ការស្ទង់មតិថ្មីមួយបានបង្ហាញថា ពលរដ្ឋប៉ាគីស្ថានជាងពីរភាគបីខ្វះជំនឿលើសុចរិតភាពនៃដំណើរការបោះឆ្នោតនិងរដ្ឋាភិបាលមុនការបោះឆ្នោតជ្រើសរើសសភាចូលមកដល់នៅថ្ងៃព្រហស្បតិ៍នេះ។
ក្រុមហ៊ុនស្ទង់មតិ Gallup ដែលមានមូលដ្ឋាននៅសហរដ្ឋអាមេរិក បានរកឃើញថាពលរដ្ឋប៉ាគីស្ថានកាន់តែខកចិត្តរឿងសេដ្ឋកិច្ច នយោបាយ និងសន្តិសុខ ដែលបញ្ហាទាំងនេះប៉ះពាល់ដល់ស្ថិរភាពប្រទេសរបស់ពួកគេ ដោយពួកគេបានបង្ហាញការមិនពេញចិត្តខ្ពស់បំផុតមិនធ្លាប់មានពីមុនមកមុនការបោះឆ្នោតចូលមកដល់។
ការស្ទង់មតិនេះបានបញ្ជាក់ថា បរិយាកាសនយោបាយ «មានភាពស្រអាប់ដូចទៅនឹងបរិយាកាសសេដ្ឋកិច្ចដែរ» មុនការបោះឆ្នោតថ្នាក់ជាតិនៅក្នុងប្រទេសប៉ាគីស្ថានចូលមកដល់ដែលជាការរៀបចំជាលើកដំបូងតាំងពីឆ្នាំ ២០១៨ មក។
ការស្ទង់មតិនេះបានបន្ថែមថា៖ «ពលរដ្ឋប៉ាគីស្ថាន ៧ នាក់ក្នុងចំណោម ១០ នាក់ខ្វះទំនុកចិត្តលើភាពស្មោះត្រង់នៃការបោះឆ្នោតនៅប៉ាគីស្ថាន»។
បន្ថែមពីលើការមិនទុកចិត្តរបស់ពួកគេលើការបោះឆ្នោតនេះ ពលរដ្ឋប៉ាគីស្ថាន ៨៨% ក៏ជឿផងដែរថា អំពើពុករលួយកំពុងរីកសាយភាយនៅក្នុងជួររដ្ឋាភិបាល។
ទស្សនៈទុទ្ទិដ្ឋិនិយមរបស់ពលរដ្ឋប៉ាគីស្ថានលើសេដ្ឋកិច្ចបានឡើងខ្ពស់ក្នុងពេល ១៨ ឆ្នាំចុងក្រោយនេះ ដោយពលរដ្ឋចំនួន ៧០% ជឿថាស្ថានភាពសេដ្ឋកិច្ចគឺកាន់តែអាក្រក់ជាងមុននៅកន្លែងដែលពួកគេរស់នៅ។
ក្រុមហ៊ុន Gallup បានបញ្ជាក់ថា ខ្លួនបានសម្ភាសទល់មុខជាមួយនឹងមនុស្សពេញវ័យ ១.០០០ នាក់ដែលមានអាយុពី ១៥ ឆ្នាំឡើងទៅនៅក្នុងប្រទេសប៉ាគីស្ថានពីខែកញ្ញាដល់ខែតុលាឆ្នាំមុន។
ការស្ទង់មតិនេះបានរកឃើញថា ទិដ្ឋភាពនយោបាយនៅក្នុងប្រទេសប៉ាគីស្ថានដែលមានប្រជាជនប្រហែល ២៤១ លាននាក់នេះនៅតែមានអស្ថិរភាពនៅឡើយតាំងពីពេលដែលលោក Imran Khan ត្រូវបានរដ្ឋសភាបោះឆ្នោតដកចេញពីតំណែងជានាយករដ្ឋមន្ត្រីមក៕
វេទិកាបញ្ចេញមតិ