ភ្ជាប់​ទៅ​គេហទំព័រ​ទាក់ទង

សវនាការ​សំណុំ​រឿង​គ្រូពេទ្យ​បួនរូប​ដែល​បើក​គ្លីនិក​គ្មាន​ច្បាប់​នឹង​បន្ត


រូបឯកសារ៖ តុលាការ​ខេត្ត​បាត់ដំបង​នឹង​បន្ត​បើក​សវនាការ​ជំនុំ​ជម្រះ​លើ​សំណុំ​រឿង​គ្រូ​ពេទ្យ​បួន​រូប​នៅ​ពាក់​កណ្តាល​ខែ​​មិថុនា​នេះ​ទៀត​ បន្ទាប់​ពី​សវនាការ​លើក​ទីមួយ​មិន​ទាន់​បាន​រក​ឃើញ​​​កំហុស​សម្រាប់​ការ​ចោទ​ប្រកាន់​ទាក់​ទង​នឹង​ការ​បើក​គ្លីនិក​បី​កន្លែង​ដោយ​គ្មាន​លិខិត​អនុញ្ញាត​ត្រឹម​ត្រូវ​ពី​ក្រសួង​សុខា​ភិបាល។​

តុលាការ​ខេត្ត​បាត់ដំបង​នឹង​បន្ត​បើក​សវនាការ​ជំនុំ​ជម្រះ​សំណុំ​រឿង​គ្រូពេទ្យ​បួនរូប​ដែល​បើក​គ្លីនិក​គ្មាន​ការ​អនុញ្ញាត​ពី​ក្រសួង​សុខាភិបាល​នៅ​ក្នុង​ស្រុក​ចំនួន​ពីរ​នៅ​តាម​ខេត្ត​ដែល​ស្ថិត​នៅ​ភាគ​ខាង​លិច​នៃ​ប្រទេស​កម្ពុជា។​

តុលាការ​ខេត្ត​បាត់ដំបង​នឹង​បន្ត​បើក​សវនាការ​ជំនុំ​ជម្រះ​លើ​សំណុំ​រឿង​គ្រូ​ពេទ្យ​បួន​រូប​នៅ​ពាក់​កណ្តាល​ខែមិថុនា​នេះ​ទៀត​ បន្ទាប់​ពី​សវនាការ​លើក​ទីមួយ​មិន​ទាន់​បាន​រក​ឃើញ​កំហុស​សម្រាប់​ការ​ចោទ​ប្រកាន់​ទាក់​ទង​នឹង​ការ​បើក​គ្លីនិក​បី​កន្លែង​ដោយ​គ្មាន​លិខិត​អនុញ្ញាត​ត្រឹម​ត្រូវ​ពី​ក្រសួង​សុខា​ភិបាល។​ នេះ​បើ​យោង​តាម​ការ​បញ្ជាក់​ពី​មន្រ្តី​ប៉ូលិស​ និង​ព្រះ​រាជ​អាជ្ញា​តុលាការ​ខេត្ត​បាត់ដំបង។​

ការ​ធ្វើសវនាការ​កាត់ទោសនេះ​ធ្វើ​ឡើង ​បន្ទាប់​ពី​អាជ្ញាធរ​ខេត្ត​បាត់ដំបង​បាន​បើក​យុទ្ធនាការ​ចុះ​បង្រ្កាប​គ្លីនិក​ចំនួន​បី​នៅ​ក្នុង​ស្រុក​សំពៅ​លូន​ និង​ស្រុក​ភ្នំ​ព្រឹក្ស​កាល​ពី​ចុង​ខែ​ឧសភា​កន្លង​ទៅ​នេះ ហើយ​បាន​ឃាត់​ខ្លួន​គ្រូពេទ្យ​បួន​រូប​ ដែល​ក្នុង​នោះ​មាន​ជន​ជាតិខ្មែរ​មួយ​រូប​ ចិន​ពីរ​រូប​ និង​ចិន​ដើម​កំណើត​ខ្មែរ​មួយ​រូប។​

លោក​ ជេត វណ្ណី ​ស្នងការ​រង​ប៉ូលិស​ខេត្ត​បាត់ដំបង​បាន​ប្រាប់​ VOA ខេមរ​ភាសា​នៅ​ថ្ងៃ​សុក្រ​នេះ​ថា ​តុលាការ​នឹង​បើក​សវនាការ​ម្តង​ទៀត​នៅ​ថ្ងៃ​ទី​១៨​ ខែ​មិថុនា​ ខណៈ​ពេល​គ្រូពេទ្យ​ទាំង​បួន​រូប​មិនទាន់​ត្រូវ​បាន​ចោទ​ប្រកាន់​ក្នុង​ករណី​ណា​មួយ​នៅ​ឡើយ​ ហើយ​ក៏​នៅ​មាន​សេរីភាព​ដូច​ពលរដ្ឋ​ទូទៅ។​

