កាលពីចុងខែតុលាកន្លងទៅ រដ្ឋាភិបាលចិនបានធ្វើការសម្រេចចិត្តជាប្រវត្តិសាស្រ្តមួយ គឺការបន្ធូរគោលនយោបាយមានកូនតែមួយជាលើកដំបូង ក្រោយពីគោលនយោបាយនេះត្រូវបានដាក់ឲ្យអនុវត្តតាំងពី៣៥ឆ្នាំមុន។ បច្ចុប្បន្ននេះ ប្តីប្រពន្ធនៅប្រទេសចិនទាំងអស់ ត្រូវបានអនុញ្ញាតឲ្យបង្កើតកូនចំនួន២នាក់ ហើយមនុស្សជាច្រើនក្នុងឧស្សាហកម្មបង្ករកំណើតកំពុងព្យាករណ៍ថា ប្រទេសចិននឹងក្លាយជាទីផ្សារធំជាងគេសម្រាប់បច្ចេកវិទ្យាបង្កកំណើតក្រៅស្បូន។
លោក Luk Rombauts សាស្រ្តាចារ្យនិងជាវេជ្ជបណ្ឌិតនៅក្រុមហ៊ុនបង្កកំណើតក្រៅស្បូន Monash IVF Group Limited របស់ប្រទេសអូស្រ្តាលី និយាយថា៖
«ខ្ញុំអាចនឹកស្រមៃឃើញថា មនុស្សដែលមានគភ៌និងបានបង្កើតកូនម្នាក់អំឡុងពេលដែលគេមានវ័យពាក់កណ្តាល៣០ឆ្នាំ កាលពីច្រើនឆ្នាំមុន ឥឡូវនេះប្រហែលជាឈានចូលដល់វ័យពាក់កណ្តាល៤០ឆ្នាំហើយ។ ហើយទោះបីជាពួកគេចង់បង្កើតកូនដោយខ្លួនឯងក៏ដោយ ក៏ពួកគេដឹងថា វាមិនអាចទៅរួចទេ»។
គូស្វាមីភរិយាត្រូវប្រឈមមុខនឹងឧបសគ្គការិយាធិបតេយ្យនៅពេលពួកគេព្យាយាមទទួលយកការបង្កកំណើតកូនតាមរយៈគ្លីនិកដែលមានបច្ចេកទេសបង្កកំណើតក្រៅស្បូននៅប្រទេសចិន។ រដ្ឋាភិបាលចិនបានហាមឃាត់ការប្រើវិធីសាស្ត្រជ្រើសរើសភេទ និងការបង្កកំណើតតាមបច្ចេកទេសជឿនលឿន។
គ្រួសារទាំងអស់ក៏ត្រូវតែស្នើសុំអាជ្ញាប័នសម្រាលកូន និងផ្តល់ឯកសារដែលបញ្ជាក់ពីអាពាហ៍ពិពាហ៍ មុននឹងទទួលបានការព្យាបាលនេះ។ ដូច្នេះ ប្រជាជនចិនវណ្ណៈកណ្តាលដែលកំពុងកើនឡើងនេះ នឹងចាប់ផ្តើមចេញទៅទទួលសេវាបង្កកំណើតនៅក្រៅប្រទេសដូចជា ទៅប្រទេសអូស្រ្តាលី ថៃ និងសហរដ្ឋអាមេរិក។
លោក James Marshall ជាអ្នកគ្រប់គ្រងការអភិវឌ្ឍធុរកិច្ចនៃគ្លីនិក Superior A.R.T. ដែលជាគ្លីនិកមួយជួយក្នុងការបង្កកំណើតក្នុងប្រទេសថៃ។ លោកនិយាយថា ចំនួនអ្នកជំងឺចិនបានកើនឡើងជិតទ្វេដងក្នុងរយៈពេល៣ឆ្នាំចុងក្រោយនេះ។
