តំណាងសហជីពនិងអ្នកជំនាញលើកឡើងពីបញ្ហាប្រឈមផ្សេងៗពាក់ព័ន្ធនឹងហានិភ័យនៃការឆ្លងជំងឺកូវីដ១៩ និងការគាំពារសុវត្ថិភាពដល់បុគ្គលិកនយោជិត ក្រោយពីក្រសួងទេសចរណ៍បង្ហាញផែនការរៀបចំបើកវិស័យសេវាកម្មក្លឹបកម្សាន្តរង្គសាលឡើងវិញ។
ក្រសួងទេសចរណ៍បានប្រកាសពីការត្រៀមរៀបចំបើកដំណើការអាជីវកម្មខារ៉ាអូខេ(KTV) ក្លឹបកម្សាន្តរង្គសាល-ឌីស្កូតែក ទាំងអស់ឡើងវិញនៅក្រោយថ្ងៃទី៣០ ខែវិច្ឆិកានេះ។ នេះបើយោងតាមសេចក្តីជូនដំណឹងរបស់រដ្ឋមន្ត្រីក្រសួងទេសចរណ៍លោក ថោងខុន ចុះកាលពីថ្ងៃទី១១ ខែវិច្ឆិកា ឆ្នាំ២០២១។
នៅក្នុងសេចក្តីជូនដំណឹងខាងលើ ក្រសួងទេសចរណ៍បានលើកឡើងថា ក្នុងករណីមានការអនុញ្ញាតពីរដ្ឋាភិបាលឲ្យបើកដំណើរការឡើងវិញ ម្ចាស់អាជីវកម្មក្លឹបកម្សាន្តរង្គសាល-ឌីស្កូតែកទាំងអស់ត្រូវអនុវត្តនីតិវិធីប្រតិបត្តិស្តង់ដាអប្បបរមា (SOP) តាមគន្លងប្រក្រតីភាពថ្មីរបស់រដ្ឋាភិបាល។
រដ្ឋលេខាធិការ និងអ្នកនាំពាក្យក្រសួងទេសចរណ៍លោក តុប សុភ័ក បាននិយាយថា ក្រោយថ្ងៃទី៣០ ខែវិច្ឆិកា អាជ្ញាធរនឹងអនុញ្ញាតឲ្យអាជីកម្មកម្សាន្តបើកសាកល្បងមួយចំនួនប៉ុណ្ណោះពោលគឺមិនមែនបើកឲ្យដំណើរការគ្រប់ទីកន្លែងនៅទូទាំងប្រទេសនោះទេ។
លោកបានថ្លែងថា៖ «អ្វីដែលសំខាន់គឺឲ្យពួកគាត់ត្រៀមលក្ខណៈ ជាពិសេសជំនាញរបស់យើងខាងក្រសួងទេសចរណ៍ថ្នាក់ជាតិនេះ ក៏ដូចជា មន្ទីរទេសចរណ៍រាជធានីខេត្តនេះ យើងចុះទៅអប់រំផ្សព្វផ្សាយណែនាំពួកគាត់ឲ្យអនុវត្តតាមវិធានសុវត្ថិភាពទេសចរណ៍ និងនិតិវិធីប្រតិបត្តិស្តង់ដារដែលឯកឧត្តមរដ្ឋមន្រ្តីដាក់ឲ្យអនុវត្តហ្នឹងគឺធ្វើម៉េចឲ្យគេរៀបរយទៅតាមហ្នឹង។ អញ្ចឹងយើងមានការត្រួតពិនិត្យមួយច្បាស់លាស់មិនមែនមានន័យថា ដាក់ទៅក្រោយថ្ងៃ ៣០ទៅ រដ្ឋាភិបាលឲ្យដំណើរការមិនមែនមានន័យថា ព្រឹបៗទាំងអស់គ្រប់កន្លែងនោះទេ»។
អ្នកនាំពាក្យក្រសួងទេសចរណ៍រូបនោះក៏បានបញ្ជាក់បន្ថែមពីនីតិវិធីប្រតិបត្តិស្តង់ដារអប្បបរមា(SOP) ក្នុងវិស័យក្លឹបកម្សាន្តរង្គសាលនៅពេលអនុញ្ញាតឲ្យដំណើរការឡើងវិញរួមមាន «ការវាស់កម្តៅ ការបាញ់អាកុល ឬថ្នាំសម្លាប់មេរោគ ការធ្វើតេស្តរហ័សមុនពេលចូលការតម្រូវឲ្យបង្ហាញកាតចាក់វ៉ាក់សាំងការកំណត់ចំនួនមនុស្សនិងការរក្សាគម្លាតសង្គមជាដើម»។
