មន្ត្រីសិទ្ធិមនុស្សនៅកម្ពុជាចាត់ទុកការបញ្ជូនខ្លួនកញ្ញា សេង ធារី ពីពន្ធនាគារព្រៃស ក្នុងរាជធានីភ្នំពេញ ទៅកាន់ពន្ធនាគារក្នុងខេត្តព្រះវិហារ ជាការដាក់បន្ទុកបន្ថែមលើមេធាវីខ្មែរអាមេរិកាំងរូបនេះ និងជា«ការព្រមាន»មួយដល់អ្នកតស៊ូមតិ ដើម្បីសិទ្ធិសេរីភាពដទៃទៀត។
មេធាវីខ្មែរអាមេរិកាំង កញ្ញា សេង ធារី ត្រូវកម្លាំងសន្តិសុខចម្រុះចាប់ខ្លួនភ្លាមៗ កាលពីថ្ងៃទី១៤ ខែមិថុនា ក្រោយសាលាដំបូងរាជធានីភ្នំពេញប្រកាសសាលក្រមឱ្យអ្នកច្បាប់រូបនេះ មានទោសជាប់ពន្ធនាគារចំនួន៦ឆ្នាំ ពីបទ«រួមគំនិតក្បត់» ដែលមានទំនាក់ទំនងនឹងផែនការមាតុភូមិនិវត្តន៍មិនជោគជ័យរបស់លោក សម រង្ស៊ី កាលពីឆ្នាំ២០១៩។
ក្រោយពីស្ថិតក្រោមការឃុំឃាំងនៅពន្ធនាគារព្រៃស ក្នុងក្រុងភ្នំពេញ បន្ទាប់ពីត្រូវបានចាប់ខ្លួន កញ្ញា សេង ធារី ត្រូវបានបញ្ជូនទៅកាន់ពន្ធនាគារក្នុងខេត្តព្រះវិហារ កាលពីថ្ងៃសុក្រ ទី១៧ ខែមិថុនា កន្លងទៅនេះ។
នាយករងទទួលបន្ទុកផ្នែកឃ្លាំមើលនៃអង្គការលីកាដូ លោក អំ សំអាត ចាត់ទុកការបញ្ជូនកញ្ញា សេង ធារី ចេញឆ្ងាយពីក្រុងភ្នំពេញជាការឆ្លើយតបបែប«ព្រមាន»មួយទៅមួយទៅកាន់អ្នកតស៊ូមតិ ដើម្បីប្រជាធិបតេយ្យ ឬសិទ្ធិសេរីភាពមូលដ្ឋាន។ លោកក៏បានបង្ហាញមន្ទិលជុំវិញហេតុផលសន្តិសុខនិងសុវត្ថិភាព ដែលអាជ្ញាធរលើកឡើងពាក់ព័ន្ធនឹងការបញ្ជូនខ្លួនមេធាវីខ្មែរអាមេរិកាំងរូបនេះទៅកាន់ពន្ធនាគារខេត្តព្រះវិហារ ដោយថាកាលពីពេលកន្លងមក លោកសង្កេតឃើញថា មិនមានបញ្ហាចោទជាចម្បងនោះទេ នៅពេលមានការសម្តែងការគាំទ្រនៅខាងមុខពន្ធនាគារព្រៃស ក្នុងក្រុងភ្នំពេញ ចំពោះមេដឹកនាំសហជីពមួយចំនួន។
លោកថ្លែងថា៖ «ទាក់ទងនឹងសន្តិសុខសុវត្ថិភាពនៅខាងក្រៅពន្ធនាគារដូចជារឿងការតស៊ូមតិអីជាដើម យើងឃើញថា ពីមុនៗមក ដូចជាមេដឹកនាំសហជីព និងតំណាងសហគមន៍ដីធ្លី ដែលត្រូវបានចាប់និងឃុំខ្លួនហ្នឹង ក៏នៅមានការតស៊ូមតិនៅខាងមុខហ្នឹងដែរ។ ប៉ុន្តែដូចជាមិនមានហានិភ័យអីកើតឡើងទេណា ទៅតាមអ្វីដែលអាជ្ញាធរលើកឡើងនោះទេ»។
នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព ចាត់ទុកការបញ្ជូនខ្លួនកញ្ញា សេង ធារី ទៅកាន់ពន្ធនាគារថ្មីមួយទៀតជា«ការសងសឹក ឬការដៅមុខសញ្ញាបន្ថែមទៀត» លើសពីស្ថានទម្ងន់ទោសដែលកំពុងមានស្រាប់។
អ្នកស្រីនិយាយថា សកម្មភាពនៃការបញ្ជូនខ្លួន កញ្ញា សេង ធារី នេះ ក៏ជារូបភាពនៃការដកហូតសិទ្ធិសេរីភាពរបស់សកម្មជនសិទ្ធិមនុស្សរូបនេះផងដែរជុំវិញដំណើរការទទួលបានការការពារតាមផ្លូវច្បាប់។
អ្នកស្រីថ្លែងថា៖ «យើងដឹងហើយថា ការកាត់ទោសលើពួកគាត់នេះមិនទាន់ចូលជាស្ថាពរនៅឡើយទេ។ បានន័យថាពួកគាត់អាចនឹងមានសិទ្ធិនៅក្នុងការប្តឹងបន្តទៀត។ អ៊ីចឹងបើសិនជាក្នុងការបញ្ជូនអ្នកនាង សេង ធារី ទៅឆ្ងាយនោះ វានឹងដកហូតនូវសិទ្ធិមួយចំនួន ដែលពាក់ព័ន្ធនឹងការពិគ្រោះយោបល់ជាមួយមេធាវីរបស់គាត់ ព្រោះវាបង្កនូវផលលំបាក ដែលមេធាវីត្រូវធ្វើដំណើរឆ្ងាយ ដើម្បីប្រឹក្សាយោបល់នានា»។
