការប្រកាសសាលក្រម។ កញ្ញាត្រូវបានបញ្ជូនទៅឃុំខ្លួននៅក្នុងមណ្ឌលឃុំឃាំងខេត្តព្រះវិហារ នាថ្ងៃបន្ទាប់។ ក្នុងការចោទប្រកាន់លើកញ្ញា សេង ធារី នោះ ចៅក្រមសាលាដំបូងរាជធានីភ្នំពេញសំអាងលើភ័ស្តុតាង ដែលកញ្ញាបង្ហោះហ្វេសប៊ុករិះគន់លោកនាយករដ្ឋមន្ត្រី ហ៊ុន សែន និងការគាំទ្រលោក សម រង្ស៊ី មេដឹកនាំគណបក្សប្រឆាំងចូលប្រទេសវិញ៕
