ប្រទេសអាល្លឺម៉ង់កំពុងស្វែងរកជនសមគំនិតជាមួយជនសង្ស័យវាយប្រហាររថយន្ត Truck នៅក្នុងទីក្រុងប៊ែរឡាំង មួយថ្ងៃបន្ទាប់ពីជននោះបានត្រូវសម្លាប់នៅក្នុងការបាញ់ប្រហារជាមួយប៉ូលិសអ៊ីតាលីនៅក្នុងទីក្រុង Milan។
នៅពេលដែលប្រទេសអាល្លឺម៉ង់ បានរៀបចំប្រារព្ធពិធីបុណ្យគ្រឹស្តម៉ាសនៅថ្ងៃសៅរ៍នេះ ពួកអាជ្ញាធរអាល្លឺម៉ង់បាននិយាយថា ពួកអ្នកស៊ើបអង្កេតរាប់រយនាក់នឹងធ្វើការស៊ើបអង្កេតយ៉ាងល្អិតល្អន់នៅរដូវឈប់សម្រាកនេះ។
ថ្លែងទៅកាន់អ្នកយកព័ត៌មាននៅក្នុងទីក្រុងប៊ែរឡាំងកាលពីថ្ងៃសុក្រ លោក Peter Frank ប្រធានរដ្ឋអាជ្ញាសហព័ន្ធបាននិយាយថា ពួកអ្នកស៊ើបអង្កេតកំពុងព្យាយាមធ្វើការកំណត់ថាតើ Anis Amri អាយុ២៤ឆ្នាំជាតិទុយនីស៊ីនោះ បានទទួលការជួយពីបណ្តាញពួកអ្នកគាំទ្រដែរឬទេ។
លោក Frank បាននិយាយបន្តទៀតថា ម្រាមដៃបានបញ្ជាក់ថា Amri បានធ្វើការវាយប្រហារដែលបានសម្លាប់មនុស្ស១២នាក់ហើយនឹងធ្វើឲ្យ៥៦នាក់ទៀតរងរបួសកាលពីថ្ងៃចន្ទមុន។ក៏ប៉ុន្តែ លោកបាននិយាយថា ការស៊ើបអង្កេតនៅវែងឆ្ងាយទៀត។
លោកFrankបាននិយាយថា «វាជាការសំខាន់ណាស់សម្រាប់យើងនៅពេលឥឡូវនេះដើម្បីស្វែងរកថាតើមានបណ្តាញពួកអ្នកគាំទ្រនិងជនសមគំនិតដែរឬទេ ថាតើមានមនុស្សជំនិតដែលបានជួយជននេះប្រុងប្រៀបរៀបចំហើយធ្វើការវាយប្រហារនិងគេចខ្លួនដែរឬទេ»។
លោកស្រី Angela Merkel អធិការបតីនៃប្រទេសអាល្លឺម៉ង់ បានបញ្ជាក់ឡើងវិញថា ការស៊ើបអង្កេតនេះនឹងផ្តោតលើលទ្ធភាពនៃអ្នកសមគំនិត។
ក្នុងវីដេអូដែលជាប់ពាក់ព័ន្ធនឹងក្រុមរដ្ឋឥស្លាមដែលបានចេញផ្សាយកាលពីថ្ងៃសុក្របានបង្ហាញថាAmri បានអំពាវនាវឲ្យមានការវាយប្រហារកាន់តែច្រើនឡើងថែមទៀតនៅក្នុងទ្វីបអឺរ៉ុប៕
