ក្រុមស្រ្តីដែលមានគ្នាប្រមាណ១០នាក់ ជាភរិយារបស់សកម្មជនបក្សប្រឆាំង កាលពីព្រឹកថ្ងៃសុក្រ បានសុំអន្តរាគមន៍ពីស្ថានទូតអាមេរិកប្រចាំនៅកម្ពុជា ដើម្បីឲ្យស្វាមីរបស់ពួកគេត្រូវបានដោះលែង។
ការប្រមូលផ្តុំនិងលើករូបថតរបស់សកម្មជននយោបាយទាំងនោះនៅលើសួនច្បារខាងមុខស្ថានទូតអាមេរិក ត្រូវបានក្រុមសន្តិសុខខណ្ឌបានព្យាយាមបំបែកក្រុមស្រ្តី ដោយលើកហេតុផលបំពានវិធានការកូវីដ១៩ រហូតដល់មានការចាប់ទាញផ្ទាំងរូបថតប្លាស្ទិកដែលស្រ្តីទាំងនោះកាន់ផងដែរ។
នៅក្នុងញត្តិដែលវីអូអេទទួលបាន ក្រុមស្រ្តីដែលតែងតវ៉ានៅថ្ងៃសុក្រ បានសរសេរទៅកាន់លោកប្រធានាធិបតីអាមេរិក Joe Biden ដោយប្រាប់ថាសកម្មជនទាំងនោះបានជាប់ពន្ធនាគារដោយ«អយុត្តិធម៌បំផុត» ហើយ«ការឃុំឃាត់ពួកគាត់អូសបន្លាយពេលវេលាយូរអង្វែង»។
ពួកគេក៏បានស្នើឲ្យសហរដ្ឋអាមេរិកស្តារលទ្ធិប្រជាធិបតេយ្យនៅកម្ពុជាផងដែរ។ ពួកគេបញ្ជាក់ថា៖ «ដូច្នេះសូមឯកឧត្តមប្រធានាធិបតីមេត្តាប្រើឥទ្ធិពលនៃការទំនាក់ទំនងនេះជួយទាមទារឲ្យក្រុមគ្រួសារពួកយើងខ្ញុំនៅក្នុងពន្ធនាគារ ត្រូវបានដោះលែង រួមនិងអ្នកទោសមនសិការជាអ្នកស្នេហាជាតិទាំងអស់ ព្រោះពួកគាត់សុទ្ធសឹងតែជាមនុស្សស្លូតត្រង់គ្មានកំហុសអ្វីឡើយ»។
អ្នកនាំពាក្យស្ថានទូតអាមេរិកលោក Chad Roedemeier បានថ្លែងថាបុគ្គលិកស្ថានទូតបានទទួលញត្តិរបស់ក្រុមអ្នកតវ៉ាដោយបញ្ជាក់ថាក្រុមអ្នកជាប់ឃុំឃាំងដោយសារការបញ្ចេញមតិមិនគួរត្រូវចោទប្រកាន់ទោសទេ។
លោកថ្លែងថា៖ «យើងបន្តជំរុញដល់រដ្ឋាភិបាលកម្ពុជាឲ្យទម្លាក់បទចោទទាំងស្រុងប្រឆាំងនឹងសកម្មជនតវ៉ាដោយអហិង្សាទាំងនោះគោរពសិទ្ធិមនុស្សជាមូលដ្ឋានដូចដែលមានការធានាដោយរដ្ឋធម្មនុញ្ញកម្ពុជានិង បើកឲ្យមានលម្ហសេរីភាពនយោបាយនិងសង្គមស៊ីវិលឡើងវិញ»។
លោក ជិន ម៉ាលីន អ្នកនាំពាក្យក្រសួងយុត្តិធម៌ ប្រាប់វីអូអេថាការសុំអន្តរាគមន៍ជាបន្តបន្ទាប់របស់ក្រុមស្រ្តីទាំងនោះជាសិទ្ធិរបស់ពួកគេ ដែលលោកថាមិនមាន«ឥទ្ធិពលអ្វីលើការសម្រេចរបស់តុលាការ»ឡើយ។
គួរបញ្ជាក់ថាក្រុមគ្រួសាររបស់អតីតមន្រ្តីគណបក្សសង្រ្គោះជាតិតែងតែចេញមុខរៀងរាល់ថ្ងៃសុក្រដើម្បីទាមទារឲ្យដោះលែងក្រុមគ្រួសាររបស់ពួកគេចំនួន១៥នាក់ ដែលត្រូវចាប់ខ្លួនកាលពីឆ្នាំ២០២០។ ពួកគេភាគច្រើនជាអតីតក្រុមប្រឹក្សានិងមន្ត្រីថ្នាក់ឃុំសង្កាត់ ដែលត្រូវបានតុលាការចោទប្រកាន់ពីបទល្មើសព្រហ្មទណ្ឌ ដោយសារការអត្ថាធិប្បាយនិងចែករំលែកព័ត៌មានទាក់ទិនស្ថានភាពសេដ្ឋកិច្ចប្រទេស ក្នុងពេលវិបត្តិជំងឺឆ្លងកូវីដ១៩និងការគាំទ្រគម្រោងវិលត្រឡប់ចូលប្រទេសវិញរបស់លោកសម រង្ស៊ី មេដឹកនាំបក្សប្រឆាំង កាលពីខែវិច្ឆិកា ឆ្នាំ២០១៩៕
