ភ្ជាប់​ទៅ​គេហទំព័រ​ទាក់ទង

បញ្ហា​សុខភាព​កើត​ឡើង​​ខណៈ​ការ​ប្រយុទ្ធ​កំពុង​បន្ត​នៅ​ទីក្រុង​ទ្រីប៉ូលី​


ពួក​​អ្នក​​ប្រយុទ្ធ​ឧទ្ទាម​ដែល​​ត្រូវ​របួស​​ក្នុង​អំឡុង​ពេល​​នៃ​​ការប្រ​យុទ្ធ​​នៅ​ Bab​ al-​Aziziya,​ បាន​​សម្រាក​​ព្យាបាល​​នៅមន្ទីរពេទ្យ​ Maitika​ ក្នុង​​ទីក្រុង​​លីប៊ី ​ថ្ងៃ​២៧​​ខែ​​សីហា​ ឆ្នាំ​២០១១។

ការ​ប្រយុទ្ធ​គ្នា​ដោយ​កាំភ្លើង​ជា​ផ្នែក​មួយ​នៃ​វិបត្តិ​សុខភាព​ដែល​កើត​មាន​ឡើង​ក្នុង​រដ្ឋធានី​ប្រទេស​លីប៊ី​ សព្វថ្ងៃ​មាន​ប្រជាពលរដ្ឋ​មួយ​លាន​កន្លះ​កំពុង​ខ្វះខាត​ទឹកស្អាត​ប្រើប្រាស់។

មន្ទីរពេទ្យ​ហ្សាវីយ៉ា​ (Zawiya)​ ក្នុង​កណ្តាល​ទីក្រុង​ទ្រីប៉ូលី​មាន​ឧបករណ៍​ទំនើបៗ។​ ប៉ុន្តែ​មន្ទីរពេទ្យ​នេះ​ខ្វះខាត​កត្តា​មូលដ្ឋាន​មួយចំនួន​ដូចជា​ទឹកស្អាត​ និង​វេជ្ជបណ្ឌិត។

លោក​ម៉ូហាម៉េត​ អេល​ ប៊ូសេហ្វ​ (Mohammed El Busef)​ ស្លៀក​រ៉ូបពេទ្យ​ព័ណ៌​ខៀវ​ឈប់​លើ​របៀង​អគារ​មន្ទីរពេទ្យ​ដ៏​មមាញឹក​មួយ​ មាន​ប្រសាសន៍​ថា៖

«យើង​ត្រូវការ​ទឹក។​ មន្ទីរពេទ្យ​នេះ​គ្មាន​ទឹក​ទេ»​។

ប៊ូសេហ្វ​ (Busef)​ ជា​និស្សិត​វេជ្ជសាស្រ្ត​ឆ្នាំ​ទី​ ៥។​ ប៉ុន្តែ​ពេល​ដែល​អ្នក​យក​ព័ត៌មាន​ពី​ វីអូអេ ​ទៅ​ដល់​មន្ទីរពេទ្យ​នោះ​ លោក ​ប៊ូសេហ្វ​ (Busef)​ គឺជា​អ្នក​ទទួល​បន្ទុក​នៅ​ទី​នោះ។

«វេជ្ជបណ្ឌិត​ភាគច្រើន​ធ្វើការ​ពី​ ៣០​ ទៅ​ ៤០​ ម៉ោង​។ ដូច្នេះ​ ឥឡូវ​នេះ​ពួកគេ​កំពុង​តែ​សំរាន្ត»។

បុរស​ត្រូវ​របួស​ម្នាក់​ធ្វើដំណើរ​តាម​របៀង​អគារ​មន្ទីរពេទ្យ។​ គាត់​ជា​អ្នក​រងរបួស​ចុងក្រោយ​ក្នុង​ចំណោម​អ្នក​រងរបួស​នៅក្នុង​ការ​ប្រយុទ្ធ​គ្នា​នេះ​ ដែល​គេ​បញ្ជូន​មក​កាន់​ មន្ទីរពេទ្យ​នេះ​ជា​បន្តបន្ទាប់។​លោក​ប៊ូសេហ្វ​ (Busef)​ និយាយ​ថា៖​«អ្នកជំងឺ​ភាគច្រើន​នៅ​មន្ទីរពេទ្យ​នេះ​រងរបួស​ដោយសារ​អ្នក​លប​បាញ់​កាំភ្លើង។​ អ្នក​ខ្លះ​ទៀត​រងរបួស​ដោយសារ​ការ​ផ្ទុះ​ផ្សេងៗ»។

នៅ​លើ​គ្រែ​មួយ​ អ្នក​ប្រយុទ្ធ​ឧទ្ទាម​ម្នាក់​មាន​រុំ​របួស​ដែល​ត្រូវដោយ​អំបែង​គ្រាប់បែក​នៅ​ជើង​ខាង​ស្តាំ​របស់​គាត់។​ មុខ​របស់​គាត់​ឡើង​ព័ណ៌​លឿង​ ប៉ុន្តែ​គេ​រំពឹង​ថា​គាត់​អាច​រស់បាន។

