ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មនុស្ស​ជាង​៦០០​នាក់​ ត្រូវ​បាន​រក​ឃើញ​ឆ្លង​កូវីដ១៩ ខណៈ​ក្រសួង​សុខាភិបាល​ធ្វើ​តេស្ត​រហ័ស


រូបឯកសារ៖ បុគ្គលិក​សុខាភិបាល​មក​យក​អ្នក​ជំងឺ​កូវីដ១៩​នៅ​ទីតាំង​មួយ​កន្លែង​ទៅ​សម្រាក​ព្យាបាល​នៅ​មជ្ឈមណ្ឌល​ព្យាបាល​ជំងឺ​កូវីដ​ក្នុង​រាជធានីភ្នំពេញ កាលពី​ថ្ងៃទី១៤ ខែមេសា ឆ្នាំ២០២១។ (ទុំ ម្លិះ/វីអូអេ)

ក្រសួង​សុខាភិបាល​បាន​ឲ្យ​ដឹង​ថា​មនុស្ស​ជាង​៦០០​នាក់​ទៀត ត្រូវ​បាន​រក​ឃើញ​ថា​ឆ្លង​ជំងឺ​កូវីដ​១៩ ខណៈ​អាជ្ញាធរ កំពុង​ចាប់​ផ្តើម​ធ្វើ​តេស្ត​រហ័ស​ឆាប់​ដឹង​លទ្ធផល។

ក្នុង​សេចក្តី​ប្រកាស​ព័ត៌មាន​មួយ​ចេញផ្សាយ​នៅ​ថ្ងៃ​ច័ន្ទ​នេះ ក្រសួង​សុខាភិបាល​បាន​ឲ្យ​ដឹង​ថា​មនុស្ស​៦២៤​នាក់ បាន​ឆ្លង​ជំងឺ​កូវីដ​១៩ ដែល​នាំ​ឲ្យ​ករណី​ឆ្លង​សរុប​ចាប់​តាំង​ពី​ថ្ងៃ​ទី​២០ ខែ​កុម្ភៈ មាន​ចំនួន៦.៤៧០នាក់។

ករណី​ឆ្លង​ដែល​ប្រកាស​នៅ​ថ្ងៃ​ច័ន្ទ​នេះ ភាគ​ច្រើន​នៅ​រាជធានី​ភ្នំពេញ ​ដែល​មាន​ចំនួន​៤៦៥​នាក់ និង​ខេត្ត​ព្រះសីហនុ​ដែល​មាន​ចំនួន​១៤៤​នាក់។ក្រសួង​សុខាភិបាល​ឲ្យ​ដឹង​ទៀត​ថា​ករណី​ស្លាប់​បាន​កើន​ឡើង​ដល់​៤៥​នាក់​ហើយ។​

បើ​តាម​អនុ​គណៈ​កម្មការ​ស្រាវជ្រាវ​ជំងឺ​កូវីដ១៩ កម្មករ​កម្មការិនី​រោងចក្រ ​និង​អ្នក​ពាក់​ព័ន្ធ​ជិត​១ពាន់​នាក់​ ត្រូវ​បាន​រក​ឃើញ​វិជ្ជ​មានជំងឺ​កូវីដ១៩ គិត​ចាប់​ពី​ថ្ងៃ​ទី​២១ ខែ​មីនា ដល់​ថ្ងៃ​ទី​១៧ ខែ​មេសា។ ករណី​ផ្ទុះ​ការ​ឆ្លង​នៅ​ផ្សារ​អូរឫស្សី មាន​អ្នក​ពាក់​ព័ន្ធសរុប​ចំនួន​៤១៣​នាក់ ត្រូវ​បាន​រក​ឃើញ​វិជ្ជមាន​ជំងឺ​កូវីដ​១៩ គិត​ចាប់​ពី​ថ្ងៃទី​២៩ ខែ​មីនា ដល់​ថ្ងៃ​ទី​១៨ ខែ​មេសា។ ​ករណី​ផ្ទុះ​ការ​ឆ្លង​នៅ​ផ្សារ​ចាស់ មាន​អ្នក​ពាក់ព័ន្ធ​សរុប​២៨​នាក់ ដែល​ត្រូវ​បាន​រកឃើញ​វិជ្ជមាន​ជំងឺ​កូវីដ​១៩ ​គិត​មក​ដល់​ថ្ងៃ​ទី​១៧ ខែ​មេសា។

ចំណែក​ករណី​ផ្ទុះ​ឆ្លង​នៅ​ផ្សារ​ដើម​គ មាន​អ្នក​ពាក់ព័ន្ធ​សរុប​ចំនួន​៨៨​នាក់ ត្រូវ​បាន​រក​ឃើញវិជ្ជមាន​ជំងឺ​កូវីដ​១៩ គិត​ត្រឹម​ថ្ងៃ​ទី​១៨ ខែ​មេសា។

មន្ត្រី​ក្រសួង​សុខាភិបាល​បាន​ឲ្យ​ដឹង​ថា​ខ្លួន​កំពុង​ធ្វើ​តេស្ត​រហ័ស ដែល​អាច​ដឹង​លទ្ធផល​ក្នុង​រយៈ​ពេល​ខ្លី។

លោកស្រី យក់ សម្បត្តិ រដ្ឋ​លេខាធិការ​និង​អ្នក​នាំ​ពាក្យ​ម្នាក់​នៃ​ក្រសួង​សុខាភិបាល បាន​ប្រាប់​សារព័ត៌មាន​Freshnewsថា​ក្រសួង​កំពុង​ប្រើ​ប្រាស់​ឧបករណ៍​តេស្ដ​រហ័ស ​ដែល​ចំណាយ​ពេល​ត្រឹម​តែ​១០​ទៅ​១៥​នាទី នឹង​ដឹង​លទ្ធ​ផល។

គួរ​បញ្ជាក់​ថា​ការ​បន្ត​ឆ្លង​ឡើង​ដល់​ជាង​៦០០​នាក់​នេះ ស្រប​ពេល​ដែល​ទីក្រុង​ភ្នំពេញ និង​ក្រុង​តាខ្មៅ​ ខេត្ត​កណ្តាល ត្រូវ​បាន​បិទ​ខ្ទប់​ទាំង​ស្រុង ក្នុង​រយៈ​ពេល​២​សប្តាហ៍ គឺ​រហូត​ដល់​ថ្ងៃ​ទី​២៨ ខែ​មេសា៕

XS
SM
MD
LG