មេដឹកនាំទីក្រុងហុងកុងអ្នកស្រី Carrie Lam បាននិយាយនៅថ្ងៃអង្គារនេះថា សំណើច្បាប់សន្តិសុខជាតិរបស់រដ្ឋាភិបាលក្រុងប៉េកាំងនឹងមិនប៉ះពាល់ដល់សិទ្ធិ និងសេរីភាពរបស់ទីក្រុងហុងកុងនោះទេ ហើយអ្នកស្រីបានអំពាវនាវឲ្យពលរដ្ឋរង់ចាំមើលសេចក្ដីលម្អិតនៃសំណើច្បាប់នេះជាមុនសិន។
អ្នកស្រី Lam លើកឡើងដូច្នេះដើម្បីជាការបន្ថែមទៅនឹងការអះអាងជាច្រើនមិនធ្លាប់មានពីមុនមករបស់មន្ត្រីរដ្ឋាភិបាលក្រុងប៉េកាំង និងមន្ត្រីទីក្រុងហុងកុង ក៏ដូចជាអតីតមេដឹកនាំទីក្រុងហុងកុងនានា ដែលការពារសំណើច្បាប់នេះ និងមានបំណងចង់ធានាដល់ពលរដ្ឋ អ្នកវិនិយោគ និងអ្នកការទូតអំពីសេរីភាពរបស់ទីក្រុងហុងកុង។
អ្នកស្រី Lam បានបញ្ជាក់នៅក្នុងសន្និសីទកាសែតប្រចាំសប្ដាហ៍ថា៖ «គ្មានហេតុផលចាំបាច់ណាមួយដែលយើងត្រូវបារម្ភនោះទេ»។
អ្នកស្រីបានបន្តថា៖ «នៅក្នុងរយៈពេល ២៣ ឆ្នាំចុងក្រោយនេះ នៅពេលណាដែលគេបារម្ភអំពីសេរីភាពបញ្ចេញមតិ និងសេរីភាពធ្វើការតវ៉ានៅក្នុងទីក្រុងហុងកុង ម្ដងហើយម្ដងទៀត ទីក្រុងនេះបានបង្ហាញឲ្យឃើញថា យើងគោរព និងរក្សានូវតម្លៃទាំងនោះ»។
អ្នកស្រីបានបន្ថែមថា៖ «រឿងដែលល្អបំផុតគឺត្រូវចាំមើលសំណើច្បាប់នេះលេចចេញជារូបរាងឡើងជាមុនសិន និងត្រូវស្វែងយល់ថា ហេតុអ្វីបានជាពេលនេះទីក្រុងហុងកុងត្រូវការសំណើច្បាប់នេះ»។
យោងលើសេចក្ដីព្រាងនៃសំណើច្បាប់នេះកាលពីសប្ដាហ៍មុន សំណើច្បាប់នេះមានគោលបំណងផ្ដោតលើការចង់ផ្ដាច់ឯករាជ្យ ការផ្ដួលរំលំរដ្ឋអំណាច និងសកម្មភាពភេរវកម្មនានា៕