ចន្លោះ​ពីរ​បន្ទប់​បន្ទាប់​ពី​បន្ទប់​នេះ​គឺជា​កន្លែង​ដាក់​សព​មិន​មាន​ម៉ាស៊ីន​ត្រជាក់​ ដោយ​នៅ​ទីនោះ​ គេ​ឃើញ​មាន​សាកសព​ចំនួន​ប្រាំ។

នៅ​ពាសពេញ​ទីក្រុង​ សាកសព​រាប់រយ​នាក់​នៅ​ដេក​រណូក​រណែល​កណ្តាល​វាល​ ក្រោម​សីតុណ្ហភាព​ ៣០​ អង្សារ​សេ។

នៅក្នុង​ទីក្រុង​ទំនើប​ក្បែរ​ឆ្នេរ​សមុទ្រ​ម៉េឌីទែរ៉ាណេ​នេះ​ សេវា​មួយចំនួន​ដូចជា​ទឹក​ អគ្គិសនី​ អ៊ីនធឺណែត​ ទូរស័ព្ទ​ និង​ការ​ប្រមូល​សំរាម​មាន​ការ​ប្រែប្រួល​ជា​រឿយៗ​ ឬ​លែង​មាន​តែម្តង។

លោក​ ម៉ាហ៍មូលដ៍​ ស្ហេមម៉ាំ​ (Mahmould Shammam)​ រដ្ឋមន្រ្តី​ក្រសួង​ព័ត៌មាន​របស់​ក្រុមប្រឹក្សា​ជាតិ​អន្តរកាល​នៃ​ប្រទេស​លីប៊ី​បាន​ឆ្លើយតប​ទៅនឹង​ការ​ត្អូញត្អែរ​ ដោយ​ធ្វើ​ការ​ព្រមាន​អ្នក​រស់នៅ​ក្នុង​ទីក្រុង​ទ្រីប៉ូលី​ថា​ «កុំ​រំពឹង​ថា​មាន​អព្ភូតហេតុ»​ ឲ្យ​សោះ។

« នៅតាមតំបន់ខ្លះ សាកសពមួយ​ចំនួនត្រូវ​បានអាជ្ញាធរខាងសុខភាព​យក​ចិត្តទុក​ដាក់ ហើយយើងសង្ឃឹមថានៅប៉ុន្មានម៉ោងខាងមុខនេះ យើងអាច​ដោះស្រាយបញ្ហានេះបានដោយមានការ​ជួយជ្រោម​ជ្រែងពីក្រុមប្រឹក្សាជា​ច្រើន»។

ពី​ទីក្រុង​ញូវយ៉ក​ លោក​អគ្គលេខាធិការ​អង្គការ​សហប្រជាជាតិ​ បាន គីមូន​ កំពុង​ធ្វើ​ការ​អំពាវនាវ​នៅ​ជុំវិញ​ពិភពលោក​ឲ្យ​ផ្តល់​ជំនួយ​ដល់​ប្រទេស​លីប៊ី។

«ភ្លាមៗ​នោះ​ យើង​បាន​ស្នើ​សុំ​ជំនួយ​មនុស្សធម៌​ជាបន្ទាន់​ ជាពិសេស​ជំនួយ​វេជ្ជសាស្រ្ត​ និង​សេវា​សាធារណៈ​មូលដ្ឋាន​មួយចំនួន​ ដូចជា​ទឹក​ និង​អនាម័យ​ រួមទាំង​ការ​អប់រំ​ផងដែរ»។

ស្របពេល​ជាមួយគ្នា​នោះ​ដែរ​ បើ​គេ​ត្រឡប់ទៅ​មើល​មន្ទីរពេទ្យ​ស្ថិត​ក្នុង​អាកាសធាតុ​ដ៏​ក្តៅ​បែកផ្សែង​ក្នុង​ទីក្រុង​ទ្រីប៉ូលី​វិញ​ គេ​ឃើញ​ថា​ មិន​មាន​ទឹក​ដើម្បី​ លាង​ជំរះ​ឈាម​ចេញ​ពី​ផ្ទៃ​ឥដ្ឋការ៉ូ​នោះ​ទេ។

លោក​ប៊ូសេហ្វ​ (Busef)​ ដែល​ជា​និស្សិត​ពេទ្យ​និយាយ​បន្ត​ថា៖

«ពួកយើង​ទទួលបាន​សេរីភាព​ ដោយសារ​ឈាម​របស់​យើង»។

ផ្អែក​លើ​ស្ថានភាព​ប្រយុទ្ធ​គ្នា​ដោយ​កាំភ្លើង​ដែល​កំពុងតែ​បន្ត​ មន្ទីរពេទ្យ​ក្នុង​ទីក្រុង​ទ្រីប៉ូលី​អាច​ប្រឈម​នឹង​លំហូរ​ចូល​របស់​អ្នក​ប្រយុទ្ធ​ដែលត្រូវ​របួស​បន្ថែម​ទៀត​ជា​បន្តបន្ទាប់​នៅ​ប៉ុន្មាន​ថ្ងៃ​ខាងមុខ​នេះ៕

ប្រែសម្រួល​ដោយ​ ភី​ សុភាដា

XS
SM
MD
LG