លោកនាយករដ្ឋមន្រ្តី ហ៊ុន សែន បានសម្រេចឱ្យអ្នកដែលមានអត្តសញ្ញាណបណ្ណហួសសុពលភាពអាចទៅបោះឆ្នោតនាខែកក្កខាខាងមុខបាន ប្រសិនបើពួកគេមានឈ្មោះក្នុងបញ្ជីរបស់គណៈកម្មាធិការជាតិរៀបចំការបោះឆ្នោត។ នេះបើយោងតាមអនុក្រឹត្យស្តីពីការបន្តសុពលភាពអត្តសញ្ញាណបណ្ណសញ្ជាតិខ្មែរគំរូថ្មី ដែលបានអស់សុពលភាពសម្រាប់បម្រើឱ្យការបោះឆ្នោតជ្រើសតាំងតំណាងរាស្រ្តនីតិកាលទី៧ ចុះថ្ងៃទី២០ ខែមិថុនា ឆ្នាំ២០២៣។
បើតាមអនុក្រឹត្យ ត្រង់មាត្រា៣ចែងថាត្រូវបានបន្តសុពលភាពអត្តសញ្ញាណបណ្ណសញ្ជាតិខ្មែរគំរូថ្មី ដែលបានអស់សុពលភាពប្រើប្រាស់ក្នុងឆ្នាំ២០២២ និងឆ្នាំ២០២៣ សម្រាប់ប្រើប្រាស់ក្នុងការបោះឆ្នោតជ្រើសតាំងតំណាងរាស្រ្តនីតិកាលទី៧ រហូតដល់ត្រឹមថ្ងៃប្រកាសលទ្ធផលផ្លូវការនៃការបោះឆ្នោតជ្រើសតាំងតំណាងរាស្រ្តនីតិកាលទី៧។
កាលពីកន្លងទៅ គណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថាអ្នកមានឈ្មោះក្នុងបញ្ជីឈ្មោះបោះឆ្នោតជាង១លាន៣សែននាក់ ដែលមានអត្តសញ្ញាណបណ្ណហួសសុពលភាព។ គ.ជ.ប បញ្ជាក់ថាអត្តសញ្ញាណបណ្ណសញ្ជាតិខ្មែរ គឺជាឯកសារគតិយុត្តិតែមួយគត់ ដែលអាចប្រើសម្រាប់ការបោះឆ្នោតថ្នាក់ជាតិ នៅថ្ងៃទី២៣ ខែកក្កដា ឆ្នាំ២០២៣ខាងមុខ ហើយអត្តសញ្ញាណបណ្ណដែលហួសសុពលភាព នឹងមិនអាចប្រើប្រាស់បាននោះទេ។
គ.ជ.ប បន្ថែមថាមានតែការស្នើសុំឯកសារបញ្ជាក់នៅតាមឃុំ-សង្កាត់ ដែលចេញពីស្ថាប័នភ្នាក់ងាររបស់គ.ជ.ប ទើបអាចបោះឆ្នោតបាន។
អ្នកនាំពាក្យរបស់គ.ជ.ប លោក ហង្ស ពុទ្ធា ថ្លែងថា គ.ជ.ប គាំទ្រចំពោះអនុក្រឹត្យថ្មីរបស់លោកនាយករដ្ឋមន្រ្តីហ៊ុន សែន ដែលលោកថាវាបង្កលក្ខណៈឱ្យកាន់តែមានភាពងាយស្រួលសម្រាប់ប្រជាពលរដ្ឋក្នុងការអនុវត្តសិទ្ធិបោះឆ្នោតរបស់ខ្លួន។
លោកថ្លែងថា៖ «អ៊ីចឹងនៅពេលដែលរាជរដ្ឋាភិបាលលោកបានចេញនូវអនុក្រឹត្យបែបនេះ ពន្យារសពុលភាពនៃអត្តសញ្ញាណសញ្ជាតិខ្មែរបែបនេះគឺធ្វើឱ្យប្រជាពលរដ្ឋលោកមានឯកសារនៅក្នុងដៃគ្រប់គ្រាន់ក្នុងការចេញទៅបោះឆ្នោតដោយមិនត្រូវខាតពេលវេលាក្នុងការទៅធ្វើឯកសារបញ្ជាក់អត្តសញ្ញាណបម្រើឱ្យការបោះឆ្នោតនោះទេបាទ»។
បើតាមគ.ជ.ប ប្រជាពលរដ្ឋដែលមានឈ្មោះក្នុងបញ្ជីបោះឆ្នោត មានចំនួនសរុបជាង ៩លាន ៧សែននាក់។
កាលពីខែតុលា ឆ្នាំ២០២២ អគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃបានអំពាវនាវឱ្យប្រជាពលរដ្ឋទៅធ្វើអត្តសញ្ញាណបណ្ណថ្មី ជំនួសអត្តសញ្ញាណបណ្ណដែលហួសសុពលភាព ដើម្បីអាចទៅបោះឆ្នោតបាន។
អគ្គនាយករងនៃអគ្គនាយកដ្ឋានអត្តសញ្ញាណកម្ម និងជាអ្នកនាំពាក្យ លោក សាយ ម៉េងឈាង ប្រាប់វីអូអេតាមរយៈប្រព័ន្ធទំនាក់ទំនងតេឡេក្រាមដោយសរសេរជាអក្សរថា ប្រជាពលរដ្ឋដែលមានអត្តសញ្ញាណបណ្ណផុតសុពលភាព គិតត្រឹមថ្ងៃទី២៤ ខែកក្កដា ឆ្នាំ២០២៣ មានជាង១.៧ លាននាក់ ហើយអគ្គនាយកដ្ឋានបានផ្តល់ជូនប្រជាពលរដ្ឋ គិតត្រឹមថ្ងៃទី២០ ខែមិថុនា ជាង៩៧ម៉ឺននាក់។
គួរបញ្ជាក់ថាការបោះឆ្នោតនាខែកក្កដាខាងមុខនេះ មិនមានវត្តមានគណបក្សប្រឆាំងដ៏ធំ គឺគណបក្សភ្លើងទៀនឡើយ។
មេដឹកនាំគណបក្សប្រឆាំង លោក សម រង្ស៊ី បានអំពាវនាវកុំឱ្យប្រជាពលរដ្ឋទៅបោះឆ្នោត ឬគូសសន្លឹកឆ្នោតចោល ដោយសារតែមិនមានឈ្មោះគណបក្សដែលប្រជាពលរដ្ឋស្រឡាញ់។
ទោះជាយ៉ាងណា ការអំពាវនាវនេះត្រូវបានលោកនាយករដ្ឋមន្រ្តី ហ៊ុន សែន ព្រមានរំលាយគណបក្សភ្លើងទៀន ដែលប្រសិនបើមេដឹកនាំប្រឆាំងនៅខាងក្រៅប្រទេស ជាពិសេសលោក សម រង្ស៊ី បន្តវាយប្រហាររដ្ឋាភិបាល និងអំពាវនាវឱ្យប្រជាពលរដ្ឋមិនទៅបោះឆ្នោត។ លោកនាយករដ្ឋមន្រ្តីក៏បានស្នើធ្វើវិសោធនកម្មច្បាប់ដែលដាក់ទោសទណ្ឌចំពោះអ្នកណែនាំឬញុះញង់ប្រជាពលរដ្ឋមិនឲ្យទៅបោះឆ្នោត ឬគូសសន្លឹកឆ្នោតចោល។ វិសោធនកម្មច្បាប់នេះនឹងត្រូវអនុម័តដោយរដ្ឋសភានាថ្ងៃសុក្រសប្តាហ៍នេះ៕