«បាទ! បាទ! បាទ!​ ហ្នឹង​គេ​មាន​ត្រូវ​អី​ឃាត់​គេ​កើត!​ បើ​យើង​អត់​ទាន់​ជម្រៈ​ធ្វើ​អី​កើត​ផង អត់មាន​នៅ​ក្នុង​ឃុំ​ឃាំង​បាន​ទេ​បាទ»។​

លោក​បាន​បញ្ជាក់​ថា​ តុលាការ​បាន​ស្នើ​ឲ្យ​អ្នក​បក​ប្រែ​ពិនិត្យ​ទៅ​លើ​សញ្ញា​ប័ត្រ​វេជ្ជ​បណ្ឌិត​ដែល​ទទួល​បាន​ពី​ប្រទេស​ចិន​របស់​គ្រូពេទ្យ​បួន​រូប​នេះ​ ដើម្បី​ពិនិត្យ​មើល​ថា​ តើ​សញ្ញា​ប័ត្រ​ទាំង​នោះ​ត្រឹម​ត្រូវ ​ឬ​ក៏​មិនត្រឹម​ត្រូវ​ដើម្បី​តុលាការ​សម្រេច​លើ​សំណុំ​រឿង​នេះ។​

«ប្រសិន​បើ​ជា​យើង​ឃើញ​ថា​ ការ​បក​មក​យ៉ាង​ជាក់​លាក់​អំពី​បញ្ហា​សញ្ញា​ប័ត្រ​នេះ​ អា​ហ្នឹង​គាត់​អាច​យល់​ថា​ យ៉ាង​ម៉េច​ អាហ្នឹង​ជា​ឆន្ទានុសិទ្ធិ​របស់​គាត់​ បាទ។​ គាត់​ឃើញ​ថា ​មិនត្រឹម​ត្រូវ​ ឬ​ ​ត្រឹម​ត្រូវ​នៅលើគាត់​ បាទ!»​

តាម​ការ​ស្រាវ​ជ្រាវ​របស់​សមត្ថ​កិច្ច ​ដែល​ត្រូវ​បាន​ធ្វើ​ឡើង​ជា​យូរ​មក​ហើយ​នោះ​ បាន​ឲ្យ​ដឹង​ថា​ វេជ្ជ​បណ្ឌិត​មួយ​រូប​ក្នុង​ចំណោម​បួន​រូប​នេះ​បាន​បើក​គ្លីនិក​របស់​ខ្លួន​អស់​រយៈ​ពេល​១០​ឆ្នាំ​មក​ហើយ​ ដោយ​ពុំ​មាន​អាជ្ញា​ប័ណ្ណ​ ក៏​ប៉ុន្តែ​មន្រ្តី​តុលាការ​ខេត្ត​បាត់ដំបង​បាន​បញ្ជាក់​ថា​ ប្រជា​ពលរដ្ឋ​ដែល​ទទួល​ការ​ព្យាបាល​ពុំ​ដែល​មាន​បញ្ហា​សុខ​ភាព​នោះ​ឡើយ​ ក្រោយ​ពី​ទទួល​ការ​ព្យាបាល​ពីគ្លីនិក​ទាំង​បី​នេះ។​

លោក​នួន សាន​ ព្រះរាជ​អាជ្ញា​តុលាការ​ខេត្ត​បាត់ដំបង​ បាន​ឲ្យ​ដឹង​ថា​ តុលាការ​នឹង​កំណត់​ពេល​សវនាការ​ថ្មី ​បន្ទាប់​ពី​បាន​សួរ​ដេញ​ដោល​គ្រូ​ពេទ្យ​ទាំង​បួន​រូប​នោះ​ កាល​ពីម្សិលមិញ​ ប៉ុន្តែ​លោក​បដិសេធ​មិន​ធ្វើ​អធិប្បាយ​លើ​ការ​សួរ​ដេញ​ដោលនោះ​ទេ។ ​លោក​ក៏​ពុំ​ធ្វើការ​អធិប្បាយ​ផង​ដែរលើការ​បកប្រែ​សញ្ញា​ប័ត្រ​របស់​គ្រូពេទ្យ​ទាំង​បួន​រូប​នេះ។

