រដ្ឋាភិបាល បានចេញផ្សាយវីដេអូមួយកាលពីយប់ថ្ងៃចន្ទ ដោយអះអាងថា លោក សម រង្ស៊ី មានទំនាក់ទំនងស្អិតល្មួតជាមួយលោក សម សេរី ប្រធានចលនារណសិរ្សរំដោះជាតិ ហើយបានឃុបឃិតគ្នាធ្វើសកម្មភាពជាសម្ងាត់ដើម្បីប្រឆាំងរាជរដ្ឋាភិបាលលោក ហ៊ុន សែន។
វីដេអូដែលត្រូវបានផ្សាយលើគេហទំព័ររបស់ទីស្ដីការគណៈរដ្ឋមន្ត្រី កាលពីយប់ថ្ងៃចន្ទ ដែលមានចំណងជើងថា «ក្រុមចលនាដែលនាំគ្រោះថ្នាក់សម្រាប់ជាតិ» បានហៅអតីតគណបក្សប្រឆាំង និងចលនាផ្សេងៗទៀតដែលតែងរិះគន់រដ្ឋាភិបាល ថាជាក្រុមភេរវករ និងប្ដេជ្ញាទប់ស្កាត់ និងកម្ទេចចលនាទាំងនោះមិនឲ្យកើតមាន។
ក្នុងវីដេអូរយៈពេលជាង១៨នាទីនោះ បានលើកឡើងពីសុខសន្តិភាព និងការរីកចម្រើននៅកម្ពុជាដែលមានលោកនាយករដ្ឋមន្ត្រី ហ៊ុន សែន ជាអ្នកដឹកនាំប្រទេស ប៉ុន្តែមានការជ្រៀតជ្រែករបស់ចលនាឧទ្ទាមមួយចំនួនដែលក្នុងវីដេអូនោះបញ្ជាក់ថា ជាចលនាសហការជាមួយបរទេស ដែលមានចេតនាទុច្ចរិត ផ្ដួលរំលំរដ្ឋាភិបាលដោយខុសច្បាប់។
វីដេអូនោះ មានបង្ហាញពីរូបភាពរបស់លោក សម រង្ស៊ី ដឹកនាំបាតុកម្មក្រោយការបោះឆ្នោតជាតិឆ្នាំ២០១៣ និងដើមឆ្នាំ២០១៤ ដែលឈានដល់មានអំពីហិង្សានៅលើកំណាត់ផ្លូវវេងស្រេង និងបណ្ដាលឲ្យកម្មករយ៉ាងតិច៤នាក់ស្លាប់ និងរាប់សិបនាក់ផ្សេងទៀតរងរបួស និងត្រូវបានចាប់ខ្លួន។
អ្នកអត្ថាធិប្បាយក្នុងវីដេអូនោះបញ្ជាក់ថា៖
«សុខសន្តិភាពនេះ តែងតែមានការរំខានពីក្រុមចលនាឧទ្ទាមមួយចំនួនតែងសហការជាមួយបរទេសបង្កើតចលាចល បង្កភាពវឹកវរម្ដងហើយម្ដងទៀត ក្រោមមហិច្ឆតាដណ្ដើមអំណាចផ្លូវកាត់ ចង់ផ្ដួលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោត។ តែទោះជាយ៉ាងណា ចេតនាទុច្ចរិតទាំងនោះមិនបានសម្រេចនោះទេ ក្រោមការដឹកនាំរបស់ស្ថាបនិកសន្តិភាព សម្ដេចអគ្គមហាសេនាបតីតេជោ ហ៊ុន សែន លោកមិនអនុញ្ញាតឲ្យជនទុច្ចរិតទាំងនោះ ឆក់ប្លន់សន្តិភាពដែលយកអាយុជីវិតរបស់វីរជនខ្មែរដែលប្ដូរមកនោះ បានជាដាច់ខាត»។
វីដេអូដដែលនោះ ក៏បានលើកឡើងពីការប្រកាសរបស់លោកនាយករដ្ឋមន្ត្រី ហ៊ុន សែន ចំពោះការរៀបគម្រោងបំផ្ទុះគ្រាប់បែកចំនួន២កន្លែង ក្នុងឱកាសថ្ងៃចូលឆ្នាំថ្មីនៅរាជធានីភ្នំពេញ និងខេត្តសៀមរាប ដែលលោក ហ៊ុន សែន ថា ជាគម្រោងរបស់លោក សម សេរី ប្រធានរណសិរ្សរំដោះជាតិខ្មែរ ដែលត្រូវបានរដ្ឋាភិបាលចាត់ទុកថាជា «មេភេរវករ» ព្រមទាំងបានចាក់ផ្សាយខ្សែអាត់សំឡេងសន្ទនាតាមទូរស័ព្ទ ដែលថាជាសំឡេងទាក់ទងគ្នារបស់ក្រុមភេរវករក្នុងការរៀបគម្រោងដាក់គ្រាប់បែកជាដើម។