«ភាគរយនៃចំនួនអ្នកជំងឺសរុបរបស់យើងបានកើនឡើងពីប្រហែលជា១៥ភាគរយ កាលពីប្រមាណ៣ឆ្នាំមុន រហូតដល់ទៅ៣៥ភាគរយនៃចំនួនអ្នកជំងឺសរុបសព្វថ្ងៃ»។
គ្លីនិកជាច្រើនដូចជា Superior A.R.T. ជាដើម កំពុងតែផ្លាស់ប្តូរសេវាកម្មរបស់ពួកគេដើម្បីទាក់ទាញអតិថិជនចិនបន្ថែមទៀត។
លោក Marshall និយាយថា គ្លីនិក Superior A.R.T.បានជ្រើសរើសបុគ្គលិកដែលអាចនិយាយភាសាចិន (Mandarin) ហើយបានបោះពុម្ពកូនសៀវភៅផ្សព្វផ្សាយជាភាសាចិនផងដែរ។ ក្រៅពីនេះ គ្លីនិកនេះក៏បានស្វែងរកដៃគូសហការជាមួយមន្ទីរពេទ្យ និងគ្លីនិកបង្កកំណើតមួយចំនួននៅប្រទេសចិន។
ការធ្វើបែបនេះ ធ្វើឲ្យមន្ទីរពេទ្យក្រៅប្រទេសអាចនឹងបំពេញចន្លោះប្រហោងខាងប្រព័ន្ធសុខាភិបាលដែលមានតម្រូវការខ្លាំងក្នុងប្រទេសចិន ជាទីដែលមានគ្លីនិកតែ២០០ឬ៣០០ប៉ុណ្ណោះបានផ្តល់សេវាកម្មបង្កកំណើតក្រៅស្បូនរហូតដល់ទៅពាក់កណ្តាលលានករណីនៅឆ្នាំ២០១៣។ នេះបើប្រៀបធៀបទៅនឹងសហរដ្ឋអាមេរិក ដែលមានការផ្តល់សេវាកម្មបង្កកំណើតក្រៅស្បូនជាង២០០.០០០ករណី នៅក្នុងអំឡុងពេលដូចគ្នា។
លោក Sue Channon ប្រធានប្រតិបត្តិក្រុមហ៊ុន Virtus Health មានទីស្នាក់ការនៅទីក្រុងស៊ីដនីប្រទេសអូស្រ្តាលីបាននិយាយថា៖ «កន្លងមក ពិតជាមានការកើនឡើងនូវការស្នើសុំពីអតិថិជនចិន ហើយក៏មានអ្នកផ្តល់សេវាវេជ្ជសាស្រ្តដែលស្វែងរកដៃគូសហការជាមួយគ្លីនិកវេជ្ជសាស្រ្តរបស់អូស្រ្តាលីយើងផងដែរ។ នៅអូស្រ្តាលី យើងមានកេរ្តិ៍ឈ្មោះល្បីល្បាញណាស់ ក្នុងការផ្តល់សេវាកម្មបង្កកំណើតកូនដែលមានគុណភាពនិងសុវត្ថិភាពខ្ពស់។ វេជ្ជបណ្ឌិតនិងបុគ្គលិកជាច្រើនរបស់យើងអាចនិយាយភាសាចិនបាន»។
ភាពភ័យខ្លាចកើតចេញពីគោលនយោបាយកូនតែមួយរបស់ចិន ដូចជាការបង្ខំឲ្យពន្លូតកូន និងការវះកាត់មិនឲ្យមានកូន ប្រហែលជាត្រូវបានជំនួសដោយការរីកដុះដាលនៃឧស្សាហកម្មបង្កកំណើតកូន ស្របពេលដែលក្រុមហ៊ុនបរទេសជាច្រើនកំពុងឈរជើងរង់ចាំទទួលផលចំណេញពីតម្រូវការដែលកើនឡើងខ្លាំងនេះ៕
ប្រែសម្រួលដោយ វិញ សុជាតា