«គេ​លើក​ប្រកាស គេលើក​ប្រកាស​ប្អូន។​ លើក​ប្រកាស​ធម្មតា​ហ្នឹង​ច្បាប់​ក៏​អនុញ្ញាត​ឲ្យ​អញ្ចឹង។​ ធម្មតា​ពេល​សវនាការ​ ក្រោយ​ពី​ការ​សួរ​ដេញ​ដោល​ចៅក្រម​អាច​សម្រេច​ភ្លាម​ដោយ​ប្រកាស​សាល​ក្រម​ភ្លាម​ ឬ​ក៏​លើក​ការ​ប្រកាស​សាល​ក្រម​ទៅ​ពេល​ក្រោយ»។​

គ្រូពេទ្យ​ ដែល​សមត្ថ​កិច្ច​ឃាត់​ខ្លួន ​ហើយ​អនុញ្ញាត​ឲ្យមាន​សេរីភាព​វិញ​នោះ គឺ​មាន​គ្រូពេទ្យ​ម្នាក់​ជា​ជនជាតិ​ចិន​ដើម​កំណើត​ខ្មែរ ​ឈ្មោះ​កែវ សុវណ្ណ ​សុខយ៉ាន​ អាយុ​៦៣​ឆ្នាំ​ និង​វ៉ាន់ថា ស៊ាងហេង​ អាយុ​៣២​ឆ្នាំ​ ជា​ជនជាតិ​ខ្មែរ​ ហើយ​គ្រូពេទ្យ​ទាំង​ពីរ​នាក់​នេះ​ជា​អ្នក​បើក​គ្លីនិក​មួយ​ឈ្មោះ​ថា​ ​សមាគម​គ្រូពេទ្យ​គុណធម៌​កម្ពុជា​ ដែល​ស្ថិត​ក្នុង​ស្រុក​ភ្នំ​ព្រឹក្ស។​ រីឯ​ពីរ​រូប​ផ្សេង​ទៀត​កាន់​លិខិត​ឆ្លងដែន​សញ្ជាតិ​ចិន​គឺ​ឈ្មោះ​ម៉ា​ ភី ​អាយុ​៤៨​ឆ្នាំ​ ជា​ម្ចាស់​គ្លីនិក​ចិន-កូរ៉េ​បើកទ្វារ​២៤​ម៉ោង ​ហើយ​និង​ឈ្មោះ​គ័រ លីអាន ​អាយុ​៥២​ឆ្នាំ​ ជា​មា្ចស់​គ្លីនិក​មិត្ត​ភាព​ខ្មែរ-ចិន។​

គួរ​បញ្ជាក់​ផង​ដែរ​ថា​ មាន​ករណី​ចម្លង​មេរោគ​អេដស៍​ដ៏​ច្រើន​នៅ​ក្នុង​ភូមិ​រការ​ ​ស្រុក​សង្កែ ​ខេត្ត​បាត់ដំបង​ កាលពី​ពាក់​កណ្តាល​ខែ​ធ្នូ​ឆ្នាំ​២០១៤ ​ហើយ​មក​ដល់​ពេល​នេះ ​ក្នុង​ចំណោម​អ្នក​ភូមិ​រការ​សរុប​២​ពាន់​នោះ​ មាន​អ្នក​ភូមិ​ចំនួន​២៥០​នាក់​ត្រូវ​បាន​រក​ឃើញ​ថា​ មាន​ផ្ទុក​មេរោគ​នេះ។​

ការ​ចម្លង​នេះ​គឺត្រូវ​បាន​គេ​សង្ស័យ​ថា​ ​បង្ក​ឡើង​ដោយ​គ្រូ​ពេទ្យ​ប្រចាំ​ភូមិ​ម្នាក់​ ដែល​ធ្វើការ​ចាក់​ថ្នាំ​ និង​ចាក់​សេរ៉ូម​ ដោយ​ប្រើ​ម្ជុល​ស៊ីរ៉ាំង​រួមគ្នាក្នុង​ពេល​ព្យាបាល​អ្នក​ជំងឺ។​ គ្រូពេទ្យ​រូប​នេះ​ពុំ​មាន​លិខិត​អនុញ្ញាត​ត្រឹម​ត្រូវ​ដើម្បី​ព្យាបាល​អ្នក​ជំងឺ​នោះ​ទេ។ ​ក្រោយ​ពី​ការ​ផ្ទុះ​នៃ​ការ​ចម្លង​មេរោគ​អេដស៍​នោះ​មក ​រដ្ឋាភិបាល​កម្ពុជា​បាន​ប្រកាស​បង្រ្កាប​សកម្ម​ភាព​ព្យាបាល​សុខភាព​ ដែល​គ្មាន​អាជ្ញា​ប័ណ្ណ​ពី​ក្រសួង​សុខាភិបាល៕

XS
SM
MD
LG