វីដេអូនោះ ក៏បានលើកឡើងពីទំនាក់ទំនងរវាងលោក សម រង្ស៊ី អតីតប្រធានគណបក្សប្រឆាំង និងជាប្រធានចលនាសង្គ្រោះជាតិ ជាមួយលោក សម សេរី ថាបានរៀបចំកម្លាំងបង្កប់ដើម្បីបំផ្លាញការបោះឆ្នោត និងថា លោក សម សេរី មានទំនាក់ទំនងជាមួយលោក សម រង្ស៊ី យ៉ាងស្អិតល្មួត និងបានឃុបឃិតគ្នាធ្វើសកម្មភាពជាសម្ងាត់ដើម្បីប្រឆាំងរាជរដ្ឋាភិបាលកម្ពុជា ដោយរួមមានទាំងការជួយជាមួយជនបរទេសមួយចំនួនផងដែរ។
វីដេអូនេះ បញ្ជាក់ក្រោយរៀបរាប់ពីទំនាក់ទំនងផ្សេងៗរវាងលោក សម រង្ស៊ី និងលោក សម សេរី ថា៖
«ភស្តុតាងនេះបានបញ្ជាក់ឲ្យឃើញថា ក្រុមចលនាឧទ្ទាមក្បត់ជាតិដឹកនាំដោយ សម រង្ស៊ី និង សម សេរី និងបក្ខពួកពិតជាបានសហការគ្នាជាប្រព័ន្ធដោយមានការជ្រោមជ្រែងពីបរទេស ពិតជាមានចេតនាបំផ្លាញភាពសុខសាន្តរបស់ពលរដ្ឋក្នុងមហិច្ឆតាដណ្ដើមអំណាចឲ្យខាងតែបាន បើទោះបីជាអំពើទាំងនោះបង្កការខូចខាតធ្ងន់ធ្ងរ ឬនាំឲ្យប្រទេសជាតិវឹកវរចលាចលយ៉ាងណាក្ដី។
លោក សម រង្ស៊ី អតីតប្រធានគណបក្សសង្គ្រោះជាតិ និងជាប្រធានចលនាសង្គ្រោះជាតិដែលកំពុងរស់នៅប្រទេសបារាំង ប្រាប់ VOA តាមរយៈសារអេឡិចត្រូនិក ឬអ៊ីមែលនៅព្រឹកថ្ងៃពុធនេះយ៉ាងខ្លីថា៖
«ខ្ញុំបដិសេធការចោទប្រកាន់នេះ។ វាគ្មានមូលដ្ឋានអ្វីទាល់តែសោះ ហើយអ្នកដែលបង្កើតវីដេអូនេះគឺឆ្កួតលីលា»។
វីដេអូដែលមាននិយាយពីចលនាផ្សេងៗមួយចំនួនទៀតនោះ រដ្ឋាភិបាលក៏បានបញ្ជាក់ថាលោក សម សេរី ក៏បានសហការគ្នាជាមួយលោក សួន សេរីរដ្ឋា ប្រធានគណបក្សអំណាចខ្មែរ ដែលកំពុងស្ថិតក្នុងពន្ធនាគារក្រោយរងការចោទពីបទបង្ខូចទឹកចិត្តកងទ័ព ថាបានធ្វើបាតុកម្មទ្រង់ទ្រាយធំប្រឆាំងស្ថានទូតវៀតណាមប្រចាំនៅកម្ពុជា និងបានដុតទង់ជាតិវៀតណាមជាដើម។
VOA បានព្យាយាមទាក់ទងលោក សម សេរី ប្រធានចលនា «រណសិរ្សរំដោះជាតិ» ដែលកំពុងរស់នៅបរទេសនោះ ប៉ុន្តែ គិតត្រឹមថ្ងៃពុធនេះ មិនទាន់ទទួលបានការឆ្លើយតបណាមួយទេ។
ឈ្មោះ សម សេរី ហៅ យាន យៀប ជាប្រធានចលនាមួយឈ្មោះ «រណសិរ្សរំដោះជាតិ» ដែលកំពុងរស់នៅក្នុងប្រទេសដាណឺម៉ាក និងជាមនុស្សម្នាក់ ក្នុងចំណោមមនុស្សជាង១០នាក់ផ្សេងទៀត ដែលត្រូវបានសាលាដំបូងរាជធានីភ្នំពេញផ្ដន្ទាទោសឲ្យជាប់ពន្ធនាគារពី៥ឆ្នាំ ទៅ៩ឆ្នាំ ពីបទរួមគំនិតក្បត់ ដើម្បីផ្ដួលរំលំរាជរដ្ឋាភិបាលកម្ពុជា កាលពីអំឡុងឆ្នាំ២០១៤។