ក្រសួងទេសចរណ៍បានបញ្ជាក់នៅក្នុងសេចក្តីប្រកាសថា ការបើកដំណើរការអាជីវកម្មខារ៉ាអូខេ ក្លឹបកម្សាន្តរង្គសាល-ឌីស្កូតែកឡើងវិញ នឹងជួយរួមចំណែកផ្តល់ឱកាសការងារដល់បុគ្គលិកនយោជិត និងលើកកម្ពស់វិស័យទេសចរណ៍ និងសេដ្ឋកិច្ចជាតិក្នុងដំណាក់កាលរៀនរស់នៅជាមួយនឹងជំងឺកូវីដ១៩ តាមគន្លងថ្មី។
ក្រសួងទេសចរណ៍បានបន្ថែមថា ក្នុងករណីដែលម្ចាស់អាជីវកម្មមិនគោរពតាមវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដារអប្បបរមា (SOP) រដ្ឋបាលរាជធានីនិងខេត្ត ត្រូវចាត់វិធានការបន្ថែម ដោយតម្រូវឲ្យបិទអាជីវកម្ម និងទទួលខុសត្រូវចំពោះមុខច្បាប់ជាធរមាន។
ប្រធាននៃសហព័ន្ធសហជីពចំណីអាហារនិងសេវាកម្មនៅកម្ពុជា អ្នកស្រី អ៊ូ ទេពផល្លីន បាននិយាយថា បុគ្គលិកបម្រើការនៅក្នុងវិស័យកម្សាន្តស្ទើរតែគ្រប់កន្លែងនៅមិនទាន់បានចុះបញ្ជីនៅបេឡាជាតិសន្តិសុខសង្គមនោះទេ ហើយលើសពីនេះ បើសិនជាបុគ្គលិកទាំងនោះឆ្លងជំងឺកូវីដ១៩ ក៏មិនមានគោលការណ៍ច្បាប់ណាមួយបង្គាប់ឲ្យនយោជករក្សាប្រាក់ឈ្នួលជូនពួកគេផងដែរ។
អ្នកស្រីបានប្រាប់វីអូអេនៅថ្ងៃចន្ទថា៖ «ដល់អញ្ចឹងទៅនៅពេលដែលកម្មករគាត់ទៅធ្វើការគាត់ឆ្លង មានន័យថា ក្បាលអ្នកណា សក់អ្នកហ្នឹងដដែល។ មានន័យថា រាស្រ្តហ្នឹងគាត់ទទួលខុសត្រូវខ្លួនឯងទៅព្រោះរដ្ឋាភិបាលគាត់ប្រកាសឲ្យបើកហើយ ប៉ុន្តែនៅពេលដែលកម្មករហ្នឹងឆ្លងអត់មានអ្នកណាទទួលខុសត្រូវក្នុងការផ្តល់ជាប្រាក់ អំឡុងពេលគាត់ព្យាបាលហ្នឹងទេ មានន័យថា ប្រាក់ឈ្នួលក៏អត់មានកាតព្វកិច្ចពីនយោជក។ ទីពីរ នៅពេលគាត់ទៅព្យាបាល កម្មករក្នុងវិស័យកម្សាន្តគាត់មិនទាន់ចុះជាសមាជិកបេឡាជាតិទេ ក៏មិនមានប្រាក់ឧបត្ថម្ភណាមួយពីបេឡាជាតិរបបសន្តិសុខសង្គម ឬហៅថា ប.ស.សដែរ»។
ដំណាលគ្នានេះដែរ អ្នកស្រីបានលើកឡើងពីភាពងាយនឹងថ្លោះធ្លោយក្នុងការអនុវត្តគោលការណ៍ចាត់ឡើងពីអាជ្ញាធរក្នុងការការពារជំងឺកូវីដ១៩ ក្នុងវិស័យក្លឹបកម្សាន្តរង្គសាល ដោយអ្នកស្រីបានចោទសួរលើការរ៉ាប់រងលើការចំណាយទិញតេស្តរហ័សពីសំណាក់ម្ចាស់អាជីវកម្ម និងប្រសិទ្ធភាពក្នុងការស្នើឲ្យភ្ញៀវអតិថិជនធ្វើតេស្តរហ័ស។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព លោក យង់ គិមអេង បានប្រាប់វីអូអេនៅថ្ងៃចន្ទនេះថាលោកនៅតែមានការព្រួយបារម្ភនិងមិនមានជំនឿទុកចិត្តខ្ពស់ចំពោះការត្រួតពិនិត្យបានខ្ជាប់ខ្ជួនពីសំណាក់អាជ្ញាធរនោះទេ ខណៈពេលមានការបើកដំណើរការវិស័យសេវាកម្មផ្សេងៗ ដែលមានហានិភ័យខ្ពស់នៃការឆ្លងជំងឺកូវីដ ១៩ រួមមានក្លឹបកម្សាន្តរង្គសាល-ឌីស្កូតែកជាដើម។
