ភ្ជាប់​ទៅ​គេហទំព័រ​ទាក់ទង

ហានិភ័យ​សាកល​ក្នុង​ឆ្នាំ​២០១១​គឺ​បរាជ័យ​នៃ​អភិបាល​កិច្ច​សាកល

  • Selah Hennessy

លោក Drzik នាយក​ប្រតិបត្តិ​របស់​ក្រុមហ៊ុន Oliver Wyman ថ្លែង​នៅ​ក្នុង​ការ​ប្រកាស​អំពី​​របាយការណ៍​ស្តី​អំពី​ហានិភ័យ​សាកល​ក្នុង​វេទិកា​សេដ្ឋកិច្ច​ពិភពលោក​២០១០ ​នៅ​ក្នុង​ក្រុង​ឡុងដ៍​​ ប្រទេស​អង់គ្លេស​ក្នុង​ខែ​មករា​ឆ្នាំ​២០១០។

យោង​តាម​របាយ​ការណ៍​ថ្មី​មួយ​ស្តី​អំពី​ហានិភ័យ​សាកល ​របស់​អង្គការ​វេទិកា​សេដ្ឋកិច្ច​ពិភព​លោកឱ្យ​ដឹងថា​ វិបត្តិ​ហិរញ្ញ​វត្ថុ​សាកល​បាន​«កាត់​បន្ថយសមត្ថ​ភាព​របស់​ពិ​ភព​លោក» ក្នុង​ការ​ដោះ​ស្រាយ​បញ្ហាដ៏​គួរ​ឱ្យ​តក់​ស្លុត​ទាំង​ឡាយ​ ដែល​កើត​មាន​ឡើង​ជា​បន្ត​បន្ទាប់។

នៅ​ក្នុង​របាយ​ការណ៍​ស្តី​អំពី​ហានិភ័យ​សាកល​នៅ​ក្នុង​ឆ្នាំ​នេះ វេទិកា​សេដ្ឋកិច្ច​ពិភព​លោកនិយាយ​ថា បញ្ហា​ធំៗ​ចំនួន​ពីរ​កំពុង​តែ​ធ្វើ​ឱ្យ​ហានិភ័យ​ទាំង​ឡាយ​នៅ​ទូទាំងពិភព​លោក​កាន់​តែ​មាន​សភាព​ធ្ងន់​ធ្ងរ​ឡើង។

លោក​ ដានីញ៉ែល​ ហូវមែន (Daniel Hoffman) ដែល​ជា​ប្រធាន​ផ្នែក​សេដ្ឋកិច្ច នៃ​ក្រុម​ផ្តល់​សេវាកម្ម​ហិរញ្ញ​វត្ថុ នៅ ទីក្រុង​ហ៊្សូរីច (Zurich) មាន​ប្រសាសន៍​ថា បញ្ហា​មួយ​ក្នុង​ចំណោម​បញ្ហា​ទាំងពីរ​គឺ​ភាព​មិន​ស្មើ​គ្នា​ផ្នែក​សេដ្ឋកិច្ច។

«ជា​ពិសេស នៅ​ក្នុងបណ្តាប្រទេស​ទាំង​ឡាយ កំណើន​សេដ្ឋកិច្ច​បាន​បង្កើត​ឱ្យ​មាន​អ្នក​ចាញ់​កាន់​តែ​មាន​ចំនួន​ច្រើន​ឡើងៗ ​និង​អ្នក​ឈ្នះ​កាន់​តែ​មាន​ចំនួន​តិច​ទៅៗ»។

លោក​មាន​ប្រសាសន៍​ថា ការ​បែង​ចែក​យ៉ាង​ខ្លាំង​រវាង​អ្នក​មាន​និង​អ្នក​ក្រ ​ប្រហែល​ជា​អាច​នឹង​នាំ​ទៅ​ដល់​ចលាចល​ក្នុង​សង្គម។ របាយ​ការណ៍​បាន​ព្រមាន​អំពី​ការ​ផុស​ឡើង​នូវ​គំនិតជាតិ​និយម លទ្ធិ​ប្រជា​និយម និង​ការ​បែក​បាក់​នៅ​ក្នុង​សង្គម។

លោក​មាន​ប្រសាសន៍​ថា បញ្ហា​ធំ​ទីពីរ​គឺ​ថា អភិ​បាល​កិច្ច​សាកល​កំពុង​តែ​បរាជ័យ។

លោក​បាន​លើក​ឧទាហរណ៍​ថា​ នៅ​ពេលវិបត្តិ​ហិរញ្ញ​វត្ថុចាប់​ផ្តើម ​ប្រទេស​ទាំង​ឡាយ​បាន​ចាប់​ផ្តើមធ្វើ​ការ​ជាមួយ​គ្នា​ដើម្បី​ដោះ​ស្រាយ​បញ្ហា​ទាំង​នោះ​ប៉ុន្តែ​ការ​តាំង​ចិត្ត​នេះ​ហាក់​ដូច​ជា​រលាយ​បាត់​ទៅ​វិញ។

«ឥឡូវ​នេះ ពីរ​ឆ្នាំ​ក្រោយ​មក យើង​ឃើញ​ថា កម្លាំង​នេះហាក់​ដូច​ជា​បាន​រលាយ​បាត់​និង​រសាត់​ចេញទៅ​វិញ​បន្តិច​ម្តងៗ។ ហើយ​វា​ហាក់​ដូច​ជា​លែង​មាន​ឆន្ទៈ​នៃ​ការ​សម្រប​សម្រួល​ជា​សាកល​មួយត​ទៅ​ទៀត​ហើយ​ ក្នុង​ការ​ដោះ​ស្រាយមូល​ហេតុ​ទាំង​ឡាយ​នៃ​វិបត្តិ​ហិរញ្ញវត្ថុ ដែល​មាន​ផល​ប៉ះ​ពាល់​មក​លើ​យើង​យ៉ាង​ខ្លាំង​កាល​ពី​ពីរ​ឆ្នាំ​មុន»។