អ្នកនាំពាក្យស្ថានទូតអាមេរិកប្រចាំកម្ពុជាលោក Chad Roedemeier បានឆ្លើយតបវីអូអេតាមរយៈសារជាអ៊ីមែលនាថ្ងៃចន្ទនេះជាភាសាអង់គ្លេសនិងត្រូវបានប្រែសម្រួលក្នុងន័យដើមថា៖ «មន្ត្រីស្ថានទូតអាមេរិកមិនទាន់ត្រូវបានអនុញ្ញាតឱ្យជួបជាមួយកញ្ញា សេង ធារី នៅឡើយទេ។ យើងនៅតែបន្តទាក់ទងជាមួយតំណាងរបស់កញ្ញា ហើយនឹងផ្តល់សេវាកុងស៊ុលសមស្រប កាន់តែឆាប់តាមតែអាចធ្វើទៅបាន»។
លោកបានបន្តថា៖ «សាជាថ្មី សហរដ្ឋអាមេរិកស្នើសុំឱ្យមានការដោះលែងកញ្ញា សេង ធារី និងសកម្មជនគណបក្សប្រឆាំងដទៃទៀត ដែលត្រូវបានជាប់ឃុំដោយអយុត្តិធម៌ ជាបន្ទាន់។ យើងស្នើឱ្យអាជ្ញាធរបញ្ឈប់សវនាការជំរុញពីក្រោយដោយហេតុផលនយោបាយ ប្រឆាំងនឹង ពលរដ្ឋកម្ពុជា ដែលអនុវត្តសេរីភាពមូលដ្ឋានរបស់ពួកគេ»។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា បានឱ្យដឹងថា ការបញ្ជូនខ្លួនកញ្ញា សេង ធារី ទៅកាន់ពន្ធនាគារក្នុងខេត្តព្រះវិហារគឺដោយសារហេតុផលសន្តិសុខ និងសណ្តាប់ធ្នាប់។ លោកបន្ថែមថា ការណ៍នេះ គឺដើម្បីបញ្ចៀសពីបញ្ហាជាយថាហេតុផលផ្សេងៗបង្កឡើងដោយក្រុមអ្នកគាំទ្រកញ្ញា សេង ធារី និងការពារមិនឱ្យមានការរំខានដល់ការងារមន្ត្រី ពលរដ្ឋនិងកន្លែងសាធារណៈជុំវិញពន្ធនាគារ ក៏ដូចជាក្រុមគ្រួសារជនជាប់ឃុំដែលមកសួរសុខទុក្ខ។
លោក នុត សវនា បន្តថា ទោះបីការបញ្ជូនខ្លួនកញ្ញា សេង ធារី ទៅកាន់ពន្ធនាគារក្នុងខេត្តព្រះវិហារ អាចបង្កការលំបាកខ្លះដល់មេធាវីការពារក្តី ប៉ុន្តែលោកថា ការណ៍នេះមិនមានគោលបំណងបំបាក់ស្មារតីមកលើកញ្ញា សេង ធារី នោះទេ។
លោកថ្លែងថា៖ «ចោទថាជាការបំបាក់ស្មារតីហ្នឹង មិនមែនជាការបំបាក់ស្មារតីនោះទេ។ នៅ[ពន្ធនាគារ] ម២[មណ្ឌលអប់រំកែប្រែទី២]នេះ មនុស្សជាច្រើននៅក្នុងបន្ទប់ហ្អា ដោយសារតែវាក្នុងទឹកដីរាជធានីភ្នំពេញ។ អ៊ីចឹងនៅព្រះវិហារនោះ តាមពិតកន្លែងស្នាក់នៅ វាស្រួលជាង ព្រោះវាអត់ចង្អៀត។ ហើយយើងមិនមែនដាក់គាត់អីឃុំដោយឡែកខុសពីគ្នាទេ។ យើងដាក់គាត់ជាមួយស្ត្រីដទៃទៀតដែរ ដើម្បីកុំឱ្យគាត់ប៉ះពាល់សតិអារម្មណ៍»។
លោក ជូង ជូងី មេធាវីរបស់កញ្ញា សេង ធារី ថ្លែងថា ការបញ្ជូនទៅឃុំខ្លួននៅឆ្ងាយបែបនេះ បង្កការលំបាកសម្រាប់រូបលោកក្នុងការទៅជួប និងផ្តល់ការប្រឹក្សាដល់កូនក្តីរបស់លោក។ ទោះជាយ៉ាងណា លោកបញ្ជាក់ថាលោកនឹងទៅជួបកូនក្តីក្នុងពន្ធនាគារខេត្តព្រះវិហារ ដើម្បីរៀបចំពាក្យបណ្តឹងទាស់នឹងសេចក្តីសម្រេចរបស់តុលាការរាជធានីភ្នំពេញដែលផ្តន្ទាទោសលើកញ្ញា សេង ធារី៕
មន្ត្រីសិទ្ធិមនុស្ស៖ ការបញ្ជូនកញ្ញា សេង ធារី ទៅឃុំនៅពន្ធនាគារខេត្តព្រះវិហារជាការដាក់សម្ពាធបន្ថែម
ភ្នំពេញ —
