ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

ទាហានហ្គីណេ អះអាង​ថា ពួកគេ​បាន​ធ្វើ​រដ្ឋ​ប្រហារ​បាន​ជោគជ័យ


សមាជិក​នៃ​កងកម្លាំង​ប្រដាប់​អាវុធ Guinea បើក​រថយន្ត​ឆ្លងកាត់​តំបន់ Kaloum នៅក្នុង​ទីក្រុង Conakry កាលពី​ថ្ងៃទី៥ ខែកញ្ញា ឆ្នាំ២០២១។

សមាជិក​យោធា​ហ្គីណេ​ បាន​ធ្វើ​រដ្ឋ​ប្រហារ​កាល​ពី​ថ្ងៃ​អាទិត្យ​ដោយ​ប្រកាស​តាម​ទូរទស្សន៍​ជាតិ​ថា​ ពួកគេ​បាន​ចាប់​ខ្លួន​លោក​ប្រធានាធិបតី​ Alpha Conde ​រំលាយ​រដ្ឋ​ធម្មនុញ្ញ​ និង​បិទ​ព្រំដែន​គោក​ និង​អាកាស។​

ទីភ្នាក់ងារ​សារ​ព័ត៌មាន​ AFP ​បាន​រាយ​ការណ៍​ថា​ ក្រោយមក​របប​យោធា​ បាន​ប្រកាស​បម្រាម​គោចរ​ទូទាំង​ប្រទេស។​

គេ​មិន​ច្បាស់​ទេ​ថា តើ​លោក​ Conde​ នៅ​ទីណា​កាលពី​ថ្ងៃ​អាទិត្យ។ ប៉ុន្តែទីភ្នាក់ងារ​សារ​ព័ត៌មាន​ AFP​ បាន​រាយ​ការណ៍​ថា ​ខ្លួន​បាន​ទទួល​វីដេអូ​ដែល​លោក​ Conde​ ពាក់អាវ​ជ្រីវជ្រួញ​ និង​ខោ​ខូវប៊យ​ ហើយ​អង្គុយ​លើ​សាឡុង​ហ៊ុំព័ទ្ធ​ដោយ​ទាហាន។ នៅ​ពេល​ទាហាន​ម្នាក់សួរ​ក្នុង​វីដេអូ​ថា​ តើ​គាត់​បាន​រង​របួសទេ​ ​លោក​ Conde ​មិន​ឆ្លើយទេ។

នៅខែ​តុលា​ លោក​ប្រធានាធិបតី​បាន​ជាប់ឆ្នោត​អាណត្តិទី​៣​ បន្ទាប់ពី​បាន​ធ្វើ​វិសោធន​កម្ម​រដ្ឋធម្មនុញ្ញ​ដើម្បី​អនុញ្ញាត​ឱ្យ​គាត់​ឈរ​ឈ្មោះ​ម្តង​ទៀត។ ​ការ​បោះឆ្នោត​ដ៏​ចម្រូង​ចម្រាស​នោះ​ បាន​បង្ក​ឲ្យ​ មាន​ការ​តវ៉ា​ដោយ​ហិង្សា​ទូទាំង​ប្រទេស។ ​

លោក​វរសេនីយ៍​ឯក​ Mamady Doumbouy​ ជា​អតីត​កងទ័ព​បារាំង​ បាន​បង្ហាញ​ខ្លួនតាម​ទូរទស្សន៍​ជាតិ​កាលពី​ថ្ងៃ​អាទិត្យ ​ដោយ​ដណ្តប់​ទង់ជាតិ​ហ្គីណេ។​ លោក​ Doumbouya ​បាន​ថ្លែង​ថា៖​ «យើង​បាន​រំលាយ​រដ្ឋាភិបាល​ និង​ស្ថាប័ន​នានា។ ​យើង​អំពាវនាវ​ឱ្យ​បងប្អូន​មាន​អាវុធ​ក្នុង​ដៃ​ ចូល​រួមជា​មួយ​ប្រជាជន»។

លោក​ Doumbouya ​បាន​លើក​ឡើង​ថា ការ​គ្រប់គ្រង​មិន​ត្រឹមត្រូវ​របស់​រដ្ឋាភិបាល​ជា​ហេតុផល​នាំ​ឱ្យ​លោក​ធ្វើ​សកម្មភាព​នេះ។ ​លោកហៅ​ក្រុម​ទាហាន​របស់​លោកថា​ គណៈ​កម្មាធិការ​ជាតិ​ប្រមូល​ផ្តុំ​ និង​អភិវឌ្ឍ​ (CNRD)។ ​គណៈ​កម្មាធិការនេះ​បាន​និយាយ​តាម​ទូរទស្សន៍​រដ្ឋ​កាលពី​ថ្ងៃ​អាទិត្យ​ថា អភិបាល​ទាំងអស់​ត្រូវបាន​ជំនួស​ដោយ​មេ​ដឹកនាំ​យោធា​ ប៉ុន្តែ​រដ្ឋមន្ត្រី​ទាំងអស់​ដែល​ត្រូវ​ចាក​ចេញ​ពីតំណែង​ ត្រូវ​បាន​អញ្ជើញ​ឱ្យចូលរួម​កិច្ច​ប្រជុំមួយ​ នៅ​ថ្ងៃ​ចន្ទ ​នៅ​ឯអគារ​សភា៕

ព័ត៌មាន​ខ្លះ​ក្នុង​សេចក្តី​រាយ​ការណ៍​នេះ​ ដកស្រង់​ពី​ទីភ្នាក់ងារ​ព័ត៌មាន AP Reuters និង AFP។

XS
SM
MD
LG