ប្រទេសបារាំងនិយាយថា ជំនួយមនុស្សធម៌ ហើយមិនមែនអន្ដរាគមន៍យោធាទេទើបសមជាអាទិភាពក្នុងការដោះស្រាយអំពើឃោរឃៅនៅក្នុងប្រទសលីប៊ី ចំពេលដែលមានកិច្ចប្រឹងប្រែងកាន់តែខ្លាំងដោយក្រុមប្រឆាំងលីប៊ីដើម្បីបណ្ដេញមេដឹកនាំប្រទេសយូរអង្វែង មូម៉ារ កាដាហ្វ៊ី (Moammar Gadhafi) ចេញពីតំណែង។
នៅក្នុងសេចក្ដីសម្ភាសន៍តាមទូរទស្សន៍កាលពីថ្ងៃអង្គារទី១ខែកុម្ភៈ អ្នកនាំពាក្យរបស់រដ្ឋាភិបាលបារាំង លោក ហ្វ្រង់ស្វ័រ បារ៉ូអាំង (Francois Baroin) ថ្លែងថា រដ្ឋាភិបាលទីក្រុងបារីសស្លុតចិត្ដចំពោះអំពើឃោរឃៅនៅក្នុងប្រទេសលីប៊ី ហើយបានចាត់ទុកមេដឹកនាំប្រទេស ម៉ូម៉ារ កាដាហ្វ៊ី ថាមិនមានតុល្យភាពនៅក្នុងខួរក្បាលទេ។
តែលោក បារ៉ូអាំង ថ្លែងថា អន្ដរាគមន៍យោធាដើម្បីទម្លាក់លោកកាដាហ្វ៊ី មិនមែនជាអាទិភាពរបស់ប្រទេសបារាំងទេ។ តែអាទិភាពរបស់បារាំងគឺជំនួយមនុស្សធម៌ដើម្បីជួយពលរដ្ឋលីប៊ីសាមញ្ញទៅវិញទេ។
សេចក្ដីកត់សម្គាល់របស់លោកធ្វើឡើងខណៈដែលសហរដ្ឋអាមេរិករុញច្រានឲ្យមានវិធានការដ៏ខ្លាំងជាងមុនពីអន្ដរជាតិប្រឆាំងរដ្ឋាភិបាលទីក្រុងទ្រីបូលី។ មន្ដ្រីទីក្រុងវ៉ាស៊ីនតោនថ្លែងកាលពីថ្ងៃច័ន្ទថា ខ្លួននឹងបញ្ជូននាវាចម្បាំងនិងយន្ដហោះឲ្យទៅនៅក្បែរប្រទេសលីប៊ី។ ប្រទេសអង់គ្លេសបានជំរុញឲ្យបង្កើតតំបន់គ្មានការហោះហើរនៅលើប្រទេសអាហ្វ្រីកខាងជើងមួយនេះ។
នៅថ្ងៃអង្គារ ប្រទេសបារាំងបានបញ្ជូនបរិក្ខារពេទ្យនិងបុគ្គលិកតាមយន្ដហោះ២គ្រឿងទៅកាន់ទីក្រុង បេងកាហ្ស៊ី (Benghazi) នៅភាគខាងកើតប្រទេសលីប៊ីដែលកាន់កាប់ដោយក្រុមបះបោរ។ លោក បារ៉ូអាំងថ្លែងទៀតថា មានជំនួយបន្ថែមនឹងមកដល់។ ប្រទេសបារាំងបានស្នើបញ្ជូនក្រុមមួយដើម្បីធ្វើការស៊ើបអង្កេតឧក្រិដ្ឋកម្មប្រឆាំងមនុស្សជាតិពាក់ព័ន្ធនឹងការបង្រ្កាបរបស់មេដឹកនាំលីប៊ីអ្នកប្រឆាំងរដ្ឋាភិបាល។
ជាទូទៅសហភាពអឺរុបបានប្រកាសបំរាមហាមឃាត់មិនផ្ដល់អាវុធនិងហាមមិនចេញទិដ្ឋាការប្រឆាំងប្រទេសលីប៊ី។ នៅក្នុងទីក្រុងហ្សឺណែវ (Geneva) កាលពីថ្ងៃច័ន្ទ នាយិកាខាងកិច្ចការគោលនយោបាយការបរទេសរបស់សហភាពអឺរុប គឺលោកស្រី កាថារីន អ៊ែស្ហថិន (Catherine Ashton) ថ្កោលទោសអ្វីដែលលោកស្រីពិពណ៌នាថាជា«បទរំលោភធ្ងន់ធ្ងរមកលើសិទ្ធិមនុស្ស»ដែលប្រព្រិត្ដធ្វើដោយរដ្ឋាភិបាលកាដាហ្វ៊ី។
«អំពើឃោរឃៅនិងការសង្កត់សង្កិនត្រូវតែឈប់។ អ្នកទទួលខុសត្រូវក្នុងអំពើឃោរឃៅត្រូវយកមកឲ្យតុលាការកាត់ទោស»។
បារាំងនិង អង់គ្លេសបានស្នើឲ្យបើកសន្និសីទកំពូលជាបន្ទាន់ ដើម្បីពិភាក្សាអំពីការបះបោរនៅក្នុងប្រទេសលីប៊ីដែលបណ្ដាលឲ្យមនុស្សច្រើនរយនាក់ស្លាប់ និងរបួស រុញច្រានឲ្យជនបរទេសច្រើនសន្ធឹកគេចចេញពីប្រទេសលីប៊ី៕
ប្រែសម្រួលដោយ អ៊ូ ធួក
