នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលកម្ពុជា ប្រកាសឲ្យប្រជាពលរដ្ឋចូលរួមបង្ការបញ្ហាសុខភាពដែលអាចកើតមានក្នុងអំឡុងពេលអាកាសធាតុក្តៅ បន្ទាប់ពីរដ្ឋាភិបាលប្រកាសថា កម្តៅនៅកម្ពុជាក្នុងខែមេសានេះ អាចនឹងហក់ឡើងរហូតដល់៤០ ទៅ៤២អង្សារ។
តាមគេហទំព័រ និងទំព័រហ្វេសប៊ុករបស់នាយកដ្ឋានប្រយុទ្ធនឹងជំងឺឆ្លង ផ្សព្វផ្សាយកាលពីថ្ងៃអាទិត្យ បញ្ជាក់ថា ក្នុងអំឡុងរដូវក្តៅដែលកំពុងឈានចូលមកដល់នេះ នាយកដ្ឋានប្រយុទ្ធនឹងជំងឺឆ្លងអំពាវនាវដល់សាធារណជនទាំងអស់ពិសារទឹកឲ្យបានច្រើន កុំពិសារជាតិអាល់កុល ឬជាតិស្ករច្រើនពេក។ ត្រូវស្លៀកសំលៀកបំពាក់ស្តើងៗ ឬមានពណ៌ស្រាល និងស្លៀកពាក់រលុង ព្រមទាំងលាបឡេការពារកម្តៅថ្ងៃ។ គួរចេញទៅខាងក្រៅផ្ទះ នៅពេលព្រឹកនិងពេលល្ងាច។ ហាមទុកទារកនិងកុមារក្នុងរថយន្តចតចោល។ ជៀសវាងអាហារក្តៅៗនិងជៀសវាងពិសារអាហារច្រើនពេកដែលអាចបង្កើនកម្តៅដល់រាងកាយ។
នាយកដ្ឋានប្រយុទ្ធនឹងជំងឺឆ្លងបានបញ្ជាក់អំពីវិធានការបន្ថែមដើម្បីជៀសផុតពីជំងឺរាក ក្អួត ក្តៅខ្លួន ថា៖
«ដោយរួមនិងវិធានការអាកាសធាតុក្តៅខាងលើ សូមបងប្អូនប្រជាពលរដ្ឋអនុវត្ត៖ លាងសំអាតបន្លែ ផ្លែឈើឲ្យបានស្អាតមុនបរិភោគ។ សំអាតសម្ភារៈប្រើសម្រាប់ចម្អិនម្ហូបអាហារឲ្យបានត្រឹមត្រូវ។ ចម្អិនអាហារឲ្យបានឆ្អិនល្អ ជាពិសេស សាច់ សត្វស្លាប ស៊ុត និងអាហារសមុទ្រ។ ទុកដាក់ចំណីអាហារឆៅ និងឆ្អិនដាច់ដោយឡែកពីគ្នា។ កុំរក្សាទុកអាហារក្នុងកំដៅធម្មតាលើសពី២ម៉ោង។ មិនត្រូវរក្សាទុកអាហារជាច្រើនថ្ងៃទេ ទោះជាស្ថិតក្នុងកម្រិតសីតុណ្ហភាពសុវត្ថិភាពក៏ដោយ»។
នាយកដ្ឋានប្រយុទ្ធនឹងជំងឺឆ្លងក៏បានអំពាវនាវឲ្យប្រជាពលរដ្ឋប្រកាន់ខ្ជាប់នូវអនាម័យដោយលាងដៃនឹងសាប៊ូ និងទឹកក្រោយពេលចេញពីបង្គន់ មុនពេលរៀបចំអាហារ មុនពេលបញ្ចុកកូន និងមុនពេលពិសារអាហារ។ បើមានបញ្ហាសុខភាពដែលបណ្តាលឲ្យមានរាក ក្អួត ក្តៅខ្លួន និងសន្លប់ សូមស្វែងរកការព្យាបាលនៅមណ្ឌលសុខភាព ឬមន្ទីរពេទ្យដែលនៅជិតផ្ទះ។
ការចេញសេចក្តីអំពាវនាវរបស់នាយកដ្ឋានប្រយុទ្ធនឹងជំងឺឆ្លង អំពីការប្រុងប្រយ័ត្នសុខភាពក្នុងរដូវក្តៅ ធ្វើឡើងបន្ទាប់ពីក្រសួងធនធានទឹក និងឧតុនិយមប្រកាសអំពីការកើនកម្តៅក្នុងរដូវប្រាំង ខណៈរដ្ឋាភិបាលបានចេញសារាចរ ប្រកាសឲ្យប្រជាពលរដ្ឋ និងស្ថាប័នពាក់ព័ន្ធត្រៀមទឹកទុកប្រើប្រាស់ប្រចាំថ្ងៃសម្រាប់រដូវប្រាំងឆ្នាំ២០១៩ ដែលនឹងមានកើនកម្តៅខ្លាំងខុសពីធម្មតានិងខ្សត់ភ្លៀង។ ក្នុងសារាចរនោះក៏បានបញ្ជាក់ថា នៅខែមេសា និងឧសភានេះ កម្ពុជានឹងមានសីតុណ្ហភាពអតិបរមាពេលខ្លះហក់ឡើងខ្ពស់រហូតដល់៤០ ទៅ៤២អង្សារ៕
