ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណប្រតិភូ​ជាន់​ខ្ពស់​កូរ៉េ​ខាង​ត្បូង​នឹង​ពិភាក្សា​ជាមួយ​នឹង​រដ្ឋាភិបាល​កូរ៉េ​ខាង​ជើង


ប្រធានាធិបតី​កូរ៉េ​ខាងត្បូង​ Moon Jae-in ថ្លែង​នៅ​ក្នុង​ខួបលើក​ទី​៩៩ ឆ្នាំ របស់​ចលនាទាមទារ​ឯករាជ្យកាលពី​ថ្ងៃទី​០១ មីនា ២០១៨។

ប្រធានាធិបតី​កូរ៉េ​ខាង​ត្បូង​លោក Moon Jae In នឹង​បញ្ជូន​គណ​ប្រតិភូ​ពិសេស​មួយ​ក្រុម​ទៅ​ប្រទេស​កូរ៉េ​ខាង​ជើង​នៅ​ថ្ងៃ​ចន្ទ​ស្អែក ដើម្បី​ពិភាក្សា​អំពី​វិធី​នានា​ដែល​អាច​ធ្វើ​ឲ្យ​ទំនាក់ទំនង​រវាង​ប្រទេស​ទាំង​ពីរ​កាន់តែ​ប្រសើរ​ឡើង និង​ដើម្បី​បន្ធូរបន្ថយ​ភាព​តានតឹង​នៅ​ឧបទ្វីប​កូរ៉េ។ នេះ​បើ​យោង​តាម​សេចក្ដី​ប្រកាស​របស់​វិមាន​ប្រធានាធិបតី​កូរ៉េ​ខាង​ត្បូង​នៅ​ថ្ងៃ​អាទិត្យ​នេះ។

លោក Yoon Young Chan អ្នក​នាំ​ពាក្យ​របស់​លោក​ប្រធានាធិបតី Moon Jae In បាន​ប្រាប់​អ្នក​សារព័ត៌មាន​ថា៖ «គណប្រតិភូ​ពិសេស​នឹង​ធ្វើ​ការ​ពិភាក្សា​ដ៏​ទូលំទូលាយ​លើ​បញ្ហា​មួយ​ចំនួន​ដូចជា ការ​បង្កើត​លក្ខខណ្ឌ​ដើម្បី​ឲ្យ​មាន​ការ​ចរចា​រវាង​កូរ៉េ​ខាង​ជើង និង​សហរដ្ឋ​អាមេរិក​ជា​ដើម»។

ប៉ុន្តែ បេសកកម្ម​នេះ​អាច​មាន​បញ្ហា​ដោយសារតែ​សមយុទ្ធ​យោធា​ដែល​គ្រោង​នឹង​ធ្វើ​ឡើង​រវាង​សហរដ្ឋ​អាមេរិក និង​កូរ៉េ​ខាង​ត្បូង។ ទីភ្នាក់ងារ​ព័ត៌មាន​ផ្លូវការ KCNA របស់​ប្រទេស​កូរ៉េ​ខាង​ជើង បាន​ព្រមាន​ថា រដ្ឋាភិបាល​ក្រុង​ព្យុងយ៉ាង​នឹង «ប្រឆាំង​នឹង​សហរដ្ឋ​អាមេរិក» ប្រសិន​បើ​សហរដ្ឋ​អាមេរិក​ធ្វើ​សមយុទ្ធ​យោធា​រួម​គ្នា​ជាមួយ​កូរ៉េ​ខាង​ត្បូង​នៅ​ខែ​មេសា​ខាង​មុខ​នេះ។

គណប្រតិភូ​ដែល​មាន​សមាជិក ១០ នាក់​នេះ នឹង​ដឹកនាំ​ដោយ​លោក Suh Hoon ប្រធាន​ទីភ្នាក់ងារ​ជាតិ​ស៊ើបការណ៍​សម្ងាត់ និង​លោក Chung Eui Yong ទីប្រឹក្សា​សន្តិសុខ​ជាតិ​កំពូល​របស់​លោក Moon Jae In។ លោក Moon Jae In មិន​ទាន់​ទទួល​យក​ការ​អញ្ជើញ​របស់​មេដឹកនាំ​កូរ៉េ​ខាង​ជើង​លោក Kim Jong Un ឲ្យ​លោក​ទៅ​ទស្សនកិច្ច​នៅ​ទីក្រុង​ព្យុងយ៉ាង​នៅ​ឡើយ​ទេ។

បន្ទាប់ពី​ធ្វើ​ទស្សនកិច្ច​រយៈពេល​ពីរ​ថ្ងៃ​ទៅ​កាន់​ប្រទេស​កូរ៉េ​ខាង​ជើង ក្រុម​បេសកជន​ពិសេស​កូរ៉េ​ខាង​ត្បូង​នេះ​នឹង​ធ្វើ​ដំណើរ​ទៅ​កាន់​សហរដ្ឋ​អាមេរិក​ដើម្បី​ផ្ដល់​ដំណឹង​ដល់​មន្ត្រី​រដ្ឋាភិបាល​អាមេរិកាំង​អំពី​ការ​ពិភាក្សា​របស់​ពួកគេ​ជាមួយ​នឹង​រដ្ឋាភិបាល​ក្រុង​ព្យុងយ៉ាង៕

XS
SM
MD
LG