ចលនា «រណសិរ្សរំដោះជាតិ» នេះ មានគោលបំណងផ្ដួលរំលំរាជរដ្ឋាភិបាលកម្ពុជា តាមរយៈការកសាងកម្លាំងប្រដាប់អាវុធដោយខុសច្បាប់ និងបញ្ជូនភ្នាក់ងារសម្ងាត់មកស៊ើបទីតាំងយោធាសំខាន់ៗ ហើយនិងធ្វើសកម្មភាពបាចខិត្តប័ណ្ណប្រឆាំងប្រមុខរាជរដ្ឋាភិបាល ព្រមទាំងហ្វឹកហាត់កម្លាំងភេរវកម្ម ដាក់គ្រឿងផ្ទុះដោយសម្ងាត់នៅតាមជាយដែនប្រទេសថៃ និងកសាងបណ្ដាញនៅកម្ពុជា ដើម្បីប្រមូលព័ត៌មាន និងបញ្ជូនព័ត៌មានចេញទៅមេខ្លោងដែលនៅក្រៅប្រទេស។ នេះបើតាមការបញ្ជាក់ក្នុងគេហទំព័ររបស់អគ្គស្នងការនគរបាលជាតិនាពេលកន្លងមក។
ក្រៅតែពីការរៀបរាប់ពីសកម្មភាពផ្សេងៗដែលរដ្ឋាភិបាលហៅថាជាចេតនាផ្ដួលរំលំរដ្ឋាភិបាល វីដេអូនោះ ក៏បានបង្ហាញពីការប្រើប្រាស់គ្រឿងសព្វាវុធទំនើបៗរបស់កងយោធពលខេមរភូមិន្ទជាច្រើន ដោយមានការប្ដេជ្ញាបំផ្លាញផែនការទុច្ចរិតរបស់ចលនាទាំងនោះ តាមគ្រប់រូបភាព ដើម្បីធានាឲ្យបាននូវសន្តិភាព និងការពាររដ្ឋធម្មនុញ្ញ។
លោក អ៊ា សុផល សាស្ត្រាចារ្យផ្នែកកិច្ចការទូត និងកិច្ចការពិភពលោកនៃមហាវិទ្យាល័យ Occidental រដ្ឋកាលីហ្វ័រញ៉ា និងជាអ្នកវិភាគគោលនយោបាយ ប្រាប់ VOA តាមរយៈសារអេឡិចត្រូនិក ឬអ៊ីមែលថា ជាធម្មតានៅមុនការបោះឆ្នោត រដ្ឋាភិបាលកម្ពុជាតែងមានទ្រឹស្ដីក្បត់ជាតិ និងទ្រឹស្ដីបង្ក្រាប ដើម្បីបង្កើតជាឆាកល្ខោន។ ទោះយ៉ាងណាលោកថា ការបង្កើតវីដេអូនេះ មិនមានអ្វីដែលគួរឲ្យចាប់អារម្មណ៍នោះទេ។
លោកបញ្ជាក់ក្នុងសម្រង់ន័យដើមជាភាសាអង់គ្លេស និងត្រូវបានប្រែសម្រួលជាភាសាខ្មែរថា៖
«មានអ្នកកំពុងធ្វើការយ៉ាងលំបាក ហើយក៏ប្រហែលជាធ្វើការថែមម៉ោងទៀតផង ដើម្បីភ្ជាប់ចំណុចដែលហាក់គ្មានទំនាក់ទំនងគ្នាអីបន្តិចសោះ។ វាលេចឡើងនូវការប៉ុនប៉ងដើម្បីភ្ជាប់សត្រូវជាមួយគ្នា ប៉ុន្តែវាគ្មានអ្វីនៅទីនោះទាល់តែសោះ។ វាគ្មានប្រយោជន៍អីសោះតែម្ដង»។
នេះមិនមែនជាលើកទី១ទេ ដែលរដ្ឋាភិបាលបង្កើតវីដេអូបង្ហាញអំពីការអភិវឌ្ឍ ការប៉ុនប៉ងផ្ដួលរំលំរដ្ឋាភិបាល និងការបង្ក្រាបលើក្រុមផ្សេងៗ ដែលរដ្ឋាភិបាលគណបក្សកាន់អំណាចនិងអ្នកគាំទ្រខ្លួនហៅថាជា «ក្រុមឧទ្ទាមក្បត់ជាតិ» នោះ។
កន្លងមក រដ្ឋាភិបាលកម្ពុជា បានផ្សព្វផ្សាយឯកសារការពារចំណាត់ការរបស់រដ្ឋាភិបាលក្នុងការរំលាយគណបក្សប្រឆាំង ក៏ដូចជាការបង្ក្រាបលើក្រុមដែលមាននិន្នាការមិនគាំទ្ររដ្ឋាភិបាល ព្រមទាំងឯកសារផ្សេងៗរាប់សិបទំព័រស្ដីពីបដិវត្តន៍ពណ៌ រួមជាមួយនិងវីដេអូប្រវែងជិតមួយម៉ោង ដោយមានការលើកឡើងនូវចំណុចជាច្រើនដែលរដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន ចាត់ទុកថា បានបង្កឡើងដោយក្រុមមាននិន្នាការមិនស្របតាមរដ្ឋាភិបាល ហើយត្រូវបានបង្ក្រាបបានទាន់ពេល៕