របាយ​ការណ៍​បាន​ផ្តោត​ទៅ​លើ​ចង្កោម​នៃហានិភ័យ​មួយ​ចំនួនដែល​មាន​ដូចជា៖អតុល្យភាពសាកល​ដែល​រួមមាន​បំណុល​រដ្ឋា​ភិ​បាលនិង​អស្ថេរភាព​រូបិយវត្ថុ ​សេដ្ឋកិច្ច​ក្រៅ​ប្រព័ន្ធ​ច្បាប់ ឧក្រិដ្ឋកម្ម​ដែល​មាន​ការចាត់តាំង អំពើ​ពុក​រលួយ និង​ពាណិជ្ជ​កម្ម​ខុស​ច្បាប់ និង​ការ​ដាក់​សម្ពាធ​ទៅ​លើ​ប្រភព​ធន​ធាន​ ជា​ពិសេស​ទឹក ម្ហូប​អាហារ​ និង​ថាមពល។

ក្រុម​ហ៊ុន​ផ្តល់​ប្រឹក្សា​ដែល​មាន​ឈ្មោះ​ថា អូលីវ័រ វីមែន គ្រុប (Oliver Wyman Group) បាន​រួម​ចំណែក​ដល់ការ​ចង​ក្រង​របាយ​ការណ៍​នេះ។ ប្រធាន​ក្រុម​ហ៊ុន​ លោក ចន ឌីហ្សីក (John Drzik) មាន​ប្រសាសន៍ថា ការ​ប្រែប្រួល​អាកាស​ធាតុ​កំពុង​បង្កើត​ឱ្យ​មាន​ការ​ផ្លាស់​ប្តូរ​យ៉ាង​ខ្លាំង ហើយ​ពិភព​លោក​ត្រូវ​តែ​ធ្វើ​ការ​ជាមួយ​គ្នា ដើម្បី​ជំនះ​នូវ​ផល​ប៉ះ​ពាល់​របស់​វា។ លោក​បាន​ផ្តល់​ជា​ឧទាហរណ៍​មួយ។

«កាល​ពី​រដូវ​ក្តៅ​មុន ខណៈ​ពេល​ដែល​ប្រទេស​រុស្ស៊ី​បាន​ដាក់​បម្រាម​ទៅ​លើ​ការ​នាំ​ចេញស្រូវ​សាឡី ដើម្បី​ការ​ពារ​ការ​ផ្គត់​ផ្គង់​ម្ហូប​អាហារ​របស់​ខ្លួន​ ​សកម្ម​ភាព​បែប​នេះ​បង្កើតឱ្យ​មាន​នូវ​សកម្ម​ភាព​ដូច​គ្នា​ក្នុង​ទ្រង់​ទ្រាយ​ជា​សាកល​នៅ​ក្នុង​ប្រទេស​ជា​ច្រើន ហើយ​អាច​នាំ​ទៅ​ដល់​អស្ថេរ​ភាព​ និង​ភាព​តាន​តឹង​ផ្នែក​ភូមិ​សាស្ត្រ​នយោ​បាយ​ទាំង​ឡាយ​ថែម​ទៀត»។

លោក​ ឌី​ហ្សីក​ មាន​ប្រសាសន៍​ថា វា​មាន​វិធីទៅ​មុខ​មួយ ប៉ុន្តែ ​ការ​សម្រប​សម្រួល​ជា​សាកល​គឺជា​គន្លឹះ។

«ខ្ញុំ​គិត​ថា អ្នក​អាច​អាន​របាយ​ការណ៍​ឱ្យ​បាន​ច្បាស់​លាស់​ ដែល​ថាមាន​រឿង​រ៉ាវ​ជា​ច្រើនដែល​កំពុង​ត្រូវ​បាន​លាត​ត្រដាង និង​ថាហានិភ័យ​ទាំង​នេះ​អាច​នឹង​រីក​ធំ​ឡើង​ ប្រសិន​បើ​យើងទុក​ចោល​ដោយ​គ្មាន​ការ​ដោះ​ស្រាយ»។

របាយ​ការណ៍​វិភាគ​ចំនួន​៥០​ទំព័រ​ស្តីអំពី​គ្រោះ​មហន្ត​រាយ​សាកល ត្រូវ​បាន​បោះ​ពុម្ព​ដោយ​អង្គ​ការ​វេទិកា​សេដ្ឋកិច្ច​ពិភព​លោក ដែល​ជា​អង្គ​ការ​ឯក​រាជ្យ​អន្តរ​ជាតិ​មួយ​ ដែល​មាន​មូល​ដ្ឋាន​នៅ​ក្នុង​ទី​ក្រុង​ហ្សឺណែវ។ របាយ​ការណ៍​នេះ​ត្រូវ​បាន​ចេញ​ផ្សាយ​ពីរ​សប្តាហ៍​ មុន​កិច្ច​ប្រជុំ​ប្រចាំ​ឆ្នាំ​របស់​ខ្លួន​នៅ​ក្នុង​ទី​ក្រុង​ ដេវ៉ូ​ ប្រទេស​ស៊្វីស៕

ប្រែ​សម្រួល​ដោយ ឌី​ ខាំបូលី

XS
SM
MD
LG