លោកបានថ្លែងថា៖ «ចំពោះបញ្ហានេះ ខ្ញុំមិនជឿថា នឹងអាចធ្វើការត្រួតពិនិត្យបានហ្មត់ចត់នោះទេ។ យើងឃើញហើយថា ព្រឹត្តិការណ៍ ២០ កុម្ភៈ ក៏វាកើតឡើងដោយសារការថ្លោះធ្លោយការត្រួតពិនិត្យមិនបានដិតដល់នេះដែរ ដែលធ្វើឲ្យយើងអូសបន្លាយរហូតដល់ យើងឈានទៅរកការបិទប្រទេសអីហូរហែហ្នឹងបាទ ក៏ដោយសារតែការខ្វះចន្លោះរបស់យើងដែរបាទ»។
លោក យង់ គិមអេង បានអំពាវនាវឲ្យរដ្ឋាភិបាលធ្វើការវាយតម្លៃឲ្យបានហ្មត់ចត់ និងស៊ីជម្រៅមុនពេលពិចារណាឲ្យមានការបើកដំណើរការវិស័យសេវាកម្មក្លឹបកម្សាន្តរង្គសាលឡើងវិញ។
បន្ទាប់ពីមានការផ្ទុះការឆ្លងជំងឺកូវីដ១៩ ក្នុងសហគមន៍ក្នុង«ព្រឹត្តិការណ៍២០កុម្ភៈ» ក្លឹបកម្សាន្តខារ៉ាអូខេ និងឌីស្កូតែកនៅក្នុងប្រទេស ត្រូវបានអាជ្ញាធរហាមឃាត់មិនឲ្យបើកដំណើរការអស់រយៈពេលជាងមួយឆ្នាំមកនេះ។ នៅក្នុងព្រឹត្តិការណ៍នៃការផ្ទុះឆ្លងនៅក្នុងសហគមន៍នេះ គេឃើញថា ក្លឹបកម្សាន្តរង្គសាលមួយចំនួនក៏ជាប្រភពបង្កឲ្យមានការកើនឡើងនៃករណីឆ្លងជំងឺកូវីដ១៩ ផងដែរ។
លោកនាយករដ្ឋមន្ត្រី ហ៊ុន សែន ក៏ធ្លាប់បានប្រកាសថា អាជីវកម្មខារ៉ាអូខេ រង្គសាល និងឌីស្កូថេក នឹងត្រូវបើកដំណើរការឡើងវិញ នៅក្រោយថ្ងៃទី៣០ ខែវិច្ឆិកា ឆ្នាំ២០២១។ ថ្ងៃទី៣០វិច្ឆិកា កម្ពុជាក៏គ្រោងបើកទទួលអ្នកទេសចរបរទេសចាក់វ៉ាក់សាំងរួច ចូលដើរលេងកម្សាន្ត នៅខេត្តព្រះសីហនុ និងនៅខេត្តកោះកុង ដែលជាការប្រឹងប្រែងមួយឈានទៅស្តារវិស័យទេសចរណ៍ទាំងស្រុងនៅក្នុងប្រទេស។
មន្ត្រីកម្មវិធីការងាររបស់មជ្ឈមណ្ឌលសម្ព័ន្ធភាពការងារនិងសិទ្ធិមនុស្សហៅកាត់ថាសង់ត្រាល់លោក ឃុន ថារ៉ូ ចាត់ទុកគម្រោងបើកដំណើរការវិស័យក្លឹបកម្សាន្តរង្គសាលជារឿងវិជ្ជមានសម្រាប់បុគ្គលិកនយោជិតដោយសារបុគ្គលិកនយោជិតមួយចំនួនកំពុងប្រឈមនឹងបញ្ហាសេដ្ឋកិច្ចគ្រួសារក៏ដូចជាការត្រូវសងបំណុលជារៀងរាល់ខែ។
យ៉ាងណាក្តី លោកជំរុញឲ្យមានអនុវត្តវិធានការតឹងរឹងផងដែរ ដោយហេតុថា វិស័យខាងលើនេះមានហានិភ័យខ្ពស់នៃការឆ្លងជំងឺកូវីដ១៩ ខណៈកន្លងមក លោកបានសង្កេតឃើញថា កន្លែងអាជីវកម្មមួយចំនួននៅមិនទាន់គោរពតាមវិធានការសុខាភិបាលបានខ្ជាប់ខ្ជួននៅឡើយនោះទេ៕
