ក្រុមជនស៊ីវិលនៅហ្កាហ្សា«កំពុងប្រឈមនឹងទុរ្ភិក្សបន្ទាន់»។ នេះបើតាមលោកស្រី Cindy McCain នាយិកាប្រតិបត្តិនៃកម្មវិធីស្បៀងអាហារពិភពលោក។
លោកស្រី McCain បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា៖ «ការផ្គត់ផ្គង់ស្បៀងអាហារនិងទឹកមិនមានទេនៅហ្កាហ្សា ហើយមានតែផ្នែកតូចមួយនៃអ្វីដែលគេត្រូវការកំពុងទៅដល់តាមព្រំដែន។ គេមិនអាចបំពេញសេចក្តីត្រូវការនៃការស្រេកឃ្លានបច្ចុប្បន្នដោយច្រកព្រំដែនមានប្រតិបត្តិការតែមួយបានទេ។ សេចក្តីសង្ឃឹមតែមួយគឺបើកច្រកមួយទៀត ជាកន្លែងដឹកជញ្ជូនស្បៀងអាហារមនុស្សធម៌សម្រាប់ជួយសង្គ្រោះជីវិតមនុស្សទៅក្នុងហ្កាហ្សា»។
កាលពីយប់ថ្ងៃព្រហស្បតិ៍ កងយោធាអ៊ីស្រាអែលបានប្រកាសថាខ្លួនបានផ្តល់ទឹក៤.០០០លីត្រនិងអាហារចម្អិនស្រាប់១.៥០០ដល់មន្ទីរពេទ្យ Shifa។
នៅថ្ងៃសុក្រនេះដែរ កងកម្លាំងការពារជាតិអ៊ីស្រាអែល បានប្រកាសថាខ្លួនបានរកឃើញនិងបានយកសាកសពនាយឯក Noa Marciano។ កងយោធាថាសពអ្នកស្រីត្រូវបានរកឃើញ«នៅជិតមន្ទីរពេទ្យ Shifa ក្នុងតំបន់ហ្កាហ្សា»។ ពួកហាម៉ាស់បានចាប់ពង្រត់អ្នកស្រីកាលពីថ្ងៃទី៧ ខែតុលាក្នុងការវាយប្រហាររបស់ពួកជនសកម្មប្រយុទ្ធលើអ៊ីស្រាអែល។
អ៊ីសា្រអែលបានបញ្ជាឱ្យជនជាតិប៉ាឡេស្ទីនចាកចេញពីក្រុងបួនក្នុងប៉ែកខាងត្បូងតំបន់ហ្កាហ្សាកាលពីថ្ងៃព្រហស្បតិ៍ ជាសញ្ញាបង្ហាញថានឹងមានការពង្រីកសង្គ្រាមប្រឆាំងនឹងក្រុមជនសកម្មប្រយុទ្ធហាម៉ាស់ទៅក្នុងកន្លែងដែលពួកមន្ត្រីអ៊ីស្រាអែលបានប្រាប់ប្រជារាស្ត្រថាមានសុវត្ថិភាពនៅទីទាំងនោះ៕
អ្នកឆ្លើយឆ្លងព័ត៌មានវីអូអេប្រចាំអង្គការសហប្រជាជាតិអ្នកស្រី Margaret Besheer និងប្រធានការិយាល័យសេតវិមានអ្នកស្រី Patsy Widakuswara បានចូលរួមចំណែកក្នុងសេចក្តីរាយការណ៍នេះ។ ព័ត៌មានមួយដកស្រង់មកពីទីភ្នាក់ងារសារព័ត៌មាន The Associated Press, Reuters និង Agence France-Presse ។
